Read new_tumbuka_bible Ŵeruzgi 20 Bible Online

Ŵeruzgi 20 - new_tumbuka_bible bible

Ŵeruzgi 20

¹Sono ŵaIsraele wose, kufuma ku charu cha Dani ku mpoto mpaka ku Beyeresheba ku mwera, pamoza na ŵa mu charu cha Gileyadi ku mafumiro gha dazi ŵakawungana nga ndi munthu yumoza panthazi pa FUMU ku Mizipa.

²Ŵarongozgi ŵa ŵanthu wose ŵa mafuko gha Israele ŵakaŵapo pa ungano wa ŵanthu ŵa Chiuta. Wose pamoza ŵakaŵa ŵasilikari 400,000 ŵakwenda pasi awo ŵakaŵa na malupanga ghawo.

³(Sono ŵaBenjamini ŵakapulika kuti ŵaIsraele ŵakawungana ku Mizipa.) Ndipo ŵaIsraele ŵakamufumba muLevi yura ŵakati, “Tiphalire, kasi chiheni ichi chikachitika uli?”

⁴Ndipo muLevi yura, mufumu wa mwanakazi uyo wakakomeka wakazgora wakati, “Nkhafika ku Gibeya, msumba weneuwo ngwa ŵaBenjamini, ine na muwoli wane muchoko kuti tigonemo.

⁵Ŵanthu ŵa ku Gibeya ŵakiza na usiku ndipo ŵakazingirizga nyumba umo nkhaŵa ine na usiku na kugonamo. Iwo ŵakatenge ŵandikome ndipo ŵakakora muwoli wane muchoko na kugonana nayo mwakumuchichizga, ndipo wali kufwa.

⁶Nkhamutora muwoli wane muchoko yura ndipo nkhamudumula vipitikapitika na kuvituma ku charu chose icho nchiharo cha ŵaIsraele. Ŵanthu ŵara ŵachita icho ncha kukhozga soni na cha ukazuzi mwa Israele.

⁷Sono imwe mose mwa ŵaIsraele mughanaghanepo ndipo mudumure icho chikawerera kuchitika pa ŵanthu ŵa ku Gibeya.”

⁸Ŵanthu wose ŵakawuka nga munthu yumoza, ŵakati, “Palije na yumoza mwa ise uyo wati warute ku hema lakhe nanga nkhuwererera ku chikaya chakhe.

⁹Kweni sono icho tiŵachitirenge ŵanthu ŵa ku Gibeya ndi ichi: titi tirute kuya karwa nawo nkhondo kwakuyana na umo mphenduzgo yarongorera.

¹⁰Titi titorepo ŵanthu khumi mu ŵanthu 100 kufuma mu mafuko ghose gha ŵaIsraele, ŵanthu 100 kufuma mu ŵanthu 1,000 ndiposo ŵanthu 1,000 kufuma mu ŵanthu vikwi khumi. Iwo ŵati ŵawunganye vyakurya vya ŵasilikari, awo ŵamkuwezgera nduzga ŵanthu ŵa ku Gibeya, msumba wa ŵaBenjamini chifukwa cha uheni wose uwo ŵachita mu charu cha Israele.”

¹¹Ntheura ŵaIsraele wose ŵakawungana pamoza na kukoreranako nga munthu yumoza kuti ŵarwe nkhondo na msumba ura.

¹²Mafuko gha ŵaIsraele ghakatuma ŵanthu ku fuko la ŵaBenjamini kuya kafumba kuti, “Kasi nchifukwa uli mukachita uheni wa mtundu uwu mukati mwinu?

¹³Ŵanthu awo ŵa mu Gibeya awo ŵakachita chiheni ichi, muŵapereke kwa ise mwakuti tiŵakome na kuwuskamo uheni uwo uli mwa Israele.” Kweni ŵaBenjamini kuti ŵakakhumba chara kupulika mazgu gha ŵabali ŵawo, ŵaIsraele.

¹⁴Sono ŵaBenjamini ŵakiza kufuma mu misumba yawo na kuwungana pamoza ku Gibeya, kuti ŵakarwe nkhondo na ŵaIsraele.

¹⁵Pa zuŵa lira ŵaBenjamini awo ŵakawunganya pamoza ŵasilikari 26,000 kufuma mu misumba yose, pa dera pa ŵasilikari ŵakusankhika 700 ŵa ku Gibeya.

¹⁶Mukati mu ŵasilikari wose aŵa mukaŵa vigwe vya ŵasilikari ŵa mawoko gha maluzere 700. Waliyose wa iwo wakamanya kuponya libwe na fyata na kulasa sisi nanga ndimoza kwambula kuwinda.

¹⁷ŴaIsraele kwambula kupenderako ŵaBenjamini, ŵakawunganya ŵasilikari 400,000, awo ŵakaŵa na malupanga awo ŵakamanya nadi kurwa nkhondo.

¹⁸ŴaIsraele ŵakaruta ku msumba wa Betele kuya kafumba kwa Chiuta. Iwo ŵakafumba kuti, “Kasi mbanjani mwa ise awo ŵati ŵadange kuruta kuya karwa nkhondo na ŵaBenjamini?” Ndipo FUMU yikazgora kuti, “ŴaYuda ndiwo ŵati ŵadange kuruta.”

¹⁹Sono ŵaIsraele ŵakawuka na mulenje na kuya kazenga misasa yawo kudunjikana na msumba wa Gibeya.

²⁰ŴaIsraele ŵakaruta kuya karwa na ŵaBenjamini, ndipo ŵakaŵika ŵasilikari ŵawo kudunjikana na msumba wa Gibeya.

²¹ŴaBenjamini nawo ŵakafuma mu msumba wa Gibeya ndipo zuŵa lira ŵakakoma ŵaIsraele 22,000.

²²Kweni ŵaIsraele ŵara ŵakajikhwimiska ndipo ŵakandandikaso ŵasilikari ŵawo mu malo gheneghara, umo wakandandika ŵasilikari ŵawo pa zuŵa lakudanga.

²³Sono ŵaIsraele ŵakaruta kuya kalira panthazi pa FUMU kufika na mise ndipo ŵakafumba kwa FUMU wakati, “Kasi tiruteso kuya karwa nkhondo na ŵabali ŵithu ŵaBenjamini?” Ndipo FUMU yikati, “Rutani mukarwe nawo.”

²⁴Ntheura ŵaIsraele ŵakasenderera kufupi kuti ŵarwe na ŵaBenjamini zuŵa la chiŵiri.

²⁵ŴaBenjamini ŵakafumaso mu msumba wa Gibeya kuti ŵarwe nawo nkhondo zuŵa la chiŵiri ndipo ŵakakoma ŵaIsraele 18,000. Wose aŵa ŵakarweranga malupanga.

²⁶Penepapo ŵasilikari wose ŵa ŵaIsraele ŵakaruta ku msumba Betele kuya kalira kwenekura. Ŵakakhara kwenekura panthazi pa FUMU kuziŵizga kurya zuŵa lira mpaka na mise ndipo ŵakapereka sembe zakocha na sembe za wenenawene panthazi pa FUMU.

²⁷ŴaIsraele ŵakafumba kwa FUMU pakuti Bokosi la Phangano la Chiuta likaŵa kwenekura mu mazuŵa ghara.

²⁸Musofi Finehasi mwana wa Eleyazara, muzukuru wa Aroni, ndiyo ŵakasungiliranga bokosi lira nyengo yira. Ntheura ŵaIsraele ŵakati, “Kasi tiruteso pa nyengo yino kuti tikarwe nkhondo na ŵabali ŵithu ŵaBenjamini, panji tireke?” FUMU yikazgora yikati, “Rutani, chifukwa na machero nditi ndiŵapereke mu mawoko ghinu.”

²⁹Ntheura ŵaIsraele ŵakaŵika ŵasilikari kuti ŵakhazge kuzingirizga msumba wa Gibeya.

³⁰Ŵakaruta kuya karwa nkhondo na ŵaBenjamini pa zuŵa la chitatu. Ŵakandandika ŵasilikari ŵawo kuti ŵarwe na ŵanthu ŵa msumba wa Gibeya nga ndi umo wakachitira pakudanga.

³¹ŴaBenjamini ŵakafuma kuya karwa nawo, ndipo ŵakaguzikira kutali na msumba. Nga ndi umo ŵakachitiranga pa nyengo zakudanga, ŵakamba kutimba na kukoma ŵaIsraele mu misewu yikuru mwakuti ŵasilikari 30 ŵaIsraele ŵakakomeka mu misewu na mu thengere. Msewu umoza uwo wafwirapo ndiwo ukuruta ku Betele ndiposo unyakhe ndi uwo ukuruta ku Gibeya.

³²ŴaBenjamini ŵakayowoyanga kuti, “ŴaIsraele ŵakutondeka panthazi pithu nga mpha kudanga.” Kweni ŵaIsraele ŵakati, “Tiyeni tichimbire ndipo tiŵaguzire ku misewu yikuru kutali na msumba.”

³³Ŵasilikari wose ŵakawuka kufuma pa malo ghawo ndipo ŵakaya kandanda ku Baala Tamara. Sono ŵaIsraele awo ŵakakhazganga ŵakavutupuka kufuma mu malo ghawo ku manjiliro gha dazi kwa Geba.

³⁴Ndipo ŵasilikari ŵakusoreka 10,000 ŵa ku Israele ŵakawuzingirizga msumba wa Gibeya. Nkhondo yikaŵa yakofya. Sono ŵaBenjamini ŵakamanya chara na soka ilo likaŵa pafupi kuŵawira.

³⁵FUMU yikaŵatonda ŵaBenjamini panthazi pa ŵaIsraele. Zuŵa lira ŵaIsraele ŵakakoma ŵaBenjamini 25,100, awo ŵakarweranga malupanga.

³⁶Penepapo ŵaBenjamini ŵakamanya kuti ŵathereska. ŴaIsraele ŵakawerera nyuma na kuŵarekera malo ŵaBenjamini, chifukwa ŵakagomezganga ŵasilikari ŵanyawo awo ŵakaŵaŵika kuti ŵaŵakhazge kudunjikana na msumba wa Gibeya.

³⁷Ŵanthu awo ŵakakhazganga, mwaluŵiroluŵiro ŵakawurotokera msumba wa Gibeya, ndipo iwo ŵakakoma na lupanga wose ŵa mu msumba.

³⁸Sono ŵasilikari ŵanyakhe ŵara na awo ŵakakhazganga ŵakapangana chimanyikwiro chakuti para ŵasunkhiska josi linandi lakuti waka pholi kufumira mu msumba,

³⁹ndipo ŵasilikari ŵanyakhe ŵara ŵakawereranga kwiza karwa nkhondo. Sono ŵaBenjamini ŵakambako kutimba na kukoma ŵaIsraele. Awo ŵakakomapo ŵakaŵa pafupi 30. Iwo ŵakati, “Nadi taŵakoma nga mpha nkhondo yakudanga.”

⁴⁰Kweni para chimanyikwiro cha josi chikamba kukwera kufuma mu msumba ŵaBenjamini ŵakalaŵiska kunyuma kwawo. Ŵakawona josi la kuphya kwa msumba likakwerera kuchanya.

⁴¹Penepapo ŵaIsraele ŵakawerera ndipo ŵaBenjamini ŵakofiwa chomene chifukwa ŵakawona kuti soka liri pafupi kuŵawira.

⁴²Ntheura ŵaBenjamini ŵakamba kuŵachimbira ŵaIsraele na kurazga ku mapopa. Kweni nkhondo yikaŵagundizga ndipo awo ŵakafumanga mu msumba ŵakakoma ŵaBenjamini penepara.

⁴³ŴaIsraele ŵakaŵazingirizga ŵaBenjamini ŵakaŵachimbizga na kuŵathereskerathu kufuma ku Noha kuya kafika pakudunjikana na msumba wa Gibeya, ku dera la ku mafumiro gha dazi.

⁴⁴ŴaBenjamini 18,000 ŵakafwa. Wose aŵa ŵakaŵa vinkhara vya nkhondo.

⁴⁵Awo ŵakakharapo ŵakang'anamuka na kuchimbilira mu mapopa ku jarawe la Rimoni. Mwa iwo ŵanthu 5,000 ŵakakomekera mu misewu yikuru. ŴaIsraele ŵakaŵarondora ndipera ŵaBenjamini mpaka ŵakafika ku Gidomu ndipo ŵanthu 2,000 ŵakakomekaso.

⁴⁶Ntheura ŵaBenjamini awo ŵakafwa zuŵa lira ŵakaŵa 25,000. Aŵa ŵakaŵa ŵanthu ŵakurwa na lupanga ndiposo vinkhara nadi vya nkhondo.

⁴⁷Kweni ŵasilikari ŵaBenjamini 600 awo ŵakapona wakachimbilira mu mapopa kuya kakhara ku jarawe la Rimoni kwenekura myezi yinayi.

⁴⁸Sono ŵasilikari ŵa ŵaIsraele ŵakawerera nyuma kuya karwa nkhondo na ŵaBenjamini awo ŵakakharako ndipo ŵakakoma na lupanga ŵanthu na vya kuŵeta wuwo ndiposo na chose icho ŵakachisanga. Ŵakocha na moto mizi yose iyo ŵakayisanga.