Read new_tumbuka_bible 2 Yohane 1 Bible Online

2 Yohane 1 - new_tumbuka_bible bible

2 Yohane 1

¹Kufuma kwa ine murara wa mpingo. Kwa fumukazi yakusankhika pamoza na ŵana ŵakhe awo nkhuŵatemwa mu unenesko. Kuti ndine pera nkhuŵatemwa chara, kweniso na ŵanthu wose awo ŵakumanya unenesko,

²pakuti unenesko uwu ukukhalirira mwa ise, ndipo uti uŵenge nase kwa muyirayira.

³Uchizi, lusungu na mutende, vya kufumira kwa Chiuta Dada na Yesu Khristu Mwana wakhe, viŵenge na ise mu unenesko na mu kutemwa.

⁴Nkhakondwa chomene pakusanga kuti ŵana ŵako ŵanyakhe ŵakwenda mu nthowa ya unenesko nga ndi umo Ŵadada ŵakatilangulira.

⁵Ntheura sono nkhukupempha iwe fumukazi kuti tose titemwanenge. Ili kuti ndi dango liphya ilo nkhukulembera chara, kweni ndeneilo tikaŵa nalo kufuma ku mutendeko.

⁶Kutemwa uko nkhunena ndiko kurondezga marango gha Chiuta. Ili ndi dango ilo ukapulika kufuma ku mutendeko kuti urondezgenge kutemwa.

⁷Pakuti ŵapusikizgi ŵanandi ŵali kuruta uku na uku mu charu, ŵeneawo ŵakuzomera chara kuti Yesu Khristu wakiza mu thupi la unthu. Ŵanthu ŵa ntheura mbapusikizgi ndipo mbachikana-Khristu.

⁸Uŵe maso kuti ureke kutaya icho ukafukafukira, kweni upokere njombe yako yakukwanira.

⁹Yose uyo wakudangira ndipo wakureka kukhalirira mu chisambizgo cha Khristu, walije Chiuta. Kweni uyo wakukhara mu chisambizgo ichi, wali na wose, Ŵadada na Mwana.

¹⁰Usange yumoza wakwiza kwa iwe kwambula chisambizgo ichi, ureke kumupokerera mu nyumba yako nanga nkhumutauzga.

¹¹Pakuti uyo wati wamutauzge, wakuzomerezga milimo yakhe yiheni.

¹²Nangauli ndili na vinandi vyakuti ndikulembere, kweni nkhukhumba kuvilemba mu karata chara. Nkhugomezga kuti ndizenge kuti ndizakakuwone na kuyowoya nawe maso na maso, mwakuti chimwemwe chithu chiŵe chakufikapo.

¹³Ŵana ŵa mudumbu wako wakusankhika, ŵakukutauzga.