Read new_tumbuka_bible Ŵeruzgi 8 Bible Online

Ŵeruzgi 8 - new_tumbuka_bible bible

Ŵeruzgi 8

¹Ŵanthu wa fuko la Efurayimu ŵakamufumba Gidiyoni ŵakati, “Kasi ukachitirachi ntheura kwa ise pakureka kutichema para mukarutanga kuya karwa nkhondo na ŵaMidiyani?” Ntheura ŵakamuchenya chomene.

²Gidiyoni wakaŵazgora wakati, “Kasi icho ndachita ine sono chingayana na icho mwachita imwe? Asi ivyo mwachita imwe ŵa fuko la Efurayimu ndi vikuru kuruska ivyo fuko lane la Abiyezere lachita?

³Chiuta wapereka mu mawoko ghinu nduna za ŵaMidiyani, Orebu na Zeyebu. Kasi ine ndachita chinthu uli chakuyana na icho mwachita imwe?” Wakati wayowoya ntheura ukari wa ŵaEfurayimu ukagowoka.

⁴Gidiyoni pamoza na ŵasilikari 300 awo ŵakaŵa nayo ŵakafika ku mronga wa Yorodani na kumbuka. Nanga ŵakaŵa ŵakuvuka, ndipouli ŵakaŵarondezga ndipera ŵaMidiyani.

⁵Sono wakati wafika ku Sukoti, Gidiyoni wakaromba ŵanthu ŵa mu msumba wakati, “Ndaŵeya, muŵapeko chakurya ŵasilikari aŵa ŵali na ine chifukwa ŵaziya chomene. Ise tikuchimbizga Zeba na Zalimuna, ŵakaronga ŵa ŵaMidiyani.”

⁶Kweni ŵarongozgi ŵa msumba wa Sukoti ŵakati, “Kasi Zeba na Zalimuna wa ŵathereska kale kuti tipereke chakurya ku ŵasilikari ŵako?”

⁷Ndipo Gidiyoni wakati, “Chifukwa cha mazgu agho mwayowoya. Para FUMU yapereka Zeba na Zalimuna mu mawoko ghane, ndizamkumuthibulani na minga ya mu mapopa na mkolankhanga.”

⁸Kufuma ku msumba wa Sukoti Gidiyoni wakaruta ku Penuyele. Nako wakaromba ŵarongozgi kuti ŵamupeko chakurya. Ŵanthu ŵa ku Penuyele nawo ŵakazgora nga ndi umo ŵanthu ŵa ku Sukoti ŵakazgolera.

⁹Penepapo Gidiyoni wakaŵaphalira ŵanthu ŵa ku Penuyele kuti, “Para nkhuwera kufuma kukuvivya ndizamkubwangandula chigongwe ichi.”

¹⁰Pa nyengo iyi Zeba na Zalimuna ŵakaŵa ku Karikoro pamoza na ŵasilikari ŵawo 15,000. Aŵa ndiwo ŵakakharapo pa ŵasilikari wose mwa ŵanthu ŵa ku mafumiro gha dazi pakuti ŵasilikari awo ŵakafwapo ŵakaŵa 120,000 awo ŵakaŵa nkhwantha za nkhondo.

¹¹Gidiyoni wakendera ku nthowa iyo ŵanthu ŵa malonda wakendangamo ya ku mafumiro gha dazi kwa Noba na msumba wa Yogibeha ndipo wakaŵarotokera ŵasilikari chifukwa ŵakaŵa ŵakudeka.

¹²Ŵakaronga ŵaŵiri ŵara ŵaMidiyani, Zeba na Zalimuna ŵakachimbira. Gidiyoni wakaŵachimbilira na kuŵakora. Penepapo ŵasilikari ŵawo wose ŵakofiwa na kutimbanizgika.

¹³Sono Gidiyoni mwana wa Yowashi wakawererako nkhondo yikati yamara pakwendera nthowa ya pa chikwera cha pa Heresi.

¹⁴Wakakora munyamata wa msumba wa Sukoti ndipo wakamufumba munyamata yura mazina gha ŵanthu ŵararaŵarara wa ku Sukoti. Munyamata yura wakamulembera pasi mazina gha ŵarongozgi na ŵararaŵarara ŵa ku Sukoti, ŵeneawo ŵakaŵa 77.

¹⁵Gidiyoni wakafika ku ŵanthu ŵa ku msumba wa Sukoti ndipo wakati kwa iwo, “Wonani Zeba na Zalimuna, ŵeneawo mukandigoskerangapo kuti, kasi Zeba na Zalimuna waŵathereska kale kuti tipereke chakurya ku ŵasilikari ŵako awo vyalema na njara!”

¹⁶Penepapo Gidiyoni wakaŵakora ŵararaŵarara ŵa mu msumba wa Sukoti, ndipo wakatora minga ya mu mapopa na mkolankhanga na kuŵalanga pakuŵathyapula.

¹⁷Ndipo wakabwangandulira pasi chigongwe cha Penuyele na kukoma ŵanthu ŵa mu msumba ura.

¹⁸Sono Gidiyoni wakafumba Zeba na Zalimuna wakati, “Kasi ŵanthu awo mukakoma pa Phiri la Taboro ŵara ŵakawonekanga uli?” Iwo ŵakazgora ŵakati, Ŵakaŵa nga ndimwe, waliyose wa iwo wakawonekanga nga ndi mwana wa Karonga.

¹⁹Ndipo iyo wakaŵaphalira wakati, “Ŵakaŵa ŵana ŵanyane, ŵana ŵa amama. Nkhurapira mwa FUMU kuti murekenge kuŵakoma, mphanyi nane ndangumukomani chara.”

²⁰Penepapo wakamuphalira Yetere mwana wakhe wa uŵere wakati, “Wuka, uŵakome.” Kweni mwana yura kuti wakasorora lupanga lwakhe chara chifukwa wakopanga pakuti wakaŵa muwukirano waka.

²¹Ndipo Zeba na Zalimuna ŵakamuphalira Gidiyoni ŵakati, “Imwe ndimwe mutikome pakuti imwe ndimwe muli na nkhongono za munthu murara.” Ntheura Gidiyoni wakasenderera kufupi na kuŵakoma Zeba na Zalimuna. Wakatora vitowelo ivyo vikaŵa mu singo za ŵangamila ŵawo.

²²Penepapo ŵaIsraele ŵakamuphalira Gidiyoni ŵakati, “Utiwusenge, iwe na mwana wako ndiposo na muzukuru wako wuwo chifukwa ndiwe watithaska ku woko la ŵaMidiyani.”

²³Kweni Gidiyoni wakaŵaphalira wakati “Ine nditi ndimuwusaninge chara ndipo mwana wane nayo wati wamuwusaninge chara. FUMU ndiyo yiti yimuwusaninge.”

²⁴Gidiyoni wakaŵaphaliraso kuti, “Nkhukhumba kumurombani kanthu kamoza. Waliyose wa imwe wandipe ndewerewe izo mwapoka ku ŵarwani ŵinu.” (ŴaMidiyani nga ndi umo ŵakachitiranga ŵakavwaranga ndewerewe za golide.)

²⁵Iwo ŵakazgora ŵakati, “Titi tiperekenge na mtima wose.” Sono ŵakatandika chakuvwara ndipo munthu waliyose wakaponyapo ndewerewe izo wakapoka ku ŵarwani ŵawo.

²⁶Uzitu wa ndewerewe za golide zeneizo wakaromba ukaŵa makilogiramu 20, pa dera pa vitowelo, majuda gha mu singo, na vyakuvwara vichesamu ivyo ŵakaronga ŵa ŵaMidiyani wakavwaranga ndiposo na vikhowa ivyo vikaŵa mu singo za ŵangamila ŵawo.

²⁷Na golide yura Gidiyoni wakapanga efodi wakupenduzgirapo ndipo wakamuŵika mu msumba wakhe wa Ofura. ŴaIsraele wose ŵakareka kusopa Chiuta na kwamba kusopa efodi yura. Ntheura chikazgoka kuŵa musampha kwa Gidiyoni na ku mbumba yakhe.

²⁸Ntheura ndimo ŵaMidiyani ŵakathereskekera panthazi pa ŵaIsraele ndipo kuti wakajikuzgaso chara. Ntheura charu chikaŵa mu mutende virimika 40 mu mazuŵa gha Gidiyoni.

²⁹Yerubu Baala[2] uyo wakaŵa mwana wa Yowashi wakaruta kuya kakhara ku kwakhe.

³⁰Iyo wakababa ŵana 70, pakuti wakatora ŵanakazi ŵanandi.

³¹Muwoli wakhe muchoko uyo wakaŵa mu Shekemu wakamubabiraso mwana ndipo wakamuthya zina lakuti Abimeleki.

³²Gidiyoni mwana wa Yowashi wakafwa munthu muchekuru chomene ndipo wakasungika mu dindi la wiske Yowashi ku Ofura, msumba uwo ukaŵa wa fuko la Abiyezere.

³³Gidiyoni wakati wafwa, ŵaIsraele wakazgokeraso ku uzaghali pakusopa ŵaBaala, ndipo ŵakamuzgora Baala wa Phangano kuŵa chiuta wawo.

³⁴ŴaIsraele kuti ŵakakumbuka FUMU, Chiuta wawo chara, yeneiyo yikaŵathaska ku ŵarwani ŵawo awo ŵakaŵa kosekose.

³⁵Iwo kuti ŵakarongora mtima wa lusungu ku mbumba ya Yerubu Baala, uyo wakaŵa Gidiyoni chara chifukwa cha viweme vyose ivyo wakaŵachitira ŵaIsraele.