Read new_tumbuka_bible Ŵeruzgi 9 Bible Online

Ŵeruzgi 9 - new_tumbuka_bible bible

Ŵeruzgi 9

¹Abimeleki mwana wa Yerubu Baala wakaruta ku msumba wa Shekemu ku ŵabali ŵa anyina ndipo wakaŵaphalira za nyumba yose ya ŵanyina kuti,

²“Fumbani ŵanthu wose ŵa mu Shekemu mwakuti ŵapulike kuti, ‘Kasi chiweme ndi nchi, kuti ŵana wose 70 ŵa Yerubu Baala ŵamuwusaninge, panji kuti yumoza ndiyo wamuwusaninge.’ Mukumbukengeso kuti ine ndili wa ndopa yinu.”

³Ndipo mu malo ghakhe ŵabali ŵa ŵanyina ŵakayowoya mazgu agha ku ŵanthu wose ŵa mu Shekemu kuti ŵapulike. Ndipo mitima ya ŵanthu ŵara yikaŵa pa Abimeleki kuti ndiyo ŵamurondezge chifukwa ŵakati, “Uyu ndi mwana munyithu.”

⁴Ŵakamupa ndarama za siliva 70 zakufuma mu nyumba ya chiuta Baala wa Phangano. Ndarama izi Abimeleki wakalembera nazo ŵanthu ŵawakawaka na ŵambula kupwererako, awo ŵakamurondezga.

⁵Abimeleki pamoza na ŵasilikari ŵakhe ŵakaruta ku nyumba ya ŵawiske ku Ofura ndipo wakaŵakomera pa libwe limoza ŵana ŵanyakhe, ŵana ŵa Yerubu Baala. Kweni Yotamu muchoko wa wose wa ŵana ŵa Yerubu Baala wakapona chifukwa wakabisama.

⁶Sono ŵanthu wose ŵa mu Shekemu ŵakawungana pamoza na awo ŵakukhara ku Beti Milo ŵakaruta pa khuni likuru la musoro pafupi na mzati uwo ŵakasoperangapo mu Shekemu ndipo ŵakamwimika Abimeleki kuŵa karonga.

⁷Yotamu wakati wapulika za makani agha, wakaruta na kwimilira pachanya pa Phiri la Gerizimu ndipo wakachemerezga chomene na kuŵayowoyera kuti, “Pulikani kwa ine, imwe mwa ŵanthu ŵa ku Shekemu mwakuti Chiuta nayo wamupulikani imwe.

⁸Zuŵa limoza makuni ghakaruta kuya kimika karonga kuti yighawusenge. Igho ghakati ku khuni la olive, ‘Tatenge uŵe karonga withu!’

⁹Kweni khuni la olive likakana likati, ‘Ine kuti ndingasida mafuta ghane chara, gheneagho ŵakuchindikira ŵachiuta na ŵanthu, kuti ndirute kuya kawusa makuni.’

¹⁰Ndipo makuni ghara ghakati ku khuni la chikuyu, ‘Zanga uŵe karonga withu.’

¹¹Kweni khuni la chikuyu likazgora likati, ‘Ine kuti ndingasida kanowero kane na vipambi vyane viweme chara, kuti ndirute kuya kawusa makuni?’

¹²Ndipo makuni ghara ghakati ku khuni la mpheska, ‘Zanga uŵe karonga withu.’

¹³Kweni khuni la mpheska likazgora likati, ‘Ine kuti ndingasida vinyo lane leneilo likusanguruska ŵachiuta na ŵanthu chara, kuti ndirute kuya kawusa makuni.’

¹⁴Pa umaliro makuni ghose ghakati ku nthura, ‘Zanga uŵe karonga withu.’

¹⁵Nthura yikati ku makuni ghara, ‘Usange mukukhumba nadi kundimika kuŵa karonga winu, ipo zaninge mwize kabisame mu mufwiri wane. Kweni usange mwareka kuchita ntheura, ipo moto ufume mwa ine na kumyangura makuni ghose gha milanje mu Lebanoni.’ ”

¹⁶Ntheura sono Yotamu wakati, “Kasi mukachitira mu kugomezgeka na mu nchindi, para mukamwimika Abimeleki kuŵa karonga? Ndipo kasi mwamuchitira makora Yerubu Baala na nyumba yakhe kwakuyana na milimo yawo?

¹⁷Ghanaghanani kuti ŵadada ŵakamurwerani, na kunjira mu urwani wakutaya umoyo wawo ndipo ŵakamuthaskani ku woko la ŵaMidiyani?

¹⁸Kweni muhanya uno mwayiwukira nyumba ya ŵadada. Mwakomera pa libwe limoza ŵana ŵawo 70 ndipo mwamwimika Abimeleki, mwana wa muteŵeti-kazi, kuŵa karonga wa ŵanthu ŵa mu Shekemu, chifukwa ndi mubali winu.

¹⁹Sono usange muhanya uno mwachita mu kugomezgeka na mu nchindi kwa Yerubu Baala na nyumba yakhe, ipo kondwaninge mwa Abimeleki ndipo nayoso wakondwenge mwa imwe.

²⁰Kweni usange ndi ntheura chara, ipo moto ufume mwa Abimeleki na kumyangura wose awo ŵakukhara mu Shekemu na awo ŵakukhara ku Beti Milo. Ndiposo moto ufume mu awo ŵakukhara mu Shekemu na mu Bete-milo na kumyangura Abimeleki.”

²¹Penepapo Yotamu wakachimbira na kuruta ku Beyere ndipo wakaya kakhara kwenekura chifukwa chakopa Abimeleki mwana munyakhe.

²²Abimeleki wakaŵawusa ŵaIsraele virimika vitatu.

²³Chiuta wakatuma mzimu uheni pakati pa Abimeleki na ŵanthu ŵa ku Shekemu mwakuti ŵanthu ŵa ku Shekemu ŵakamuwukira Abimeleki.

²⁴Chiuta wakachita ichi mwakuti uheni uwo Abimeleki wakaŵachitira ŵana 70 ŵa Yerubu Baala umuwererere na kutiso mrandu wa ndopa zawo uŵe pa iyo Abimeleki mwana munyawo uyo wakaŵakoma na pa ŵanthu ŵa ku Shekemu, ŵeneawo ŵakamukhuŵirizganga kuti wakome ŵana ŵanyakhe.

²⁵Ŵanthu ŵa ku Shekemu ŵamuwukira Abimeleki ndipo ŵakaŵika ŵanthu pa mapiri kuti ŵamukhazgenge. Iwo ŵakaŵaskoghanga wose awo ŵakajumphangamo mu nthowa yeneiyo. Ndipo Abimeleki wakachipulika ichi.

²⁶Gaala mwana wa Ebedi wakasamira ku msumba wa Shekemu pamoza na ŵabali ŵakhe. Sono ŵanthu ŵa mu Shekemu ŵakamugomezga.

²⁷Ŵanthu mu Shekemu ŵakaruta ku minda na kuponthora mpheska mu minda yawo na kuziponda ndipo ŵakachita chiphikiro mu nyumba ya chiuta wawo. Iwo ŵakarya na kumwa ndipo pamanyuma ŵakamba kumutemba Abimeleki.

²⁸Ndipo Gaala mwana wa Ebedi wakati, “Kasi Abimeleki ndi njani ndipo ise ŵanthu ŵa mu Shekemu ndise ŵanthu ŵa mtundu uli kuti timuteŵeterenge? Asi ndi mwana wa Yerubu Baala ndiposo Zebulu ndiyo nduna yakhe ŵakumuteŵetera. Ise ndise ŵanthu ŵaHamoro uyo wakasanga msumba wa Shekemu? Pali chifukwa uli kuti ise timuteŵeterenge?

²⁹Ŵanthu wa mu msumba uwu ŵaŵenge pasi pa ine mphanyi ndamufumayapo ndipo mphanyi ndamuphalira Abimeleki kuti, ‘Sazgirapo ŵasilikari ŵako ndipo wize tirwe nkhondo na ine.’ ”

³⁰Kweni para Zebulu murongozgi wa msumba wakapulika mazgu gha Gaala mwana wa Ebedi, wakakwiya chomene.

³¹Wakatuma nthumi kwa Abimeleki uyo wakaŵa ku Aruma kuya kamuphalira kuti, “Gaala mwana wa Ebedi na ŵabali ŵakhe ŵiza mu msumba wa Shekemu ndipo ŵakukhuŵirizga ŵanthu ŵa mu msumba kuti ŵimikane namwe.

³²Sono na usiku murute, imwe na ŵasilikari awo muli nawo ndipo mukakhazge mu malo ghakubisika ku minda.

³³Na mulenje para dazi lafuma waka, muwuke luŵiro na kuruta ku msumba kuya karwa nkhondo. Sono para Gaala na ŵanthu awo wali nawo ŵakufuma kwiza karwa namwe nkhondo mungamanya kuŵachitira kwakuyana na mwaŵi uwo mwamkuŵa nawo.”

³⁴Penepapo Abimeleki pamoza na ŵasilikari awo ŵakaŵa nayo ŵakawuka na usiku na kuya kawubuchizga msumba wa Shekemu mu mipingo yinayi ya ŵasilikari.

³⁵Gaala mwana wa Ebedi wakafuma na kuya kimilira pa muryango wa chipata cha msumba. Abimeleki pamoza na ŵasilikari awo ŵakaŵa nayo wakawuka apo ŵakakhazganga.

³⁶Para Gaala wakawona ŵanthu ŵara wakamuphalira Zebulu kuti, “Wona, ŵanthu ŵakukhira kufuma muchanya mu mapiri.” Zebulu wakati kwa iyo, “Ukuwona muzgezge wa mapiri gheneagho ghakuwoneka nga ndi ŵanthu.”

³⁷Gaala wakayowoyaso wakati, “Wona ŵanthu ŵakukhira kufuma pakati pa phiri ndipo mpingo umoza ukwiza kufumira uko kuli khuni la Musoro wa Maula.”

³⁸Penepapo Zebulu wakamufumba wakati, “Uŵereŵesi wako sono uli nkhu apo ukatenge, Kasi Abimeleki ndi njani kuti timuteŵeterenge? Asi aŵa ndiwo ŵanthu ŵeneawo ukaŵa yuyuranga? Fuma sono kuti urwe nawo nkhondo.”

³⁹Gaala wakafuma na kurongozga ŵanthu ŵa msumba wa Shekemu kuti ŵarwe nkhondo na Abimeleki.

⁴⁰Kweni Abimeleki wakamuchimbizga Gaala. Ŵanthu ŵakhe ŵanandi ŵakapwetekeka nthowa yose mpaka pa muryango wa chipata.

⁴¹Abimeleki wakakhara ku Aruma ndipo Zebulu wakamuchimbizga Gaala pamoza na ŵabali ŵakhe kuti wareke kukhara mu msumba wa Shekemu.

⁴²Na machero ghakhe ŵanthu ŵa msumba wa Shekemu ŵakapangana kuruta ku minda ndipo Abimeleki wakaphalirika za ichi.

⁴³Iyo wakatora ŵasilikari ŵakhe na kuŵagaŵa mu mipingo yitatu ndipo ŵakaya kaŵakhazga mu minda. Wakati wawona kuti ŵanthu ŵakufuma mu msumba, wakamba kurwa nawo nkhondo ndipo wakaŵakoma.

⁴⁴Abimeleki na mpingo uwo ukaŵa na iyo ŵakachimbilira kunthazi na kwima pa chipata na msumba apo mipingo yinyakhe yiŵiri yira yikambilira ku awo ŵakaŵa mu minda na kuŵakoma wose.

⁴⁵Abimeleki wakarwa na ŵanthu ŵa mu msumba ura zuŵa lose lira. Wakapoka msumba na kukoma ŵanthu awo ŵakaŵa mwenemumo. Wakawubwangandulirathu msumba na kumijirapo muchere.

⁴⁶Para ŵanthu wose ŵa ku chigongwe cha ku Shekemu ŵakapulika ichi, wakanjira mu linga la nyumba ya chiuta wa phangano.[3]

⁴⁷Abimeleki wakaruta wakaphalirika kuti ŵanthu wose ŵa ku chigongwe cha Shekemu ŵawungana pamoza kwenekura.

⁴⁸Sono Abimeleki wakakwerera ku Phiri la Zalimoni pamoza na ŵasilikari awo ŵakaŵa nayo. Kwenekura wakatora mbavi na kudumulako munthavi wa khuni ndipo wakazinyamura na kuziŵika pa chiŵegha chakhe. Wakaŵaphalira ŵasilikari awo ŵakaŵa nayo wakati, “Icho mwawona ine nkhuchita, namwe muchite cheneicho.”

⁴⁹Ntheura musilikari waliyose wakadumula munthavi wa khuni na kumurondezga Abimeleki ndipo ŵakawunjika pa linga. Ŵakabuska moto pa linga lira uko ŵanthu ŵara ŵali mukati mwakuti wose ŵanarume na ŵanakazi awo ŵakaŵa mu chigongwe cha mu Shekemu chira nawoso ŵakafwa. Pamoza ŵakaŵa pafupi 1,000.

⁵⁰Pamanyuma pa ichi Abimeleki wakaruta ku msumba wa Thebezi. Wakawuzingirizga msumba wa Thebezi pakurwa nawo nkhondo mpaka wakawupoka.

⁵¹Mukati mu msumba ura mukaŵa chigongwe chakukhora. Ŵanthu wose ŵa mu msumba ŵanarume na ŵanakazi ndiposo na ŵarongozgi ŵakachimbilira kwenekura ndipo ŵakajijalira mwenemumo. Ŵakakwera kuya kakhara ku msonjo wa chigongwe.

⁵²Abimeleki wakiza ku chigongwe chira na kulimbana nacho kuti wanjire. Ndipo wakati wasenderera kufupi na muryango wa chigongwe kuti woche na moto,

⁵³kweni mwanakazi yunji wakaponya mwanasko wa lwara pa mutu wa Abimeleki na kuswa bwaza.

⁵⁴Penepapo wakachemerezga maluŵiro kwa munyamata uyo wakayeghanga mahomwa ghakhe wakati, “Sorora lupanga lwako undikome, mzire ŵanthu ŵayowoye na za ine kuti, ‘Mwanakazi ndiyo wakamukoma.’ ” Pungwe wakhe yura wakamugwaza nadi na lupanga mpaka kuseri, na kufwa.

⁵⁵Para ŵaIsraele ŵakawona kuti Abimeleki wafwa, ŵakapatukana waliyose ku chikaya chakhe.

⁵⁶Ntheura ndimo Chiuta wakawezgera nduzga kwa Abimeleki pa uheni uwo wakachitira wiske, pakukoma ŵana ŵanyakhe 70.

⁵⁷Chiuta wakaŵalangaso ŵanthu ŵa msumba wa Shekemu chifukwa cha uheni wose uwo ŵakachita ndipo nthembo ya Yotamu mwana wa Yerubu Baala yikafiskika.