Read new_tumbuka_bible Ŵeruzgi 6 Bible Online

Ŵeruzgi 6 - new_tumbuka_bible bible

Ŵeruzgi 6

¹ŴaIsraele wakachita icho chikaŵa chiheni panthazi pa FUMU. Ntheura FUMU yikaŵapereka mu mawoko gha ŵaMidiyani virimika vinkhonde na viŵiri kuti waŵawusenge.

²ŴaMidiyani ŵakaŵa ŵankhongono mwakuti ŵakaŵanyekezganga chomene ŵaIsraele. Pa chifukwa ichi, ŵaIsraele ŵakajinozgera malo ghakubisamamo mu mapiri nga ndi mu michembo na zimphanji ndiposo ŵakazenga malinga.

³Nyengo yose para ŵaIsraele ŵapanda waka mbuto zawo, ŵaMidiyani na ŵaAmaleki ndiposo na ŵanthu ŵa ku mafumiro gha dazi, ŵakizanga kwiza karwa nawo nkhondo.

⁴Iwo ŵakazenganga misasa mu charu cha ŵaIsraele na kunanga vyakurya vya mu minda yawo kuya kafika ku Gaza. Kuti ŵakareka kalikose kanthu mu charu cha Israele chara ako ŵangarya. Ŵakaŵapoka mberere, panji ng'ombe panji mbunda.

⁵ŴaMidiyani ŵakizanga pamoza na ng'ombe zawo na mahema ghawo. Ŵakizanga ŵanandi nga ndi zombe. Iwo ŵekha pamoza na ngamila zawo vikaŵa vinandi, vyambula mapendeko. Ntheura ŵakasakaza charu apo ŵakanjiranga waka.

⁶ŴaMidiyani ŵakachikavuska chomene charu cha Israele. Ntheura ŵaIsraele ŵakalira kwa FUMU kuti yiŵawovwire.

⁷Para ŵaIsraele ŵakalira kwa FUMU chifukwa cha ŵaMidiyani,

⁸FUMU yikaŵatumira nchimi yeneiyo yikaŵaphalira kuti, “FUMU, Chiuta wa Israele wakuti, ‘Ine ndine nkhamurongozgani para mukafumanga mu Eguputo, pakumufumiskani mu charu cha uzga.

⁹Ine ndine nkhamuthaskani mu woko la ŵaEguputo na ku wose awo ŵakamusuzganinge. Nkhaŵachimbizga panthazi pinu ndipo nkhapereka kwa imwe charu chawo.

¹⁰Nkhamuphalirani kuti ine ndine FUMU, Chiuta winu. Ine nkhamukanizgani kulambira ŵachiuta ŵa ŵaAmori ŵeneawo mukukhara mu charu chawo. Kweni imwe mukakana kupulikira mazgu ghane.’ ”

¹¹Zuŵa limoza mungelo wa FUMU wakiza ku msumba wa Ofura na kukhara musi mu khuni la musoro, leneilo likaŵa la Yowashi wa fuko la Abiyezere. Pa nyengo iyi mwana wakhe Gidiyoni wakapetanga tirigu mu chakukamiramo vinyo kuti wajibise ku ŵaMidiyani.

¹²Ndipo mungelo wa FUMU wakamuwonekera na kumuphalira kuti, “FUMU yili nawe, iwe wa munthu wankhongono na wa chikanga!”

¹³Gidiyoni wakati kwa mungelo, “Ndaŵeya sekuru wane, usange FUMU yili nase, kasi nchifukwa uli sono vyose ivi vikatiwira? Ndipo yilinkhu milimo yakhe yose ya kuzizwiska iyo ŵasekuru ŵithu ŵakatiphaliranga kuti FUMU ndi iyo yikatiyeghera ise kuno kufuma mu Eguputo? Kweni sono FUMU yatitaya na kutipereka ku woko la ŵaMidiyani.”

¹⁴Ndipo FUMU yikazgokera kwa iyo yikati, “Ruta na nkhongono zako izo uli nazo ukaŵathaske ŵaIsraele ku ŵaMidiyani. Asi ine ndine nkhukutuma?”

¹⁵Sono Gidiyoni ŵakamuzgora wakati, “Ndaŵeya FUMU, kasi ndingathaska uli ŵa Israele? Nyumba yakwithu ndiyo njambula nkhongono chomene mu fuko la Manase. Ndipo ine ndine muchoko chomene mu mbumba yakwithu.”

¹⁶FUMU yikamuzgora yikati, “Ine ndamkuŵa nawe, ndipo ŵamkuŵathereska ŵaMidiyani wose nga ndi para ukuthereska munthu yumoza.”

¹⁷Penepapo Gidiyoni wakati, “Usange sono mwakondwa nane nadi, ipo mundirongore chimanyikwiro chakuti ndimwe nadi FUMU mukuyowoya nane.

¹⁸Ndaŵeya, mureke kufumapo pano, ndisuke ndize na chawanangwa chane cha chakurya. FUMU yikati, ‘Nditi ndilindilire usuke ukawere.’ ”

¹⁹Penepapo Gidiyoni wakanjira mu nyumba yakhe ndipo wakakoma na kuphika kana ka mbuzi na chingwa chipapati chambula chirungo cha ufu wakukwana debe limoza. Wakaŵika nyama mu chidunga ndipo musuni wakaŵika mu chiŵiya, ndipo wakiza navyo na kuvipereka kwa mungelo wa FUMU musi mwa khuni lira la musoro.

²⁰Mungelo wa FUMU wakati, kwa Gidiyoni “Tora nyama na vingwa vipapati vyambula chirungo ndipo uviŵike pa jarawe ili, pamanyuma uthirepo musuni.” Gidiyoni wakachita ntheura.

²¹Sono mungelo wa FUMU wakanyoroska ndodo iyo yikaŵa mu woko lakhe ndipo na songo ya ndodo yira wakakhwaska nyama na vingwa vipapati vyambula chirungo. Penepapo moto ukabuka kufuma pa jarawe ndipo ukamyangura nyama yira pamoza na vingwa vipapati vira. Penepapo mungelo wa FUMU wakazgeŵerekera waka, kuti wakamuwonaso chara.

²²Sono Gidiyoni wakapanikizga kuti wakaŵa nadi mungelo wa FUMU ndipo wakati, “Okwe, Mwe FUMU Chiuta! Sono ndawona mungelo wa FUMU na maso ghane.”

²³Kweni FUMU yikati kwa iyo, “Mutende uŵe nawe. Ungopanga, utifwenge chara.”

²⁴Ndipo Gidiyoni wakayizengera FUMU jochero pa malo gheneghara na kulithya kuti, “FUMU ndi mutende.” Jochero ili lichali waka mu msumba wa Ofura weneuwo ngwa fuko la ŵaAbiyezere na sono wuwo.

²⁵Usiku wenewura FUMU yikati kwa Gidiyoni, “Tora nkhambako ya chiŵiri ya ŵawuso yeneiyo yili na virimika vinkhonde na viŵiri. Ubwangandulire pasi jochero la chiuta Baala ilo ŵawuso wali nalo, ndipo uwiskire pasi chikozgo cha Ashera icho chili pafupi na jochero.

²⁶Uzenge jochero la kuperekerapo sembe kwa FUMU, Chiuta wako pachanya pa linga apa na mawe ghakuŵikika makora ghene. Sono utore nkhambako yira na kuyipereka kuŵa sembe yakocha pakugwiriska nchito nkhuni za chikozgo cha Ashera icho udumulenge.”

²⁷Ntheura Gidiyoni wakatorapo ŵanthu khumi mukati mu ŵateŵeti ŵakhe na kuchita nga ndi umo FUMU yikamulangulira. Sono pakuti wakopanga chomene ŵa mu mbumba yakwakhe na ŵanthu ŵa mu muzi kuti ŵakachita na muhanya chara kweni wakachita na usiku.

²⁸Para ŵanthu ŵa mu muzi ŵakawuka na macherochero, ŵakawona kuti jochero la chiuta Baala ndakubwanganduka, ndipo chikozgo cha Ashera icho chikaŵa pafupi na jochero ŵachidumulira pasi. Ŵakawona jochero liphya ilo likazengeka ndipo nkhambako yaperekeka ku sembe.

²⁹Ŵakafumbana ŵakati, “Kasi ndi njani wachita ichi?” Ŵakati ŵapenjerera na kufumbilira ŵakaphalirika kuti Gidiyoni mwana wa Yowashi ndiyo wachita chinthu ichi.

³⁰Penepapo ŵanthu ŵa mu muzi ŵakati kwa Yowashi, “Umufumiskire kuno mwana wako kuti wakomeke, chifukwa wabwangandulira pasi jochero la chiuta Baala ndipo wadumulira pasi chikozgo cha Ashera icho chikaŵa pafupi na Jochero.”

³¹Kweni Yowashi wakaŵaphalira awo ŵakimikana nayo kumuzingirizga wakati, “Kasi ndimwe mumurwerenge chiuta Baala? Panji kasi ndimwe mukukhumba kuti mumuvikirire? Yose uyo wakukhumba kumurwera wati wakomeke kuchali kundache. Usange iyo ndi chiuta, murekani wajirwere yekha nkhondo, pakuti jochero lakhe labwangandulikira pasi.”

³²Ndicho chifukwa pa zuŵa lira Gidiyoni wakathyika zina lakuti Yerubu Baala, ndiko kuti, “Murekani Baala warwe nayo,” chifukwa wakabwangandulira pasi jochero lakhe.

³³Penepapo ŵaMidiyani wose na ŵaAmaleki wose ndiposo na ŵanthu ŵa ku mafumiro gha dazi ŵakawungana pamoza, ndipo ŵakati ŵambuka mronga wa Yorodani, ŵakazenga misasa ya nkhondo mu Dambo la Yezireyele.

³⁴Kweni Mzimu wa FUMU wakanjira mwa Gidiyoni. Ntheura Gidiyoni wakalizga mbata, ndipo ŵa fuko la Abiyezere ŵakachemeka kuti ŵamurondezge.

³⁵Wakatuma nthumi mu charu chose cha Manase kuŵachema kuti nawo ŵamurondezge. Ŵakatumaso zinthumi kuti zikacheme ŵa fuko la Ashere, la Zebuloni na la Nafutali kuti nawo ŵize ŵarwe nkhondo pamoza nawo.

³⁶Gidiyoni wakati kwa Chiuta, “Usange nadi muti muthaske ŵaIsraele kwizira mwa ine, nga ndi umo mwayowoyera,

³⁷sono ine nditi ndiŵike weya wa mberere pa luwugha lwakubulirapo tirigu. Usange paŵenge jumi pa weya pera, ndipo pasi pose paŵe pomizo, nditi ndipanikizge kuti mwanozgeka kuthaska Israele kwizira mwa ine nga ndi umo mwayowoyera.”

³⁸Ndipo kukaŵa nadi ntheura. Para Gidiyoni wakawuka na mulenje machero ghanyakhe wakakama weya ura wakafumyamo jumi linandi mu weya mwakuti bakule wakazura na maji.

³⁹Ntheura Gidiyoni wakati kwa Chiuta, “Ukari winu ureke kugolera pa ine. Rekani ndiyowoye kamoza pera. Ndaŵeya, mundizomerezge kuti ndiyezge kamoza pera na weya uwu. Sono weya uwu wekha uŵe womizo ndipo pasi pose paŵe jumi.”

⁴⁰Chiuta wakachita ntheura usiku ura. Weya pera ukaŵa womizo ndipo pasi pose pakaŵa jumi.