Read new_tumbuka_bible Ŵeruzgi 4 Bible Online

Ŵeruzgi 4 - new_tumbuka_bible bible

Ŵeruzgi 4

¹Ehudi wakati wafwa, ŵaIsraele ŵakachitaso uheni panthazi pa FUMU.

²Ntheura FUMU yikaŵapereka mu mawoko gha Yabini, karonga wa charu cha Kanani, mweneuyo wakawusiranga mu msumba wa Hazoro. Murongozgi wa ŵasilikari ŵakhe wakaŵa Sisera, wakakharanga mu Harosheti Hagoyimu.

³Sisera wakaŵa na magareta gha visulo 900 ndipo wakaŵatindiŵizgira pasi ŵaIsraele mwankhaza pa virimika 20. Ntheura ŵaIsraele ŵakalira kwa FUMU kuti yiŵawovwire.

⁴Pa nyengo yira Debora nchimi yanakazi, muwoli wa Lapidoti, ndiyo wakarongozganga ŵaIsraele nga ndi mweruzgi.

⁵Iyo wakazgoŵera kukhara musi mu khuni la mukama wa Debora pakati pa msumba wa Rama na Betele mu charu cha mapiri cha Efurayimu. ŴaIsraele ŵakarutanga kwa iyo kuti waŵayeruzgire mirandu yawo.

⁶Debora wakatuma munthu kuya kachema Baraki mwana wa Abinowamu wa ku msumba wa Kedeshi mu charu cha Nafutali. Baraki wakati wiza, Debora wakamuphalira kuti, “FUMU, Chiuta wa Israele wakukulangula kuti, ‘Ruta, uŵawunjike ŵasilikari ŵako pa Phiri la Taboro, pakutora ŵasilikari 10,000 mu fuko la Nafutali na mu fuko la Zebuloni.

⁷Ine nditi ndimukhuŵirizge Sisera, murongozgi wa ŵasilikari ŵa Karonga Yabini, kuti wizakarwe nkhondo na imwe ku mronga wa Kishoni, na magareta ghakhe na viwuru vyakhe vya nkhondo, ndipo nditi ndimupereke mu mawoko ghako.’ ”

⁸Baraki wakazgora wakati, “Nditi ndirute usange iwe uti urute nane, kweni usange urutengeko chara, ine nane kuti nditi ndirutengeko chara.”

⁹Debora wakati, “Nadi nditi ndirute nawe. Ndipouli ulendo uwu kuti upokerengepo nchindi chara, chifukwa FUMU yamkupereka Sisera mu mawoko gha mwanakazi.” Penepapo Debora wakaruta ku msumba wa Kedeshi pamoza na Baraki.

¹⁰Baraki wakachema ŵasilikari 10,000 kufuma ku mtundu wa Zebuloni na wa Nafutali kuti warute nayo ku msumba wa Kedeshi. Ŵasilikari ŵara ŵakamurondezga ndipo Debora wakaruta pamoza nayo.

¹¹Sono muKeni munyakhe zina lakhe Hebere wakapatukako ku ŵaKeni ŵanyakhe, ŵeneawo ŵakaŵa ŵa mphapu ya Hobabu, wiskevyara wa Mozesi. Iyo wakajintha hema lakhe pataliko na khuni likuru la musoro pa malo gha Zaananimu pafupi na msumba wa Kedeshi.

¹²Para Sisera wakapulika kuti Baraki mwana wa Abinowamu waruta ku Phiri la Taboro,

¹³Sisera wakawunganya magareta ghakhe 900 gha visulo ghara pamoza na ŵasilikari ŵakhe wose awo ŵakaŵa nayo kufuma ku Harosheti Hagoyimu kufika ku mronga wa Kishoni.

¹⁴Debora wakamuphalira Baraki kuti, “Rutanga! Ili ndi zuŵa leneilo FUMU yaperekera Sisera mu mawoko ghako. Asi FUMU ndiyo yakudangiririra panthazi pako.” Ntheura Baraki wakakhira kufuma pa Phiri la Taboro pamoza na ŵasilikari ŵakhe 10,000 awo ŵakamurondezganga.

¹⁵Para Baraki wakizanga pafupi na ŵasilikari ŵakhe FUMU yikatimbanizga Karonga Sisera pamoza na ŵakwendeska magareta ghakhe ndiposo na ŵasilikari ŵakhe. Sisera pamoza na ŵasilikari ŵakopa chomene mwakuti Sisera wakakhira pa gareta lakhe na kuchimbira waka pasi.

¹⁶Baraki wakaghachimbilira magareta na ŵasilikari ŵa Sisera mpaka ku Harosheti Hagoyimu. Ŵasilikari wose ŵaSisera ŵakakomeka na lupanga ndipo pakaŵavye na yumoza wakupona.

¹⁷Kweni Sisera wakachimbira pasi chomene mpaka wakaya kafika ku hema la Yayele muwoli wa Hebere muKeni, chifukwa pakaŵa mutende pakati pa Yabini Karonga wa ku Hazoro na mbumba ya Heba muKeni.

¹⁸Sono Yayele wakafuma kuti wakumane na Sisera ndipo wakati kwa iyo, “Zaninge, sekuru wane, zaninge kuno kwa ine, rekani kopa.” Ntheura Sisera wakiza kwa iyo na kunjira mu hema ndipo mwanakazi wakamudikiska bulangeti.

¹⁹Sisera wakati kwa mwanakazi yura, “Ndaŵeya, undipeko maji ghachoko waka kuti ndimwe, chifukwa ndomirwa chomene.” Ntheura mwanakazi yura wakajula thumba la chikumba umo mukaŵa mkaka, wakamumweskapo ndipo wakamudikiskaso.

²⁰Sono Sisera wakamuphalira mwanakazi yura kuti, “Wimilire pa muryango wa hema, ndipo para munthu munyakhe wakwiza na kukufumba kuti, ‘Kasi muli munthu umo?’ Iwe umuphalire kuti kulije.”

²¹Kweni Yayele muwoli wa Hebere wakatora kachikhomo ka hema na nyondo mu woko lakhe. Wakenda mwakunyatuka na kuruta kwa Sisera para iyo wakaŵa mu tulo tuzitu chifukwa cha vyakulema. Wakakhomera kachikhomo kara pa musipa wakhe, kakasuka kakasorota na kunjira pasi mu dongo, ntheura iyo wakafwa.

²²Apo Baraki wakati wafika pakumuchimbilira Sisera, Yayele wakafuma kuya kakumana nayo ndipo wakati kwa iyo, “Zaninge. Nditi ndimurongoraninge munthu uyo mukupenja.” Ntheura Baraki wakanjira mu hema la mwanakazi yura, ndipo wakasanga kuti Sisera wagona pasi wakufwa, na kachikhomo ka hema kali pa mutu wakhe.

²³Ntheura pa zuŵa lira Chiuta wakathereska Yabini karonga wa ku Kanani panthazi pa ŵaIsraele.

²⁴Ndipo ŵaIsraele ŵakarutilira kuŵa ŵankhongono kuruska Yabini karonga wa ŵaKanani, wakasuka wakamalirathu nkhanira.