Read new_tumbuka_bible Ŵeruzgi 3 Bible Online

Ŵeruzgi 3 - new_tumbuka_bible bible

Ŵeruzgi 3

¹FUMU yikarekako mafuko ghanyakhe gha ŵanthu mu charu kuti yiyezgeremo ŵaIsraele. Aŵa mba Israele wose awo kuti ŵakarwapo nkhondo yiliyose mu charu cha Kanani chara.

²FUMU yikaŵareka kuti miwiro ya ŵaIsraele yimanye kurwa nkhondo na kusambizga awo ŵakaŵa ŵandayimanyepo nkhondo na kale.

³Mafuko agho FUMU yikareka mu charu ndi iyi: ŵakaronga ŵankhonde ŵa ŵaFilisiti, ŵaKanani wose, ŵaSidoni ndiposo ŵaHivi awo ŵakakharanga ku Phiri la Lebanoni, kufuma ku Phiri la Baala Heremoni kuya kafika ku chipata cha Hamati.

⁴FUMU yikaŵareka ŵamitundu kuti yiyezgerengepo ŵaIsraele, mwakuti yiwone usange ŵaIsraele ŵangapulikira marango ghakhe agho yikapereka ku ŵawiskewokuru kwizira mwa Mozesi.

⁵Ntheura ŵaIsraele ŵakakhara mukati mwa ŵaKanani, ŵaHiti, ŵaAmori, ŵaPerezi, ŵaHivi na mwa ŵaYebusi.

⁶ŴaIsraele ŵanyakhe ŵakatora ŵanakazi ŵa ŵamitundu kuŵa ŵawoli ŵawo, ndiposo ŵakatengweska ŵana ŵawo ŵanakazi ku ŵana ŵanarume ŵa ŵamitundu ŵara. Pamanyuma ŵakamba kusopa ŵachiuta ngoza ŵawo.

⁷ŴaIsraele ŵakachita chinthu chiheni panthazi pa FUMU. Iwo ŵakaruwa FUMU, Chiuta wawo ndipo ŵakateŵetera chiuta Baala na ŵaAshera.

⁸Ntheura FUMU yikaŵakwiyira chomene ŵaIsraele ndipo yikaŵapereka mu woko la Kushani Rishatayimu, karonga wa charu cha Mesopotamiya. Ntheura ŵaIsraele ŵakawa pasi pa Kushani Rishatayimu virimika vinkhonde na vitatu.

⁹Kweni para ŵaIsraele ŵakalirira kwa FUMU, iyo yikaŵamikira muthaski zina lakhe Otiniyele, mwana wa Kenazi munung'una wa Kalebu, mweneuyo wakaŵathaska.

¹⁰Mzimu wa FUMU wakiza pa iyo. Ntheura wakazgoka kuŵa mweruzgi wa charu cha Israele. Iyo wakaruta kuya karwa nkhondo na Kushani Rishatayimu, karonga wa Mesopotamiya ndipo FUMU yikamupereka mu mawoko gha Otiniyele mweneuyo wakamuthereska Kushani Rishatayimu, karonga wa ku Mesopotamiya, ndipo iyo wakamutonda Kushani Rishatayimu.

¹¹Ntheura mukaŵa mutende mu charu virimika 40. Pamanyuma pakhe Otiniyele mwana wa Kenazi wakafwa.

¹²ŴaIsraele ŵakachitaso uheni panthazi pa FUMU. Sono FUMU yikamupa nkhongono Egiloni karonga wa charu cha Mowabu kuti warwe nkhondo na ŵaIsraele, chifukwa ŵakachita uheni panthazi pa FUMU.

¹³Egiloni wakachemerapo ŵaAmoni na ŵaAmaleki kuti ŵaŵe pamoza nayo ndipo ŵakaruta kuya karwa na ŵaIsraele. Egiloni wakaŵathereska ŵaIsraele ndipo wakapoka Yeriko msumba wa Mikama.

¹⁴Ntheura ŵaIsraele ŵakateŵetera Egiloni, karonga wa ku Mowabu virimika 18.

¹⁵Para ŵaIsraele ŵakalirira kwa FUMU, iyo yikaŵamikira Ehudi, mwana wa Gera, muBenjamini, kuti waŵathaske. Ehudi wakaŵa wa woko la luzere. ŴaIsraele ŵakatumanga mithulo kwa Egiloni karonga wa ku Mowabu kwizira mwa iyo.

¹⁶Sono Ehudi wakajifulira lupanga lwa uyi kosekose, utali wakhe masentimita 50. Wakalukakilira ku chigha chakhe cha ku maryero mukati mu vyakuvwara vyakhe.

¹⁷Wakaruta kuya kapereka mithulo kwa Egiloni karonga wa ku Mowabu mweneuyo wakaŵa munthu wakututuŵa chomene.

¹⁸Ehudi wakati wapereka mithulo wakaŵawezga ŵanthu awo ŵakayegha mithulo yira.

¹⁹Kweni iyomwene wakawerera pa mawe gha vikozgo vyakuŵaja pafupi na Giligala kuruta ku Egiloni ndipo wakati wafika wakati, “Ndili na mazgu gha chisisi na imwe Karonga.” Karonga yura wakati, “Chetama!” Penepapo ŵateŵeti ŵakhe wose ŵakawukapo panthazi pakhe.

²⁰Sono Ehudi wakasenderera pafupi na Karonga apo wakakhara yekha mu chipinda chakhe cha pachanya umo mukaŵa tumphepo tuweme. Ehudi wakati, “Ndili na uthenga kufumira kwa Chiuta wakuti ndimuphalirani.” Ndipo Egiloni wakawuka pa chitengo chakhe.

²¹Ehudi wakatora lupanga ku chigha chakhe cha maryero na woko lakhe la mazere, na kumugwaza pa nthumbo.

²²Luti lwa lupanga nalo lukanjira ndipo uyi wa lupanga ukaŵa na mafuta pera chifukwa kuti wakakhura lupanga mu nthumbo yakhe chara. Ndipo viheni vya mukati vikafuma.

²³Ehudi wakafumira pa khonde ndipo wakajara vijaro vya chipinda cha pachanya na kuvikhozga.

²⁴Ehudi wakati waruta, ŵateŵeti ŵakiza. Ŵakati ŵawona kuti vijaro vya chipinda cha pachanya ndi vyakukalika ŵakaghanaghana kuti panji wakujovwira mu chipinda cha tumphepo tuweme chira.

²⁵Iwo ŵakalindizga mpaka apo ŵakasoŵerwa na chakuchita. Kweni para ŵakasanga kuti wakureka kujulako vijaro vya chipinda cha pachanya, ŵakatora kiyi na kujula vijaro ndipo ŵakasanga kuti sekuru wawo wali pasi, wafwa.

²⁶Apo ŵateŵeti ŵara ŵakaŵa ŵachali kuziwurika, Ehudi wakafuma na kuchimbira. Wakiza kajumpha pa mawe gha vikozgo vya kuŵaja vira na kuchimbilira ku Seyira.

²⁷Para wakati wafika, wakalizga mbata mu charu cha mapiri cha Efurayimu kuti wacheme ŵaIsraele ŵarute nayo pamoza kuya karwa nkhondo. Ntheura iyo wakaŵarongozga kufuma mu charu cha mapiri.

²⁸Wakaŵaphalira wakati, “Ndirondezgani pakuti FUMU yapereka ŵaMowabu ŵarwani ŵinu mu mawoko ghinu.” Ntheura ŵakakhira na kumurondezga ndipo ŵakapoka majambuko gha mronga wa Yorodani gha kwambukira ku charu cha Mowabu ndipo kuti ŵakazomerezga munthu na yumoza chara kuti wambukepo.

²⁹Panyengo iyo ŵakakomapo ŵaMowabu pafupi 10,000. Ŵanthu wose awo ŵakakomeka ŵakaŵa ŵankhongono na ŵakumanya kurwa nkhondo. Kukaŵavye na yumoza wakaponapo.

³⁰Ntheura charu cha Mowabu chikathereskeka zuŵa lira na kuwa pasi pa ŵaIsraele. Ndipo charu cha Israele chikaŵa mu mutende virimika 80.

³¹Pamanyuma pa Ehudi pakiza Shamugara mwana wa Anati, mweneuyo wakakoma ŵaFilisiti 600 na lunkhanjo lwa goliwoli la ng'ombe. Iyo nayo wakathaska ŵaIsraele.