Read new_tumbuka_bible Yuda 1 Bible Online

Yuda 1 - new_tumbuka_bible bible

Yuda 1

¹Kufuma kwa ine Yuda, muteŵeti wa Yesu Khristu, na munung'una wa Yakhobe. Ku awo mbakuchemeka na kutemweka na Chiuta Dada ndipo ŵakusungirikira Yesu Khristu.

²Lusungu, mutende, na kutemwa vyandaniskikire kwa imwe.

³Mwa ŵakutemweka pakukhumbisiska chomene kumulemberani karata na vya chiponosko cha ise tose, nkhasanga kuti nchakwenerera kumulemberani na kumuchiskani kuti ŵarutilire kurwera chipulikano icho Chiuta wali kuperekerathu kamoza pera ku ŵanthu ŵakhe.

⁴Pakuti ŵanthu ŵanji awo chilango chawo chili kulembeka kale ŵali kunjira mu chibisibisi mukati mwinu. Iwo aŵa kuti ŵakusopa Chiuta chara ndipo ŵakubendezga uchizi wa Chiuta withu kuŵa wakuchitira ukazuzi ndipo ŵakukana Yesu Khristu uyo yekha na yekha ngwa mazaza ndiposo Fumu yithu.

⁵Sono nkhukhumba kumukumbuskani, nangauli mukuvimanya kale vyose, kuti Fumu yikathaska ŵaIsraele mu charu cha Eguputo, kweni pamanyuma yikamara wose awo ŵakawura kupulikana.

⁶Mukumbuke ŵangelo awo ŵakareka kusungilira mazaza ghawo na ghawo na kusida malo agho Chiuta wakaŵapa. Ntheura Chiuta wali kuŵakaka na maunyoro gha muyirayira ndipo wakuŵasunga mu munkhorwe kufikira pa zuŵa likuru lira apo wizamkuŵeruzgira.

⁷Mukumbukeso misumba ya Sodomu na Gomora, na misumba yakuzingirizga, iyo nayo yikachita nga mbangelo ŵara pakuchita uzaghali uwo ukachitikanga pakati pa ŵanarume pera panji pa ŵanakazi pera. Ndipo Chiuta wakayilanga mu moto wa muyirayira kuŵa nchenjezgo ya pakweru ku ŵanthu wose.

⁸Mu nthowa yeneiyi ŵanthu aŵa, ŵakuŵa na maloto kuti ŵachitenge vya ukazuzi ku mathupi ghawo, ndipo ŵakukana mazaza gha Chiuta na kutuka ŵanthu ŵa uchindami ŵa kuchanya.

⁹Kweni nanga ndi Mikayele mungelo mukuru, para wakasuskananga na Satana kupindana nayo pa vya thupi la Mozesi kuti wakakangarizga kumususka na mazgu ghakutuka chara kweni wakati, “Fumu ndiyo yikuchenye iwe.”

¹⁰Kweni ŵanthu aŵa ŵakutuka vinthu ivyo ŵakuvimanya chara, na vinthu ivyo ŵakuvimanyira mu njuŵi nga ndi umo vikuchitira vinyama vyambula mahara. Vinthu vya ntheura ndivyo viti viŵamarenge petu.

¹¹Soka kwa iwo! Chifukwa ŵakwenda mu nthowa ya Kayini, ndipo ŵachimbilira kukuchita uheni chifukwa cha chandulo nga ndi umo wakachitira Balaamu. Ŵamugarukira Chiuta ndipo ŵamarenge petu nga ndi umo wakamalira Kora.

¹²Ŵanthu aŵa ŵali nga ndi mabanga mukati mwinu pose apo mwawungana mu vya chitemwa. Ŵakurya namwe pamoza kwambula kuŵa na soni, ndipo ŵakujipwererera ŵekha pera. Ŵali nga ndi maŵingu ghambula maji, agho ghakuputwa na mphepo. Ŵali nga ndi makuni agho ghakureka kupambika vipambi pa nyengo ya chihanya gheneagho ghali kufwa kale. Ndipo ŵanthu ŵakughazgura na misisi wuwo.

¹³Ŵali nga ndi majigha ghakofya gha nyanja, ndipo ŵakumokora mphovu ya ukazuzi wawo. Ŵali nga ndi nyenyezi izo zataya nthowa ndipo zikuyingayinga waka. Ntheura Chiuta waŵasungira mdima wakofya kwa muyirayira.

¹⁴Enoki wa mphapu ya chinkhonde na chiŵiri kufuma pa Adamu, wakachima na vya ŵanthu aŵa kuti, “Wonani, Fumu yikiza pamoza na ŵangelo vikwivikwi,

¹⁵kwiza keruzga ŵanthu wose. Yizamkweruzga wose awo mbambula kusopa Chiuta na milimo yawo yose iyo ŵakachitira kwambula kopa Chiuta, na vyankhaza vyose ivyo ŵakwananga ŵamuyowoyera Chiuta!”

¹⁶Ŵanthu aŵa mbakusinginika na ŵambula kukhutiskika, ndipo ŵakurondezga maulamphalampha ghawo. Ŵakuyowoya mwakujikuzga na kumyamyatika ku ŵanthu mwakuti ŵasange icho ŵakukhumba.

¹⁷Kweni mukwenera kukumbuka imwe mwa ŵakutemweka, mazgu agho ŵakutumika ŵa Fumu yithu Yesu Khristu ŵakayowoya.

¹⁸Iwo ŵakati kwa imwe, “Mu mazuŵa gha umaliro kuti kuŵengeko ŵakugoska, ŵakurondezga makhumbiro ghawo ghaheni.” 1

¹⁹Ŵanthu aŵa ndiwo ŵakuŵika mphatukano mukati mu ŵanthu, mba mu charu, ndipo mitima yawo kuti yikurongozgeka na Mzimu chara.

²⁰Kweni imwe mwa ŵakutemweka, mujizenge pa chipulikano chinu icho nchituŵa nkhanira, na kurombera mu nkhongono ya Mzimu Mutuŵa.

²¹Mujisungilirenge mu kutemwa kwa Chiuta apo mukulindizga lusungu lwa Fumu yithu Yesu Khristu kufikira ku umoyo wa muyirayira.

²²Muŵe na lusungu na awo ŵakukayika mu mitima yawo.

²³Ndipo ponoskani ŵanji pakuŵaphura ku moto. Ŵanyakheso mukwenera kuŵalengera lusungu, kweni na wofi. Ndipo tinkhani vyakuvwara vyawo ivyo vyaphakazgika na makhumbiro gha thupi.

²⁴Sono kwa mweneuyo wali na nkhongono kumukhozgani kuti mureke kuwa, na kumuperekani mwa ŵambula kalema na ŵakukondwa panthazi pa uchindami wakhe,

²⁵kwa Chiuta pera, uyo ndi Muponoski withu mwa Yesu Khristu Fumu yithu, kuŵenge uchindami, ufumunkhuru, mazaza na nkhongono pambere nyengo yose yindaŵeko mpaka muyirayira swii. Ameni.