Read new_tumbuka_bible Ŵeruzgi 16 Bible Online

Ŵeruzgi 16 - new_tumbuka_bible bible

Ŵeruzgi 16

¹Zuŵa limoza Samusoni wakaruta ku msumba wa Gaza ndipo kwenekura wakakumana na mwanakazi muleŵe ndipo wakagona nayo.

²Ŵanthu ŵa ku Gaza ŵakapulika kuti Samusoni wiza kwenekura. Ntheura ŵanthu ŵara ŵakazingirizga malo ghara na kumukhazga usiku wose pa chipata cha msumba. Ŵakakhara waka chete usiku uku ŵakuyowoyeskana kuti, “Tiyeni tilindilire kusuke kuche, pamanyuma timukome.”

³Kweni Samusoni wakagona mpaka na usiku pakati. Sono pakati pa usiku wakawuka, wakakora vijaro vya pa chipata cha msumba pamoza na mphanjizgo zakhe ziŵiri. Wakavizgura pamoza na mphingirizgo na vinyakhe vyose. Wakaviyegha pa viŵegha na kuruta navyo pachanya pa phiri ilo likuthyana waka na Heburoni.

⁴Pamanyuma pakhe Samusoni ŵakamba kutemwana na mwanakazi munyakhe wa ku chidika cha Soreki zina la mwanakazi yura likaŵa Delila.

⁵Ŵakaronga ŵa ŵaFilisiti ŵakiza kwa Delila na kumuphalira kuti, “Umunyengelere kuti wakurongore uko kukufuma nkhongono zakhe zikuru izi ndiposo na umo tingamutondera mwakuti timukake na kumuthereska. Waliyose wa ise wati wakupenge ndarama za siliva 1,100.”

⁶Sono Delila wakati kwa Samusoni, “Nkhuromba kuti mundiphalire uko nkhongono zinu zikuru izi zikafuma na umo mungakakikira kuti munthu wamuthereskani.”

⁷Samusoni wakamuphalira wakati, “Usange ŵangandikaka na malusinga ghaphya ghakupangira uta ghankhonde na ghaŵiri ghambula komira, apo ndipo ndingaŵavye nkhongono na kuyana waka na munthu waliyose.”

⁸Penepapo ŵakaronga ŵa ŵaFilisiti ŵara ŵakiza kamupa Delila malusinga ghaphya ghankhonde na ghaŵiri ghambula komira, ndipo iyo wakamukakirira nagho.

⁹Pa nyengo yeneiyo mwanakazi wakaŵika ŵanthu ŵakumukhazga mu chipinda cha mukati. Sono Delila wakachemerezga wakati, “Samusoni, ŵaFilisiti awo ŵafika!” Kweni iyo wakadumula malusinga ghara nga ndi umo chingwe chikudumukira para chakhwaskana na moto. Ntheura chisisi cha nkhongono zakhe kuti chikamanyikwa chara.

¹⁰Sono Delila wakati kwa Samusoni, “Wonani mwandizerezeska waka ndipo mwandipusika. Nkhuromba mundiphalire umo munthu wangamukakirani.”

¹¹Samusoni wakamuphalira wakati, “Usange ŵangandikaka na vingwe viphya ivyo ŵandachitirepo nchito, apo ndipo nditi ndiŵenge wambula nkhongono, na kuŵa nga ndi munthu waliyose.”

¹²Ntheura Delila wakatora vingwe viphya na kumukaka navyo ndipo ŵanthu awo ŵakamukhazganga ŵakaŵa mu chipinda cha mukati ŵakachemerezga ŵakati, “Samusoni, ŵaFilisiti awo ŵafika!” Kweni Samusoni wakadumula vingwe vira mu mawoko ghakhe nga ndi uzi.

¹³Penepapo Delila wakati kwa Samusoni, “Na sono wuwo muchali kundizerezeska na kundipusika. Mundiphalire umo mungakakikira.” Ndipo Samusoni wakamuphalira wakati, “Usange ungaruka makunje ghankhonde na ghaŵiri gha sisi la ku mutu wane, kuŵa nga mautatavi na kughakhozga na chikhomo, apo ndipo nditi ndiŵenge wambula nkhongono na kuyana waka na munthu waliyose.”

¹⁴Ntheura apo Samusoni wakagona tulo, Delila wakatora makunje ghankhonde na ghaŵiri gha sisi la Samusoni na kugharuka nga utatavu. Wakaghakhozga na nyapini ndipo wakati, “Samusoni, ŵaFilisiti awo ŵafika!” Kweni iyo wakawuka mu tulo, wakakhura nyapini yura, chakurukira salu pamoza na sisi lakukakika nga mbutatavi.

¹⁵Sono Delila wakati kwa iyo, “Kasi mungayowoya uli kuti mukunditemwa apo mtima winu uli pa ine chara? Mwandizerezeska katatu kose, ndipo mulije kundiphalira uko kukufumira nkhongono zinu zikuru.”

¹⁶Delila wakamba kumukoserezga na kumuchichizga zuŵa na zuŵa na mazgu gheneagha. Ntheura Samusoni vikalema mwakuti wakakhumba waka na kufwa.

¹⁷Penepapo Samusoni wakamuphalira vyose ivyo vikaŵa mu mtima wakhe wakati, “Ku mutu wane ndindameteko chifukwa ndili muNaziri, wakupatulika wa Chiuta kufuma mu nthumbo ya ŵamama. Usange ŵangandimeta sisi nkhongono zane zifumengemo ndipo nditiŵenge wakuropwa na kuyana waka na munthu waliyose.”

¹⁸Delila wakati wamanya kuti Samusoni wamuphalira vya mu mtima wakhe vyose wakatuma mazgu kuya kaŵaphalira ŵararaŵarara ŵa ŵaFilisiti kuti, “Mwizeso kamoza pera, chifukwa wandiphalira vyose vya mu mtima wakhe.” Ntheura ŵararaŵarara ŵa ŵaFilisiti ŵakiza kwa iyo uko ŵayegha ndarama mu mawoko ghawo.

¹⁹Mwanakazi yura wakamugoneka tulo pa makongono ghakhe. Wakachema munthu kuti wameteko makunje ghankhonde na ghaŵiri gha sisi gha ku mutu wa Samusoni. Sono wakamba kuropwa Samusoni ndipo nkhongono zakhe zikafumamo.

²⁰Penepapo mwanakazi yura wakati, “Samusoni, ŵaFilisiti awo ŵafika!” Samusoni wakawuka mu tulo na kughanaghana kuti, “Nditi ndifumenge nga ndi umo nkhuchitira nyengo zose na kujisutula.” Kweni wakamanya chara kuti FUMU yamusida.

²¹ŴaFilisiti ŵakamukora na kumukozombora maso ghakhe. Ŵakaruta nayo ku msumba wa Gaza uku ŵamukaka maunyoro gha mkuŵa. Kwenekura ŵakamuŵika mu gadi kuti wasirenge tirigu.

²²Kweni pamanyuma sisi la ku mutu wakhe likamba kumeraso likati lameteka.

²³Zuŵa limoza ŵakaronga ŵaFilisiti ŵakawungana pamoza kuti ŵaŵe na chiphikiro na kupereka sembe yikuru kwa Dagoni chiuta wawo. Iwo ŵakati, “Dagoni chiuta withu wamupereka Samusoni murwani withu mu mawoko ghithu.”

²⁴Para ŵanthu ŵakamuwona Samusoni ŵakamuchindika chiuta wawo. Ŵakayowoyanga kuti, “Chiuta withu wapereka murwani withu mu mawoko ghithu, munthu mweneuyo wakaparanya charu chithu na kukoma ŵanthu ŵithu ŵanandi.”

²⁵Sono para ŵanthu ŵakaŵa mu chimwemwe chikuru ŵakati, “Muchemani Samusoni kuti wize katikondweskepo.” Ntheura ŵakamuchema Samusoni kufuma mu gadi ndipo iyo wakamba kuŵa kondweska. Ŵakamwimika pakati pa mizati.

²⁶Sono Samusoni wakayowoya kwa munyamata uyo wakamukora pa woko wakati, “Reka ndikhwaske mizati iyo yakora nyumba mwakuti ndiyagamireko.”

²⁷Mu nyumba yira mukazura ŵanthu ŵanarume na ŵanakazi. Ŵararaŵarara wose ŵa ŵaFilisiti nawo ŵakaŵa mwenemumo, ndipo pa mtenje pakhe pakaŵa ŵanthu pakunji 3,000 ŵanarume na ŵanakazi, awo ŵakalaŵiriranga apo Samusoni wakachitanga masoŵero.

²⁸Sono Samusoni wakachemerezga kwa FUMU mwa kuromba wakati, “Mwe FUMU Chiuta, ndaŵeya ndikumbukani. Mwe Chiuta ndaŵeya mundipe nkhongono kamoza pera keneaka kuti ndiwezgere nduzga ŵaFilisiti chifukwa cha maso ghane ghaŵiri.”

²⁹Sono Samusoni wakakora mizati ya pakati yiŵiri iyo yikakora nyumba, woko la maryero pa yimoza, ndipo la mazere pa yinyakhe.

³⁰Ndipo Samusoni wakati, Rekani ndifwire lumoza na ŵaFilisiti. Sono wakatutuzga na nkhongono zakhe zose ndipo nyumba yikaŵawira ŵararaŵarara ŵara pamoza na ŵanthu wose awo ŵakaŵa mwenemumo. Ntheura ŵanthu awo wakaŵakoma pa nyifwa yakhe ŵakaŵa ŵanandi kuruska awo ŵakakoma apo wakaŵa wamoyo.

³¹Ŵana ŵa kwakhe pamoza na wose ŵa mbumba yakhe ŵakiza kwiza katora chitanda chakhe, na kuruta nacho kuya kasunga pakati pa Zora na Eshitawolo mu dindi la Manowa wiske. Samusoni wakawusa ŵaIsraele virimika 20.