Read new_tumbuka_bible Ŵeruzgi 2 Bible Online

Ŵeruzgi 2 - new_tumbuka_bible bible

Ŵeruzgi 2

¹Mungelo wa FUMU wakaruta ku Bokimu kufuma ku Giligala. Iyo wakaŵaphalira ŵaIsraele uthenga wa FUMU kuti, “Ine nkhamufumyani mu Eguputo, ndipo nkhiza namwe ku charu icho nkharapa kuti ndichiperekenge ku ŵawiskemwekuru. Ine nkhati, ‘Ine ndizamkuswa phangano lane ilo nkhapangana namwe chara.

²Sono imwe namwe mureke kuchita phangano na ŵanthu awo ŵakukhara mu charu chino. Mwizakabwangandulire pasi majochero ghawo.’ Kweni imwe mulije kupulikira. Kasi nchifukwa uli mwachita ntheura?

³Ntheura sono nkhumuphalirani kuti ine ndiŵachimbizgengepo panthazi pinu chara. Ŵati ŵaŵenge nga ndi minga pafupi namwe ndipo ŵachiuta ŵawo ŵati ŵaŵenge nga ndi musampha kwa imwe.”

⁴Para mungelo wa FUMU wakayowoya mazgu agha ku ŵaIsraele wose, ŵanthu ŵara ŵakamba kulira chomene.

⁵Malo ghara ŵakaghathya zina lakuti Bokimu (kung'anamula kuti ŵakulira) ndipo penepara ŵakapereka sembe kwa FUMU.

⁶Para Yoshuwa wakati waŵawezga ŵaIsraele, iwo ŵakaruta waliyose wa iwo kuya katora charu kwakuyana na chiharo chakhe.

⁷ŴaIsraele ŵakateŵetera FUMU mazuŵa ghose gha umoyo wa Yoshuwa, na gha ŵararaŵarara wose awo umoyo wawo ukarutilira Yoshuwa wati wafwa, ŵeneawo ŵakawona milimo yikuru yose iyo FUMU yikachitira ŵaIsraele.

⁸Yoshuwa mwana wa Nuni, muteŵeti wa FUMU, wakafwa apo wakaŵa na virimika 110.

⁹Ŵakamusunga mu malo agho wakapoka nga nchiharo chakhe mu msumba wa Timunati Heresi, mu charu cha mapiri cha Efurayimu, ku mpoto kwa Phiri la Gaashi.

¹⁰Muwiro wose ura ukati wamara kufwa na kusungika pamoza na ŵabali ŵawo, pakaŵaso muwiro unyakhe uwo kuti ukayimanya FUMU chara, nanga nkhumanya milimo iyo yikaŵachitira ŵaIsraele.

¹¹ŴaIsraele ŵakamba kuchita uheni panthazi pa FUMU na kuteŵetera ŵachiuta Baala.

¹²Iwo ŵakayireka FUMU, Chiuta wa ŵasekuru ŵawo, mweneuyo wakaŵafumya mu charu cha Eguputo. Ŵakarondezga na kusopa ŵachiuta ŵanyakhe, awo ŵakaŵa ŵachiuta ŵa ŵanthu awo ŵakazengezgana nawo. Ntheura FUMU ŵakayikwiyiska chomene.

¹³ŴaIsraele ŵakareka kusopa FUMU ndipo ŵakamba kuteŵetera ŵachiuta ngoza ŵaBaala na ŵaAshitaroti[1]

¹⁴Ntheura FUMU yikaŵakwiyira chomene ŵaIsraele ndipo yikaŵapereka mu mawoko gha ŵanthu awo ŵakaskoghanga vinthu vyawo. Yikazomerezga kuti ŵarwani awo ŵakaŵazingirizga ŵaŵathereske mwakuti ŵakatondeka kurwa na ŵarwani ŵawo.

¹⁵Para ŵaIsraele ŵakarutanga kuya karwa nkhondo FUMU yikimikananga nawo kuŵachitira uheni, nga ndi umo FUMU yikaŵachenjezgera ndiposo nga ndi umo yikaŵarapira. ŴaIsraele ŵakaŵa mu visuzgo vikuru.

¹⁶Pamanyuma FUMU yikimika ŵeruzgi ŵeneawo ŵakaŵaponoska ku ŵanthu awo ŵakaŵaskoghanga vinthu vyawo.

¹⁷Ndipouli ŵaIsraele kuti ŵakapulikira ŵeruzgi ŵawo chara, chifukwa ŵakachita uzaghali pakuteŵetera ŵachiuta ŵanyakhe na kuŵalambira. Maluŵiro ŵakareka nthowa izo ŵakendamo ŵasekuru ŵawo, ŵeneawo ŵakapulikiranga marango gha FUMU. Kweni iwo kuti ŵakachita ntheura chara.

¹⁸Nyengo yose iyo FUMU yikaŵamikira mweruzgi yikaŵangaso nayo mweruzgi yura, ndipo yikaŵaponoskanga ŵaIsraele ku ŵarwani ŵawo nyengo yose ya umoyo wakhe. FUMU yikaŵachitiranga chitima na umo ŵakadandauliranga chifukwa cha awo ŵakaŵasuzganga na kuŵanyekezga.

¹⁹Kweni para mweruzgi wafwa ŵanthu ŵakawereranga kukuchita viheni chomene kuruska ivyo wakachitanga ŵawiskewokuru. Iwo ŵakateŵeteranga ŵachiuta ŵanyakhe na kuŵalambira. Iwo kuti ŵakakhumba chara kureka maluso ghawo ghaheni na kuŵa ŵanonono mtima.

²⁰Penepapo FUMU yikaŵakwiyira chomene ŵaIsraele ndipo yikati kwa iwo, “Ŵanthu aŵa ŵaswa phangano lane ilo nkhalangula ŵawiskewokuru kuti ŵalisungenge. Ntheura chifukwa chakuti wandapulikire mazgu ghane,

²¹nditi ndifumyengemo chara mtundu uliwose wa ŵanthu awo Yoshuwa wakareka para wakafwiranga.

²²Kwamba sono nditi ndiŵareke mwakuti ndiŵayezgeremo ŵaIsraele na kuwona usange ŵangapwererera kwenda mu nthowa ya FUMU nga ndi umo ŵakachitira ŵawiskewokuru.”

²³Ntheura FUMU yikaŵareka ŵamitundu ŵara kuti ŵakhare kwambula kuŵafumyamo nyengo yeneiyo, ndipo kuti yikaŵapereka mu mawoko gha Yoshuwa kuti waŵathereske chara.