Read new_tumbuka_bible Ŵeruzgi 7 Bible Online

Ŵeruzgi 7 - new_tumbuka_bible bible

Ŵeruzgi 7

¹Ntheura Yerubu Baala (uyo ndi Gidiyoni) na ŵasilikari wose awo ŵakaŵa nayo, ŵakawuka na macherochero na kuzenga misasa pafupi na chisimi icho chikuchemekanga kuti Harodi. Msasa wa ŵaMidiyani ukaŵa ku mpoto kwawo mu chidika musi mwa Phiri la More.

²FUMU yikati kwa Gidiyoni, “Ŵasilikari awo ŵali na iwe mbanandi chomene kwa ine, kuti ndipereke ŵaMidiyani mu woko lawo. Mzire ŵaIsraele ŵajikuzgirepo na pakuyowoya kuti, ‘Tajithaska na nkhongono zithu.’ Kwambula kupanikizga kuti ine ndine ndaŵathaska.

³Ntheura sono chemerezga mwakuti ŵanthu ŵapulike kuti yose uyo wakopa ndipo wakutenthema chifukwa cha wofi wawerere ku nyumba yakhe, wawukeko kuno ku Phiri la Gileyadi.” Penepapo ŵasilikari 22,000 ŵakawera ndipo ŵasilikari 10,000 ndipo ŵakakharapo na Gidiyoni.

⁴Sono FUMU yikati kwa Gidiyoni, “Ŵasilikari ŵachali ŵanandi chomene. Uŵatorere uko kuli maji ndipo ine ndine ndamkukuwuskiramo ŵasilikari ŵeneawo kwenekura. Uyo ndamkumuyowoyera ndayowoya kuti munthu uyu ndiyo warute nawe, mweneuyo ndiyo wamkuruta nawe. Uyo ndamkukuyowoyera kuti, ‘Munthu uyu wareke kuruta nawe,’ kuti wamkuruta nawe chara.”

⁵Ntheura Gidiyoni ŵakaŵatorera ŵasilikari ŵara uko kukaŵa maji. FUMU yikati kwa Gidiyoni, “Wose awo ŵakukapizga maji na lulimi nga ndi umo ncheŵe yikukapizgira, uŵaŵike pa dera. Wose awo ŵakujikama pakumwa nawo uŵaŵike pa ŵekha.”

⁶Ŵanthu awo ŵakakapizga pakuŵika mawoko ghawo ku mlomo ŵakakwana 300. Ŵanthu ŵanyakhe wose ŵakajikama pakumwa maji.

⁷Sono FUMU yikati kwa Gidiyoni, “Na ŵasilikari 300 ŵeneawo ŵakakapizga waka pakumwa maji, nditi ndimuthaskani imwe na kupereka ŵaMidiyani mu mawoko ghinu. Kweni ŵanyakhe wose uŵareke ŵawerenge, waliyose ku chikaya chakhe.”

⁸Penepapo Gidiyoni wakaŵawezga ku mahema ghawo ŵaIsraele ŵanyakhe wose ndipo wakakhara na ŵasilikari 300, ŵeneawo ŵakatoraso na vyakurya na mbata kufuma ku awo ŵakawera. Misasa ya ŵaMidiyani yikaŵa musi mwawo mu dambo.

⁹Usiku wenewura FUMU yikamulangula Gidiyoni yikati, “Wuka, ruta uwurotokere msasa wa ŵaMidiyani, chifukwa ndaupereka mu woko lako.

¹⁰Kweni usange ukopa kurutako, urute na Pura muteŵeti wako.

¹¹Wamkupulika ivyo ŵakuyowoya, pamanyuma wamkukhwimiskika na kuwu msasa ura.” Gidiyoni wakaruta na Pura muteŵeti wakhe ku umaliro wa msasa kwenekuko kukaŵa ŵasilikari ŵa Midiyani.

¹²ŴaMidiyani na ŵaAmaleki pamoza na ŵanthu wose ŵa ku mafumiro gha dazi ŵakati ngundangunda ŵagona mu chidika unandi nga ndi zombe. Ŵangamila ŵawo ŵakaŵa ŵambula mapendeko unandi nga ndi muchenga uwo uli mu mphepete mwa nyanja.

¹³Para Gidiyoni wakafika ku malo ghara wakapulika musilikari yumoza wakumuphalira munyakhe maloto ghakhe. Iyo wakati, “Ine ndalota maloto. Ndanguwona kachingwa kapapati ka nyauti kangukunkhulira pa msasa wa ŵaMidiyani mpaka kangufika pa hema linyakhe ndipo kangutimba hema lira. Ntheura langubwanganduka na kuwa pasi skee.”

¹⁴Musilikari munyakhe yura wakazgora wakati, “Ichi kuti nchinyakhe chara kweni ndi nkhondo ya Gidiyoni, mwana wa Yowashi, muIsraele. Chiuta wapereka ŵaMidiyani pamoza na ŵasilikari wose mu woko lakhe!”

¹⁵Para Gidiyoni wakapulika maloto na kang'anamuliro kakhe, wakarumba Chiuta. Wakawerera ku msasa wa ŵaIsraele ndipo wakati, “Wukani chifukwa FUMU yapereka ŵasilikari ŵaMidiyani mu mawoko ghinu.”

¹⁶Wakaŵagaŵa ŵasilikari ŵara 300 mu mipingo yitatu na kuŵapa mu mawoko ghawo zimbata na viŵiya mwenemumo mukaŵa vyenje vya moto.

¹⁷Iyo wakati kwa iwo, “Mulaŵiskenge kwa ine, ndipo namwe muchitenge ntheura pera. Para ndafika pa umaliro wa msasa wa ŵaMidiyani, muchitenge icho ine nditi ndichete.

¹⁸Para ine pamoza na wose awo ŵali nane, tikulizga mbata namweso mulizgenge zimbata ku dera lose la msasa ndipo muchemerezgenge kuti, ‘Tili pamoza na FUMU na Gidiyoni.’ ”

¹⁹Ntheura Gidiyoni na ŵasilikari 100 ŵara awo ŵakaŵa nayo ŵakafika ku umaliro wa msasa wa ŵaMidiyani pakati pa usiku, ŵalinda ŵati ŵasinthana waka na ŵanyawo. Ntheura ŵakalizga mbata na kuswa viŵiya ivyo vikaŵa mu mawoko ghawo.

²⁰Mipingo yinyakhe yiŵiri ya ŵasilikari ŵa Gidiyoni nawo ŵakalizga mbata zawo na kuswa viŵiya ivyo vikaŵa na nyenje mu mawoko ghawo gha mazere ndipo mu mawoko ghawo gha maryero ŵakakorera mbata zakulizga. Ŵakachemerezga ŵakati, “Lupanga lwa FUMU na lwa Gidiyoni!”

²¹Musilikari waliyose wa Israele wakimilira pa malo ghakhe kuzingirizga msasa wa ŵaMidiyani ndipo ŵaMidiyani ŵakamba kuchimbira uku ŵakulira mwakuchemerezga.

²²Para ŵakalizga mbata zawo 300 zira, FUMU yikaŵatimbanizga ŵaMidiyani kuti ŵakomane ŵekha mu misasa yawo yose ya ŵasilikari. Sono ŵasilikari ŵara ŵakachimbira ku Beti Shita kurazga ku Zerera mpaka ŵakafika ku mphaka za Abelu Mehola pafupi na Tabati.

²³ŴaIsraele ŵakachemeka kufuma mu fuko la Nafutali, la Ashere na ŵa fuko la Manase ŵakachemeka kuti ŵachimbilirire ŵaMidiyani.

²⁴Gidiyoni wakatuma nthumi mu charu chose cha mapiri cha Efurayimu kukaŵaphalira kuti, “Zaninge tirwe nkhondo na ŵaMidiyani, ndipo mupoke malo ghawo gha maji gha mu mronga wa Yorodani kuya kafika ku Beti Bara kuti ŵareke kwambuka.” Ntheura ŵaEfurayimu wose ŵakawungana ndipo ŵakapoka malo ghose gha mu mronga wa Yorodani mpaka ku Beti Bara.

²⁵Ŵakatora nduna ziŵiri za ŵaMidiyani, Orebu na Zeyebu apo wakaŵachimbizganga ŵaMidiyani. Orebu ŵakamukomera pa jarawe la Orebu, ndipo Zeyebu ŵakamukomera pa chakukamiramo vinyo pa Zeyebu. Ŵakiza na mutu wa Orebu na wa Zeyebu kwa Gidiyoni ku sirya linyakhe la mronga wa Yorodani.