Read new_tumbuka_bible Ŵeruzgi 21 Bible Online

Ŵeruzgi 21 - new_tumbuka_bible bible

Ŵeruzgi 21

¹Para ŵaIsraele ŵakawunganya ku msumba wa Mizipa ŵakarapa kuti, “Paŵavye na yumoza wa ise uyo wati watezge mwana wakhe ku ŵaBenjamini.”

²Ntheura ŵaIsraele ŵakiza ku msumba wa Betele kwenekura ŵakakhara pasi panthazi pa mpaka na mise uku ŵakulira chomene.

³Iwo ŵakati, “Mwe FUMU, Chiuta wa ŵaIsraele, kasi nchifukwa uli chinthu ichi chachitika mu charu cha Israele muhanya uno kuti fuko limoza mwa Israele lireke kuŵako?”

⁴Na machero ghakhe ŵaIsraele ŵakawuka na mulenjelenje ndipo ŵakazenga jochero na kupereka sembe zakocha na sembe za wenenawene.

⁵Iwo ŵakafumba ŵakati, “Kasi ndi fuko ndi mu mafuko ghose gha Israele ilo lindaŵepo pa ungano wa FUMU?” Pakuti ŵakarapa chirapo chikuru kuti yose uyo wati wareke kwiza pa ungano wa FUMU ku msumba Mizipa wati wakomeke.

⁶ŴaIsraele ŵakaŵa na chitima chomene pa ŵana ŵanyawo ŵa fuko la Benjamini. Iwo ŵakati, “Fuko limoza lawukako kwa Israele muhanya uno.

⁷Kasi tichite uli kuti tiŵasangire ŵanakazi ŵanthu awo ŵaBenjamini ŵakharako? Pakuti ise tikarapa panthazi pa FUMU kuti, ‘Tireke kutezgapo ŵana ŵithu ŵanakazi kwa iwo?’ ”

⁸Sono iwo ŵakafumba ŵakati, “Kasi ndi fuko ndi mu mafuko gha Israele ilo lindaŵepo ungano wa FUMU ku msumba wa Mizipa?” Kukasangika kuti pakaŵavye nanga njumoza wakufumira ku Yabeshi Gileyadi uyo wakizako ku ungano wa ku misasa kura.

⁹Pakuti para ŵakati ŵapenda ŵanthu awo ŵakawungana ŵakasanga kuti pakaŵavye na yumoza wa awo ŵakakharanga ku Yabeshi Gileyadi.

¹⁰Ntheura mpingo ukatumako ŵasilikari 12,000 vinkhara vya nkhondo na kuŵalangula kuti, “Rutani mukakome na lupanga ŵanthu ŵa ku Yabeshi Gileyadi ŵanakazi na ŵana wuwo.

¹¹Icho mukachite ndi ichi. Mukakome waliyose mu msumba ura, manyi ndi mwanarume panji mwanakazi uyo wali kumanyapo mwanarume.”

¹²Sono ŵakasanga pakati pa ŵanthu ŵa ku Yabeshi Gileyadi ŵamwali ŵakulangwa 400. Iwo ŵakiza nawo ku msasa wa ku Shilo mu charu cha Kanani.

¹³Penepapo mpingo wose ukatuma mazgu ku ŵaBenjamini awo ŵakaŵa pa jarawe la Rimoni kuŵaphalira kuti kuli mutende nkhondo yamara.

¹⁴ŴaBenjamini ŵakawera nyengo yeneiyo. Ndipo ŵaIsraele ŵakaŵapa ŵaBenjamini ŵamwali ŵa ku Yabeshi Gileyadi awo ŵakaŵasida ŵamoyo. Kweni kuti ŵakakwanira wose chara.

¹⁵ŴaIsraele ŵakaŵa na chitima chomene na ŵaBenjamini chifukwa FUMU yikawuskapo fuko limoza mu mafuko gha Israele.

¹⁶Sono ŵararaŵarara ŵa mpingo ŵakati, Kasi tichite uli kuti tiŵasangire ŵanakazi ŵanthu ŵaBenjamini awo ŵakharako pakuti ŵanakazi ŵa mu fuko la ŵaBenjamini ŵali kukomeka?

¹⁷Iwo ŵakati, “Ŵanthu awo ŵakharako mu fuko la Benjamini ŵakwenera kuŵa na ŵazukuru kuti fuko lawo lireke kumara petu mu ŵaIsraele.

¹⁸Ndipouli tingapereka chara ŵana ŵithu ŵanakazi kuti ŵaŵatore. Pakuti ise tikarapa kuti, ‘Watembeke yose uyo wakutezga mwana wakhe mwanakazi ku muBenjamini kuti wamutore kuŵa muwoli wakhe.’ ”

¹⁹Ntheura ŵakati, “Asi kuli chiphikiro cha FUMU icho chikuchitika chirimika chilichose ku Shilo ku mpoto kwa msumba wa Betele, ku mafumiro gha dazi kwa msewu uwo ukukwera kufuma ku Betele na kuya ku Shekemu, ku mwera kwa Lebona?”

²⁰Ndipo ŵakaŵalangulira ŵaBenjamini ŵakati, “Rutani mukaŵakhazge mu minda ya mpheska,

²¹ndipo mukalaŵiskenge. Para ŵana ŵasungwana ŵa ku Shilo ŵakwiza kwiza kavina magule, imwe mukafumenge mu minda ya mpheska ndipo waliyose wa imwe wajitorere muwoli mu ŵamwali ŵa ku Shilo na kuruta nawo ku charu cha Benjamini.

²²Sono usange ŵawiskewo panji ŵadumbu ŵawo ŵakwiza na kudandaula tizamkuŵaphalira kuti, ‘Muŵagowokere chifukwa chakusomphora waka ŵawoli ŵawo, pakuti usange ndimwe mwanguŵapa ŵanakazi kuti ŵaŵatore, mphanyi imwe namwe muli na mrandu wakuswa chirapo chinu.’ ”

²³ŴaBenjamini ŵakachita ntheura. Apo ŵamwali ŵakavinanga muBenjamini waliyose wakasomphora mwali na kuruta nayo kuti wakaŵe muwoli wakhe. Pamanyuma ŵakawuka na kuwerera ku charu cha kwawo ndipo ŵakazengaso mizi na kukhara mwenemumo.

²⁴Sono ŵaIsraele ŵakawukako nyengo yeneyira na kuruta waliyose ku fuko lakhe na ku mbumba yakhe waliyose uko kukaŵa chiharo chakhe.

²⁵Mu mazuŵa ghara mukaŵavye karonga mu charu cha Israele. Munthu waliyose wakachitanga waka icho chikaŵa chiweme kwa iyo.