Read new_tumbuka_bible Ŵeruzgi 17 Bible Online

Ŵeruzgi 17 - new_tumbuka_bible bible

Ŵeruzgi 17

¹Mu charu cha mapiri cha Efurayimu mukaŵa munthu munyakhe mweneuyo zina lakhe wakaŵa Mika.

²Iyo wakati ku ŵanyina, “Ndarama za siliva 1,100 izo imwe mukatemberapo munthu uyo wakiba apo ine nkhupulika, zili na ine. Ine ndine nkhatora ndarama zina.” Sono ŵanyina ŵakati, “FUMU yikutumbike mwana wane.”

³Mika wakawezgera ndarama zira za siliva 1,100 kwa nyina. Sono nyina pakuwuskapo nthembo yira wakati, “Ndarama izi nkhuzipatuliskira kwa FUMU na mtima wose kuti ziŵe za mwana wane. Iyo wati wapangire chikozgo chakuŵaja na kuchiphaka siliva. Ntheura sono nditi ndikuwezgereso iwe ndarama.”

⁴Ntheura Mika wakati wawezgeraso ndarama zira kwa nyina, nyina wakatorapo ndarama za siliva 200 na kuzipereka ku mufuzi mweneuyo wakapangira chikozgo chakuŵaja na kuchiphaka siliva ndipo wakachiŵika mu nyumba ya Mika.

⁵Sono Mika wakaŵa na malo ghakusoperamo chikozgo chakhe chakuŵaja ndipo wakapanga chakuvwara cha usofi cha efodi ndiposo na twangoza twakuchemeka terafimu. Pamanyuma wakimika yumoza wa ŵana ŵakhe kuŵa musofi.

⁶Mu mazuŵa ghene ghara mukaŵavye karonga mu charu cha Israele. Munthu waliyose wakachitanga icho chikaŵa chiweme kwa iyomwene.

⁷Pakaŵa munyamata yumoza uyo wakakharanga mu Betelehemu mu charu cha Yuda uyo wakaŵa wa mu mbumba ya Yuda, kweniso muLevi.

⁸Munyamata yura wakafumamo mu muzi wa Betelehemu mu charu cha Yuda na kuya kakhara uko wangasanga malo. Apo wakendanga ulendo wakhe wakafika ku charu cha mapiri cha Efurayimu, ku nyumba ya Mika.

⁹Mika wakamufumba wakati, “Kasi wafumirankhu?” Munyamata yura wakazgora wakati, “Ine ndine muLevi ndipo nkhufumira ku Betelehemu mu charu cha Yuda. Nkhwenda kupenja malo uko ndingakharako.”

¹⁰Sono Mika wakati, “Khara na ine, uŵenge nga ndi dada na musofi kwa ine. Nditi ndikupenge ndarama za siliva khumi pa chirimika na malaya ghakuti uvware ndiposo na vyakurya wuwo.”

¹¹Ntheura muLevi yura wakakhorwa kukhara nayo Mika ndipo wakazgoka kuŵa nga njumoza wa ŵana ŵakhe.

¹²Sono Mika wakamwimika muLevi yura kuŵa musofi wakhe, na kukhara mu nyumba yakhe.

¹³Mika wakati, “Sono nkhumanya kuti FUMU yiti yindisambazgiske chifukwa ndili nayo muLevi uyo ndi musofi wane.”