Read new_tumbuka_bible Ŵeruzgi 19 Bible Online

Ŵeruzgi 19 - new_tumbuka_bible bible

Ŵeruzgi 19

¹Mu mazuŵa ghara mukaŵavye karonga mu charu cha Israele. Sono muLevi yunji uyo wakakharanga mu charu cha mapiri cha Efurayimu kutali wakatora muwoli muchoko ku Betelehemu mu charu cha Yuda.

²Zuŵa limoza muwoli wakhe muchoko uyu wakamukwiyira mufumu wakhe na kufumako kwa iyo, wakaruta ku nyumba ya wiske ku Betelehemu mu charu cha Yuda. Wakakhara kwenekura myezi yinayi.

³Sono mufumu wakhe wakamurondezga kuti wakayowoye nayo makora kuti wawerere. Mufumu wakhe wakaŵa na muteŵeti wakhe ndiposo na mbunda ziŵiri. Wakati wafika pa nyumba ya wiske wa muwoli wakhe, muwoli wakhe wakamunjizga mu nyumba ndipo ŵawiskevyara ŵakati wamuwona wakamupokerera na chimwemwe.

⁴Wiskevyara wakamuyowoyera kuti watandarepo ndipo iyo wakazomera kukhara nayo mazuŵa ghatatu. Ŵakaryanga na kumwa ndipo na kugonanga kwenekura.

⁵Pa zuŵa la chinayi wakawuka na macherochero, ndipo iyo wakanozgekanga kuti warutenge. Kweni wiske wa mwanakazi wakati ku mukweni wakhe, “Murye danga chakurya ndipo pamanyuma murutenge.”

⁶Ntheura ŵanthu ŵaŵiri ŵara ŵakakhara pasi ndipo ŵakarya na kumwa pamoza. Wiske wa mwanakazi wakati kwa mukweni wakhe, “Ugoneso kwenekuno usiku uno mwakuti mtima wako ukondwenge.”

⁷Sono para munthu yura wakawuka kuti warutenge, wiskevyara wakamupemberezga, wakasuka munthu yura wakagonaso kwenekura.

⁸Pa zuŵa la chinkhonde wakawuka na macherochero kuti warutenge. Wiske wa mwanakazi yura wakati, “Murye danga ndipo mulindilire mpaka ku mise.” Ntheura wose ŵaŵiri ŵakarya pamoza.

⁹Ndipo para munthu yura na muwoli wakhe muchoko ndiposo na muteŵeti wakhe ŵakawuka kuti ŵarutenge, wiskevyara, uyo ndi wiske wa mwanakazi, wakamuphalira wakati, “Wona dazi laruta ndipo kuŵenge mise. Ugoneso waka kwenekuno ndipo ukharenge mwakukondwa waka. Na machero muti muwuke na mulenje chomene na kuruta ku vikaya vyinu.”

¹⁰Kweni munthu yura wakakhumba chara kugonapo usiku ura. Iyo wakawuka na kuruta ndipo wakafika pa malo agho ghakuthyana na msumba wa Yebusi (uwo ndi Yerusalemu). Iyo wakaŵa na mbunda zakhe ziŵiri izo zikaŵa na viskaro, ndipo muwoli wakhe muchoko yura wakaŵa nayo.

¹¹Para ŵakaŵa kufupi na msumba wa Yebusi, dazi likamba kunjira ndipo muteŵeti wakhe wakati kwa sekuru wakhe, “Tiyeni sono tipatukire ku msumba uwu wa ŵaYebusi na kukagona mwenemumo.”

¹²Sekuru wakhe wakati kwa iyo, Titi tipatukirengemo chara mu msumba wa ŵamitundu ŵeneawo kuti mbaIsraele chara. Kweni titi tijumphilire mpaka ku Gibeya.

¹³Wakamuphalira muteŵeti wakhe, wakati, “Tiye tirute ku malo agha, ku Gibeya panji ku Rama, na kuya kagona ku ghamoza gha gheneagha.”

¹⁴Ntheura ŵakajumphilira na kwenda ulendo wawo. Dazi likaŵanjirira kufupi na Gibeya weneuwo ndi msumba wa ŵaBenjamini.

¹⁵Iwo ŵakapatuka penepara kuti ŵanjire na kugona usiku ura ku Gibeya. Ŵakanjira na kuya kakhara pa luwugha lwa mu msumba kweni pakaŵavye munthu na yumoza wakaŵanjizga mu nyumba yakhe kuti ŵagonemo.

¹⁶Mise yeneyira wakawona munthu muchekuru wakwiza kufumira ku mlimo wakhe ku munda. Munthu yura wakaŵa wa ku charu cha mapiri cha Efurayimu ndipo wakakharanga mu Gibeya. Ŵenecho ŵa malo ŵakaŵa ŵaBenjamini.

¹⁷Muchekuru yura wakati walaŵiska wakawona mulendo pa luwugha mukati mu msumba ndipo wakamufumba wakati, “Kasi mukuyankhu? Ndipo mwafumankhu?”

¹⁸MuLevi yura wakamuzgora wakati, “Tafumira ku Betelehemu mu charu cha Yuda, tikuruta kutali nadi ku charu cha mapiri cha Efurayimu, kwenekuko tikafuma. Nkharuta ku Betelehemu mu charu cha Yuda ndipo sono nkhuruta ku Nyumba ya FUMU, kweni palije na yumoza uyo wandipokerera mu nyumba yakhe.

¹⁹Tili nawo utheka na chakurya chinyakhe cha mbunda zithu, ndiposo tili na chingwa na vinyo vyeneivyo tingarya ine na muteŵeti-kazi winu pamoza na ŵateŵeti winu. Kuti tikusoŵerwa kanthu chara.”

²⁰Muchekuru yura wakati, “Muli ŵakupokerereka mu nyumba yane. Nditi ndimupwerererani pa ivyo mukusoŵerwa, kweni mungagonanga pawaro chara.”

²¹Ntheura wakaŵanjizga mu nyumba yakhe ndipo mbunda wakazipa chakurya. Ŵalendo ŵara ŵakageza mu malundi ndipo ŵakarya na kumwa.

²²Apo ŵakaryanga mwa kukondwera, ŵanthu ŵa mu msumba, ŵanthu ŵawakawaka, ŵakazingirizga nyumba ya muchekuru yura na kukhung'uska pa chijaro. Ŵakayowoya kwa mwenenyumba, muchekuru yura kuti, “Fuma nayo munthu uyo wangunjira mu nyumba yako umo kuti tigone nayo.”

²³Ndipo mwenecho wa nyumba yura wakafumira kuwaro ndipo wakati kwa iwo, “Mwa ŵanyane, mureke kuchita uheni wa ntheura. Munthu uyu ndi mulendo wane, mureke kuchita chinthu chiheni ichi.

²⁴Wonani, ndili na mwana wane mwali wakulangwa ndiposo na muwoli wakhe muchoko. Rekani ndiŵafumye sono. Muŵatore na kuchita nawo chose icho mukukhumba. Kweni munthu uyu mungamuchitira uheni wa ntheura chara.”

²⁵Ŵanthu ŵara kuti ŵakakhumba chara kumupulikira. Ntheura mulendo yura wakamukora muwoli wakhe muchoko na kumufumiskira kuwaro kwa iwo. Ŵanthu ŵara ŵakamugona ndipo ŵakachita nayo vya ukazuzi usiku wose mpaka na mulenje. Ku matandakucha ŵakamurekezga kuti warutenge.

²⁶Ndipo apo kukachanga mwanakazi yura wakiza ndipo wakawa pasi pa muryango, pa nyumba ya munthu yura, umo mukaŵa mufumu wakhe, kukasuka kukangweruka.

²⁷Mufumu wakhe wakawuka na mulenje ndipo para wakajulako ku muryango kuti warutenge, wakawona muwoli wakhe wa chiŵiri wagona pa muryango wa nyumba, wajizingizga mawoko pa muryango.

²⁸Wakamuphalira wakati, “Wuka, tiye tirutenge.” Kweni mwanakazi yura kuti wakazgora chara. Penepapo wakamukwezga pa mbunda na kuruta ku kwakhe.

²⁹Wakati wanjira mu nyumba yakhe wakatora chimayi ndipo wakamukora muwoli wakhe muchoko yura na kumudumula chiŵaro na chiŵaro kupanga vipikita 12, ndipo wakavituma mu charu chose cha Israele.

³⁰Wose awo ŵakachiwona ichi ŵakati, “Chinthu chiheni cha ntheura chindachitikepo, ndiposo tindachiwonepo, kufuma pa zuŵa ilo ŵaIsraele ŵakafumira mu charu cha Eguputo mpaka lero. Muchighanaghane, dumbiskanani ndipo mutiphalire icho tikwenera kuchita.”