Read new_tumbuka_bible Ŵeruzgi 18 Bible Online

Ŵeruzgi 18 - new_tumbuka_bible bible

Ŵeruzgi 18

¹Mu mazuŵa ghara mukaŵavye karonga mu charu cha Israele. Ŵanthu ŵa fuko la Dani ŵakapenjanga charu chakuti ŵakharemo nga nchawo na chawo. Pakuti mpaka pa nyengo iyo iwo kuti ŵakapokera charu chara kuti chiŵe chawo na chawo mukati mu mafuko gha Israele.

²Ntheura ŵanthu ŵa fuko la Dani ŵakatuma vinkhara vinkhonde awo ŵakafuma mu mbumba zawo zose. Iwo ŵakafumira ku msumba wa Zora na wa Eshitawolo kuti ŵarute kuya kapachira charu na kuchiwona umo chiliri. Ŵanthu wose ŵara ŵakati ku awo ŵakatumika, “Rutani mukendere charu.” Ŵanthu ŵara ŵakaruta ndipo ŵakaya kafika ku charu cha mapiri cha Efurayimu ku nyumba ya Mika ndipo ŵakagona kwenekura.

³Para ŵakaŵa pafupi na nyumba ya Mika ŵakapanikizga mazgu gha munyamata yura muLevi. Ŵakapatuka na kuyowoya nayo ŵakati, “Ukiza na njani kuno? Kasi ukuchitachi ku malo ghano? Ukuchita nchito uli kuno?”

⁴Ndipo iyo wakaŵaphalira ivyo Mika wakamuchitira na kuti kwa iwo, “Mika wali kundilemba nchito mwakuti ine ndili musofi wakhe.”

⁵Ŵanthu ŵara ŵakati kwa iyo, “Taŵeya, utifumbire kwa Chiuta kuti timanye usange ulendo withu uwu tiyendenge makora.”

⁶Ndipo musofi wakati kwa iwo, “Rutani mu mutende. Ulendo winu uwu FUMU yikuwuwona.”

⁷Penepapo ŵanthu ŵakhonde ŵara ŵakaruta ndipo ŵakafika ku msumba wa Layishi. Kwenekura wakawona ŵanthu awo ŵakaŵa mwenemumo, umo ŵakakhaliranga mu mutende, kwakuyana waka na umo ŵaSidoni ŵakakhaliranga. Ŵakajikhalira waka phee ŵambula kwenjerwa na kanthu ndiposo ŵambula kukavuka kanthu pa charu. Ŵakaŵa ŵanthu ŵasambazi nadi. Iwo ŵakakharanga kutali na ŵaSidoni ndipo ŵakenderananga na munthu waliyose chara.

⁸Sono ŵanthu ŵankhonde ŵara ŵakati ŵawerera ŵabali ŵawo ku Zora na ku Eshitawolo, ŵabali ŵawo ŵakaŵafumba ŵakati, “Kasi vinthu mwavisanga uli?”

⁹Iwo ŵakati, “Wukani tirutenge kuti tikarwe nawo nkhondo chifukwa charu tachiwona ndipo ncha nyata chomene. Kasi muchitengepo kanthu chara? Rekani kuya kuziwurika kanjira mu charu chira kuti mukachipoke.”

¹⁰Para mwaruta, mwamkusanga ŵanthu ŵambula kwenjerwako na kanthu. Charu nchisani. Inya Chiuta wachipereka mu mawoko ghinu charu cheneicho kuti chikusoŵerwa kanthu chara ako kakusangika pa charu.

¹¹Ntheura ŵanthu 600 ŵa fuko la Dani ŵakatora mahomwa gha nkhondo, na kuwuka kufuma ku msumba wa Zora na wa Eshitawolo.

¹²Ŵakaruta na kuzenga misasa ku msumba wa Kiriyati Yeyarimu mu charu cha Yuda. Pa chifukwa ichi malo ghara ghakuchemeka kuti misasa ya Dani mpaka sono ndipo ghali ku manjiliro gha dazi kwa Kiriyati Yeyarimu.

¹³Kufuma para wakajumphilira kuruta ku charu cha mapiri cha Efurayimu ndipo ŵakaya kafika pa nyumba ya Mika.

¹⁴Sono ŵanthu ŵankhonde ŵara ŵeneawo ŵakaruta kuya kapachira charu cha Layishi ŵakaŵafumba ŵabali ŵawo ŵakati, “Kasi mukumanya kuti mu nyumba izi muli chakuvwara cha efodi, twangoza twakuchemeka terafimu, ndiposo na kangoza kakuŵaja na ngoza wakusongonora? Sono ghanaghanani icho mungachita.”

¹⁵Ndipo ŵakapatuka na kwiza pa nyumba ya munyamata yura muLevi ku chikaya cha Mika ndipo ŵakatauzgana nayo.

¹⁶Ŵanthu ŵara 600 ŵa fuko la Dani ŵakatora mahomwa ghawo gha nkhondo ndipo ŵakimilira pa muryango wa chipata.

¹⁷Kweni ŵanthu ŵankhonde ŵara, ŵeneawo ŵakaya kapachira charu, ndiwo ŵakaya kanjira na kutora kangoza kakuŵaja kara, chakuvwara cha efodi, twangoza twakuchemeka terafimu, ndiposo na chikozgo chakuŵaja chakuphakika na siliva. Nyengo iyi musofi wakimilira pa muryango wa chipata pamoza na ŵanthu ŵara 600 awo ŵakaŵa na mahomwa gha nkhondo.

¹⁸Para ŵanthu aŵa ŵakanjira mu nyumba ya Mika na kutora kangoza kakuŵaja, chakuvwara cha efodi, twangoza twakuchemeka terafimu, na chikozgo chakuphakika na siliva musofi yura wakafumba wakati, “Kasi mukuchitachi?”

¹⁹Ŵanthu ŵara ŵakazgora ŵakati, “Chetama, reka kuyowoya. Zanga pamoza nase ndipo ukaŵe murongozgi na musofi withu. Kasi nkhuweme kwa iwe kuti uŵenge musofi wa munthu yumoza panji kuŵa musofi wa fuko na mbumba mu Israele?”

²⁰Mtima wa musofi yura ukakondwa. Wakatora chakuvwara cha efodi, twangoza twakuchemeka terafimu, ndiposo na chikozgo chakuŵaja chira ndipo wakaruta nawo ŵanthu ŵara.

²¹Ntheura ŵakafumapo na kuruta uko ŵadangizga ŵana ŵawo, mberere, ng'ombe, na ŵakatundu ŵawo.

²²Ŵakati ŵendapo kamtunda kufuma pa chikaya cha Mika, ŵazengezgani ŵaMika ŵakachemeka ndipo ŵakaruta na kuya kaŵasanga ŵa fuko la Dani.

²³Iwo ŵakachemerezga ku ŵaDani ŵeneawo ŵakazgoka na kumufumba Mika kuti, “Kasi chakuŵinya nchichi kuti wize na mpingo wa ntheura?”

²⁴Iyo wakazgora wakati, “Mwatora ŵachiuta ngoza ŵane awo nkhapanga, mwatoraso musofi wane na kuruta. Kasi ine ndakhara na vichi? Ndipo chifukwa uli mukundifumba kuti, ‘Kasi chakuŵinya nchichi?’ ”

²⁵Ndipo ŵanthu ŵa fuko la Dani ŵakati kwa iyo, “Reka kukwesana nase, mzire ŵanyakhe ŵakari ŵakuwukire ndipo iwe pamoza na ŵa mu nyumba yako yose mukomeke.”

²⁶Sono ŵaDani ŵakarutilira ulendo wawo. Para Mika wakawona kuti mbankhongono kuruska iyo, wakawerera na kuruta ku chikaya chakhe.

²⁷Ŵakati ŵatora ivyo Mika wakapanga ndiposo na musofi wakhe, ŵaDani ŵakiza ku msumba wa Layishi, ku ŵanthu ŵakuzika na ŵambula kwenjerwa ŵara. Ŵakarwa nawo nkhondo na kuŵakoma ndipo ŵakocha na moto msumba wawo.

²⁸Kukaŵavye wakuti wangaŵathaska chifukwa kukaŵa kutali na ŵaSidoni, ndipo kuti ŵakenderananga chara. Msumba ura ukaŵa mu chidika icho chili ku dera kwa chigaŵa cha Beti Rehobu. ŴaDani ŵakawuzengaso na kukharamo.

²⁹Msumba ura ŵakawuthya zina lakuti Dani, leneilo likaŵa la wiskewokuru mweneuyo wakababika na Israele. Kweni zina la msumba uwu likaŵa Layishi pakudanga.

³⁰Sono ŵaDani ŵakajimikira chikozgo chakuŵaja chakuphakika na siliva cha Mika chira. Yonatani mwana wa Gerishomu, muzukuru wa Mozesi, na ŵana ŵakhe ndiwo ŵakaŵa ŵasofi pa fuko la Dani mpaka pa zuŵa ilo ŵakayorekera ku umikori.

³¹Ntheura ŵaDani ŵakarutilira kusopa chikozgo chira icho Mika wakapanga, nyengo yose iyo Nyumba ya Chiuta yikaŵira ku Shilo.