Read new_tumbuka_bible Ŵeruzgi 5 Bible Online

Ŵeruzgi 5 - new_tumbuka_bible bible

Ŵeruzgi 5

¹Pa zuŵa lenelira nkhondo yikati yamara Debora na Baraki mwana wa Abinowamu ŵakimba sumu iyi ŵakati:

²Rumbani FUMU pakuti ŵarongozgi ŵa charu cha Israele ndiwo ŵarongozga pa nkhondo. Ndipo ŵanthu nawo ŵajipereka na mtima wose.

³Pulikani imwe mwa ŵakaronga, tegherezgani, imwe ŵakuwusa. Ine nditi ndimbe sumu kwimbira FUMU, Chiuta wa Israele.

⁴Mwe FUMU, para mukafumanga mu mapiri gha Edomu, apo mukendanga kufuma mu charu cha Edomu, charu cha pasi chikatenthema. Nadi, maji ghakathika kufuma mu maŵingu.

⁵Mapiri ghakasunkhunyika panthazi pa FUMU. Nanga ndi Phiri la Sinayi nalo likasunkhunyika panthazi pa FUMU, Chiuta wa Israele.

⁶Mu mazuŵa gha Shamugara, mwana wa Anati, mu mazuŵa gha Yayele, mu misewu mukaŵavye ŵanthu, ndipo ŵanthu ŵa pa ulendo ŵakendanga mu tunthowa tunyakhe.

⁷Ŵanthu mukaŵavye mu mizi, mukaŵavye mpaka apo iwe Debora ukiza, nga ndi nyinawo mu Israele

⁸Para ŵaIsraele ŵakasora kusopa ŵachiuta ngoza mukaŵa nkhondo mu charu. Mukati mu ŵanthu 40,000 ŵa muIsraele. Kasi ndi njani uyo wakatorapo chiskango panji mukondo.

⁹Mtima wane uli pamoza na ŵarongozgi ŵasilikari ŵa mu Israele, uli ku ŵanthu awo ŵakajipereka na mtima wose. Rumbani FUMU!

¹⁰Pharani ichi, imwe mukugara pa mbunda zituŵa, imwe mukukhara pa vyakulipwitika vya mtengo wapatali ndiposo na imwe mukwenda mu zinthowa.

¹¹Pulikani mazgu gha awo ŵakwimba pa visimi vya maji, penepapo ŵakukoŵera mu kwimba pakuvivya kwa FUMU na kuvivya kwa vinkhara vyakhe mu Israele. Penepapo ŵanthu ŵa FUMU, ŵakakhira kwendera vipata vya msumba.

¹²Iwo ŵakati, “Wuka, wuka, iwe Debora! Wuka, wuka, uyimbe sumu! Wukira muchanya, iwe Baraki, mwana wa Abinowamu, urongozge ŵazga ŵako.

¹³Penepapo ŵanthu ŵakugomezga awo ŵakakharako ŵakiza ku ŵarongozgi ŵawo, ŵanthu ŵa FUMU ŵakiza kwa ine kuti ŵarwe nkhondo, kulimbana na ŵankhongono.

¹⁴Ŵasilikari ŵanyakhe ŵakafumira ku fuko la Efurayimu uko pakudanga kukakharanga ŵaAmaleki. Ŵanyakhe ŵakafumira ku fuko la Benjamini. Ŵarongozgi ŵasilikari ŵakafumira ku fuko la Makiri ndipo ŵakukorera ndodo ya murongozgi murara wa nkhondo ŵakafumira ku fuko la Zebuloni.

¹⁵Awo ŵakuwusa ŵa fuko la Isakara wakiza pamoza na Debora. Nadi ŵanthu ŵakugomezgeka ŵa fuko la Isakara ŵakiza na Baraki, ŵakamurondezga pakumuchimbilira mpaka ku chidika. Kweni ŵa fuko la Rubeni ŵakagaŵikana chomene mu maghanoghano kuti wakachimanya icho ŵakenera kuchita chara.

¹⁶Mukachedwerangachi pakukhalira kwenekuko mu vitupa vya mberere, kuti mupulikenge tufyoliro twakulizgira mberere? Mu ŵanthu ŵa fuko la Rubeni ŵakagaŵikana chomene mu maghanoghano. Kuti ŵakachimanya icho ŵakenera kuchita chara.

¹⁷ŴaGileyadi ŵakakhara ku sirya linyakhe la mronga wa Yorodani. Kasi ŵaDani ŵakakhalirachi pamoza na ngaraŵa? ŴaAshere ŵakakhalira mu mphepete mwa nyanja, ŵakakhara waka mu madowoko ghawo.

¹⁸ŴaZebuloni ndi fuko ilo likaŵika umoyo wawo mu urwani wa nyifwa. ŴaNafutali nawo ŵakaŵika umoyo wawo mu urwani para wakarwanga nkhondo pachanya pa mapiri.”

¹⁹Ŵakaronga ŵa charu cha Kanani ŵakiza na kurwa nkhondo na ise. Ŵakaronga ŵa ku Kanani nawo ŵakarwa nkhondo, ku Taanaki mu mphepete mwa maji gha pa Megido. Iwo kuti ŵakaskoghamo siliva chara.

²⁰Nyenyezi nazo zikarwanga nkhondo kufumira kuchanya, zikarwanga nkhondo na Sisera apo zikendanga mu nthowa zawo mu mlengalenga.

²¹Mwezga wa mronga wa Kishoni ukaŵa kukura ŵarwani, Nadi mronga wa kale wa Kishoni ukaŵakukura mwa nkhongono. Wa mzimu wane, yendanga na nkhongono.

²²Sono vikandiro vya mahachi ŵa Sisera vikapulikikwa chomene. Mahachi ghakachirifukanga chomene kuchimbira mwa nkhongono.

²³“Mungelo wa FUMU wakuti, muzi wa Merozi muwutembe. Ŵanthu awo ŵakukhara mwenemumo, nawo ŵatembeke chomene chifukwa ŵakareka kwiza kovwira FUMU, pakurwa nkhondo na ŵarwani ŵakhe ŵankhongono.”

²⁴Watumbikike chomene ndi Yayele muwoli wa Hebere muKeni, mweneuyo ngwa kutumbikika chomene kuruska ŵanakazi awo ŵakukhara mu mahema.

²⁵Sisera wakaromba maji ghakumwa, kweni Yayele wakamupa mkaka. Wakamutoreraso mkaka wakukhoma mu bakule uyo ŵakumwerapo ŵanthu ŵakuzirwa.

²⁶Wakatora chikhomo cha hema mu woko lakhe, ndipo wakatora nyondo na woko lakhe la maryero. Wakamutimba chomene Sisera, na kuswa mutu wakhe. Wakamuphwanya ku mutu na kumudorora pa musipa wakhe.

²⁷Sisera wakati wawuke penepapo wakabwanthuka na kuwa. Wakathambalala penepara chete pasi pa malundi gha Yayele. Wakabwanthuka nadi pa malundi gha mwanakazi na kuwa. Apo wakabwanthukira, penepapo ndipo wakafwira.

²⁸Nyina wa Sisera wakalingizga pa dangazi, wakalingizga na kuyowoya kuti, “Kasi nchifukwa uli gareta lakhe lachedwa kwiza? Chifukwa uli kupoma kwa mahachi ghakhe ngakuziwulika?”

²⁹Yumoza wa ŵanakazi ŵakhe ŵamahara chomene ŵakamuzgora, nadi, wakayowoyanga kwa iyomwene kaŵirikaŵiri,

³⁰“Asi ŵakupenja na kugaŵana ivyo ŵakaskogha? Ŵakugaŵira munthu waliyose, mwali yumoza panji ŵaŵiri. Ŵakumugaŵira Sisera vyakuskogha vya salu za maŵangamaŵanga. Vyakuroŵa vya salu zakupeta na uzi, salu ziŵiri za maŵangamaŵanga zakutowa na uzi kuti ndijivwarike pa singo nga vyakuskogha.”

³¹Ntheura ndimo ŵamalirenge ŵarwani ŵinu wose, Mwe FUMU. Kweni awo ŵakumutemwani ŵaŵalenge nga ndi dazi para likufuma na nkhongono zakhe. Ndipo charu chikaŵa mu mutende virimika 40.