Read new_tumbuka_bible Uvumbuzi 1 Bible Online

Uvumbuzi 1 - new_tumbuka_bible bible

Uvumbuzi 1

¹Uwu ndi uvumbuzi[1] wa Yesu Khristu uwo Chiuta wakamupa kuti warongore ku ŵateŵeti ŵakhe vinthu ivyo vikwenera kuchitika sonosono. Khristu wakavumbula ichi pakutuma mungelo wakhe kwa muteŵeti wakhe Yohane.

²Yohane uyu ndiyo wakuphara vyose ivyo wakaviwona ndipo ndi kaboni wa mazgu gha Chiuta na vyose ivyo Yesu Khristu wakachita na kuyowoya.

³Ngwakutumbikika munthu uyo wakuŵazga mazgu gha uchimi agha mwakukwezga mazgu, ndipo mbakutumbikika awo ŵakupulika na kusunga ivyo vili kulembeka mwenemumo. Pakuti nyengo yaneng'enera.

⁴Kufuma kwa Yohane, kuya ku mipingo ya Chiuta yinkhonde na yiŵiri iyo yili mu Asiya. Uchizi na mutende viŵe namwe kufuma kwa Chiuta uyo waliko, uyo wakaŵako ndiposo uyo wati wizenge, na kufuma kwa mizimu yinkhonde na yiŵiri iyo yili panthazi pa chizumbe cha Chiuta,

⁵ndiposo na kwa Yesu Khristu, kaboni wakugomezgeka, wakudanga kuwuka ku ŵakufwa na uyo wakuwusa ŵakaronga ŵa charu cha pasi. Mweneuyo wakutitemwa, ndipo na ndopa zakhe wakatisutula ku zakwananga zithu,

⁶ndipo wali kutizgora ise kuŵa ufumunkhuru na ŵasofi kuti timuteŵeterenge Chiuta, Ŵawiske. Ntheura kwa Yesu Khristu kuŵenge nchindi na mazaza kwa muyirayira. Ameni.

⁷Wonani, wakwiza na maŵingu! Waliyose wizamkumuwona, awo ŵakamulasa nawo, ŵizamkumuwona. Mafuko ghose gha mu charu cha pasi ghizamkulira chifukwa cha iyo. Inya, ndimo kuŵirenge! Ameni.

⁸“Ine ndine Alefa na Omega,” ndimo yikuyowoyera Fumu Chiuta, Mwenenkhongono zose, uyo waliko, wakaŵako ndiposo wati wizenge.

⁹Ine Yohane, mubali winu ndipo uyo wakusangana namwe mwa Yesu visuzgo na Ufumu wa Chiuta na kufwirirapo mu kuzizipizga. Nkhaŵikika pa chirwa cha Patimo chifukwa chakupharazga Mazgu gha Chiuta na kuŵa kaboni wa Yesu.

¹⁰Pa zuŵa la Fumu nkhaŵa mu Mzimu ndipo kunyuma kwane nkhapulika mazgu ghakuru gheneagho ghakapulikikwa nga ndi kulira kwa mbata,

¹¹ghakati, “Lemba mu buku vyose ivyo ukuviwona ndipo uvitume ku mipingo ya Chiuta yinkhonde na yiŵiri: wa ku Efeso, wa ku Simerena, wa ku Peregamo, wa ku Tiyatira, wa ku Saradisi, wa ku Filadelifiya na wa ku Laodekeya.”

¹²Nkhazgoka kuti ndimuwone uyo wakayowoyanga. Ndipo pakuzgoka nkhawona vyakuŵikapo nyali vinkhonde na viŵiri vya golide.

¹³Pakati pa vyakuŵikapo nyali vira pakimilira yumoza uyo wakaŵa nga ndi Mwana wa Munthu. Iyo wakavwara munjilira uwo ukafika ku malundi, na lamba wa golide uyo wakajikaka nayo pa chifuŵa.

¹⁴Mutu wakhe na sisi lakhe vikaŵa vituŵa nga ndi thonje ndiposo nga ndi nyathutwe. Maso ghakhe ghakaŵa ghakung'azima nga ndi moto wakugolera.

¹⁵Malundi ghakhe ghakaŵa nga ndi kung'azima kwa mkuŵa wakutuwulika uwo wengeka mu ng'anjo ya moto. Mazgu ghakhe ghakaŵa nga ndi kupopoma kwa maji ghanandi.

¹⁶Munthu yura wakakorera nyenyezi zinkhonde na ziŵiri mu woko lakhe la maryero, ndipo lupanga lwa kuthwa kosekose lukafuma mu mlomo wakhe. Chisko chakhe chikaŵa nga ndi dazi ilo laŵala na nkhongono yose.

¹⁷Apo nkhati ndamuwona, nkhawa pasi mu malundi ghakhe, ndipo nkhaŵa nga ndafwa. Kweni wakaŵika woko lakhe la maryero pa ine, ndipo wakati, Ungopanga! Ndine wakudanga na wakumalira.

¹⁸Ndipo ndine wamoyo. Nkhafwa kweni sono, wona, ndili wamoyo kwa muyirayira swii! Ndili na vijuriro vya nyifwa na ku Gehena

¹⁹Sono lemba ivyo ukuviwona ivyo viliko na ivyo vyamkuchitika kunthazi.

²⁰Ching'anamulo cha chamuchindindi cha nyenyezi zinkhonde na ziŵiri izo ukaziwona mu woko lane la maryero ndiposo na cha vyakuŵikapo nyali zinkhonde na ziŵiri vya golide vira, ndi ichi: Nyenyezi zinkhonde na ziŵiri zira ndi ŵangelo ŵa mipingo yinkhonde na yiŵiri, ndipo nyali zinkhonde na ziŵiri zira ndi mipingo yinkhonde na yiŵiri.