Read new_tumbuka_bible 3 Yohane 1 Bible Online

3 Yohane 1 - new_tumbuka_bible bible

3 Yohane 1

¹Kufuma kwa ine murara wa mpingo. Ku wakutemweka Gayo, uyo nkhumutemwa nadi.

²Wakutemweka, nkhuromba kuti vyose vikwenderenge makora, na kuti uŵenge makora mu umoyo wako wa thupi nga ndi umo nkhumanyira kuti mzimu wako uli makora.

³Chifukwa nkhakondwa chomene para nkhapulika ku ŵakhristu ŵanji awo ŵakiza kuno na kundiphalira kuti ukwenda mu unenesko nadi ndipo nkharo yako nayo yikurongora unenesko.

⁴Kulije chimwemwe chikuru icho ndingaŵa nacho kuruska ichi chakuti ndipulike kuti ŵana ŵane ŵakwenda mu unenesko.

⁵Wakutemweka, ukurongora kugomezgeka kwako pa vyose ivyo ukuŵachitira ŵakhristu ŵanyithu, chomenechomene awo mbalendo.

⁶Iwo ŵali kuphara na kutemwa kwako panthazi pa mpingo. Uwovwirenge ntheura kuti ŵarutilire pa ulendo wawo mu nthowa iyo Chiuta wangakondwa nayo.

⁷Pakuti ŵakawuka ulendo wawo chifukwa cha kuteŵetera iyo kwambula kupokera wovwiri ku ŵanthu ŵakuwaro.

⁸Ntheura ise ŵakhristu tikwenera kovwira ŵanthu ŵa ntheura, mwakuti tiŵenge ŵateŵeti ŵanyawo mu unenesko.

⁹Nkhalembera karata ku mpingo, kweni Diyoterefe uyo wakutemwa kujiŵika mudangiriri, wakuzomerezga mazaza ghane chara.

¹⁰Ntheura para ndiza, ndizamuvumbula ivyo iyo wakuchita, pakundiyowoyera mazgu ghaheni. Kweni pakurutilira pa ivi, iyomwene wakukana kuŵapokerera ŵakhristu para ŵamwizira, ndiposo awo ŵakukhumba kuŵapokerera, wakuŵakanizga na kuŵachimbizga mu mpingo.

¹¹Wakutemweka wane, ureke kurondezga makhaliro ghaheni, kweni rondezga makhaliro ghaweme. Yose uyo wakuchita chinthu chiweme ndi mwana wa Chiuta. Kweni uyo wakuchita icho nchiheni wandamuwone Chiuta.

¹²Demetiriyo wali na ukaboni kufuma ku munthu waliyose ndipo unenesko wose ukurongora ntheura.

¹³Nkhaŵa na vinandi vyakuti ndikulembere kweni ndasanga kuti nchiweme kuti ndireke kukulembera vinandi.

¹⁴Nkhugomezga kukuwona sonosono, ndipo tizamkuyowoyeskana maso na maso.

¹⁵Mutende uŵe nawe. Ŵabwezi wose kuno ŵakukutauzga. Uŵatauzge ŵabwezi ŵithu, waliyose wa iwo.