Read new_tumbuka_bible Uvumbuzi 10 Bible Online

Uvumbuzi 10 - new_tumbuka_bible bible

Uvumbuzi 10

¹Pamanyuma pa ichi nkhawona mungelo munyakhe wankhongono wakwikha kufuma kuchanya. Wakavungirizgika mu maŵingu, ndipo pa mutu wakhe pakaŵa chiŵingavura. Chisko chakhe chikaŵa nga ndi dazi, malundi ghakhe ghakaŵa nga ndi mizati ya moto.

²Mungelo yura wakaŵa na kakarata kakuzinga ako kakaŵa kakujurika mu mawoko ghakhe. Lundi lakhe la maryero likakanda mu nyanja, ndipo lundi lakhe la mazere likakanda pa mtunda.

³Mungelo yura wakachemerezga na mazgu ghakuru nga ndi nkharamu iyo yikubangura. Wakati wachemerezga, vikhayokhayo vinkhonde na viŵiri vira vikayowoya.

⁴Nkhatenge ndilembe mazgu agho vikhayokhayo vinkhonde na viŵiri vira vikayowoyanga, kweni nkhapulika mazgu ghakufuma kuchanya ghakuti, “Ungavumbulanga chara mazgu agho vikhayokhayo vyayowoya ndipo ureke kughalemba!”

⁵Ntheura mungelo uyo nkhawona kuti wakanda pa nyanja na pa mtunda wakawuska woko lakhe la maryero muchanya.

⁶Iyo wakarapa chirapo mwa uyo ngwamoyo kwa muyirayira swii, mweneuyo wakalenga kuchanya na vyose ivyo vilimo, charu cha pasi na vyose ivyo vili mwenemumo, nyanja na vyose ivyo vili mwenemumo, ndipo wakati, “Kureke kuŵa chiziwulika!

⁷Mu mazuŵa agho mungelo wa chinkhonde na chiŵiri wamkulizgira mbata yakhe, apo ndipo cha muchindindi cha Chiuta chizamkufiskika kwakuyana na umo wakapharazgira ku ŵateŵeti ŵakhe awo ndi nchimi.”

⁸Penepapo mazgu agho nkhapulika kufumira kuchanya, ghakayowoyaso kwa ine kuti, “Rutanga ukatore buku lakujurika ilo liri mu woko la mungelo uyo wakanda pa nyanja na pa mtunda.”

⁹Ntheura nkharuta ku mungelo yura ndipo nkhamuromba kuti wandipe kakarata kakuzinga kara. Iyo wakati, “Tora urye. Kati kaŵaŵenge mu nthumbo mwako, kweni kati kanong'omerenge nga ndi uchi mu mlomo wako.”

¹⁰Nkhatora kakarata kakuzinga kara mu woko la mungelo na kurya. Kakaŵa kakunowa nga ndi uchi mu mlomo. Kweni nkhati ndarya, mu nthumbo mwane mukaŵinya.

¹¹Penepapo wakandiphalira kuti, “Ukwenera kuchimiraso ŵanthu ŵanandi, mafuko ghanandi, mitundu yinandi na ŵakaronga wuwo.”