Read new_tumbuka_bible Uvumbuzi 11 Bible Online

Uvumbuzi 11 - new_tumbuka_bible bible

Uvumbuzi 11

¹Mungelo wakandipa thete lakuŵa nga ndi ndodo yakupimira, ndipo nkhaphalirika kuti, “Wuka, upime Nyumba ya Chiuta pamoza na jochero lakhe, ndipo uŵapende ŵanthu wose awo ŵakusopa mwenemumo.

²Kweni kupima baraza la kuwaro kwa Nyumba ya Chiuta chara, ulireke chifukwa liri kuperekeka ku ŵamitundu, ndipo kwa myezi 42 ŵati ŵawukandirizgenge msumba utuŵa uwu.

³Nditi ndipereke nkhongono ku ŵakaboni ŵane ŵaŵiri, ŵakuvwara vigudulu, kuti ŵachime mazgu gha Chiuta kwa mazuŵa 1,260.”

⁴Ŵakaboni ŵaŵiri aŵa ndiwo makuni ghaŵiri gha olive na nyali ziŵiri izo zikwima panthazi pa Fumu ya charu chose.

⁵Usange munthu wakukhumba kuŵachitira kaheni, mbwenu moto ufumenge mu mlomo mwawo na kuŵamyangura ŵarwani ŵawo. Yose uyo wakukhumba kuŵachitira kaheni, wamkukomekera mu nthowa yeneiyi.

⁶Ŵakaboni ŵara ŵaliso na mazaza ghakujalira mtambo kuti vura yireke kurokwa pa charu pa nyengo iyo ŵakuchimira. Ndiposo ŵali na mazaza ghakuzgolera maji kuŵa ndopa, na kuchisuzga charu na chilengo cha mtundu uliwose pose apo ŵakukhumba.

⁷Ndipo para ŵamara ukaboni wawo, chikoko icho chikakweranga kufuma mu chizongwe chambula kugota chira chizamkurwa nawo nkhondo ndipo chizamkuŵatonda na kuŵakoma.

⁸Ndipo mathupi ghawo ghamkugona mu misewu ya mu msumba uwo pakuwugeremba ukuchemeka Sodomu na Eguputo, uko Fumu yawo yikapayikika pa mphinjika.

⁹Mu mazuŵa ghatatu na hafu, ŵanthu ŵa mafuko ghose, ŵamitundu yose, na ŵa viyowoyero vyose ŵizamkughawona mathupi ghawo ndipo kwamkuŵavye na yumoza uyo wamkuzomera kuti ghasungike mu dindi.

¹⁰Ndipo ŵanthu wose ŵa mu charu ŵamkusekerera, na kukondwa pa nyifwa ya nchimi ziŵiri izi. Ndipo ŵanthu ŵamkutumizgirana vyawanangwa chifukwa nchimi ziŵiri izi zikasuzganga chomene ŵanthu awo ŵakukhara pa charu.

¹¹Kweni pamanyuma pa mazuŵa ghatatu na hafu ghara, muvuchi wa umoyo uwo ukafuma kwa Chiuta ukanjira mwa iwo. Ndipo awo ŵakimilira ŵakawona na kopa chomene.

¹²Ntheura nchimi ziŵiri zira zikapulika mazgu ghakuru kufuma kuchanya ghakuti, “Kwerera kuno kuchanya.” Ŵakakwerera kuchanya muŵingu uku ŵarwani ŵawo ŵakuwona.

¹³Pa nyengo yeneyira kukaŵa chindindindi chikuru, ndipo chigaŵa chimoza mu vigaŵa khumi cha msumba chikabwanganduka. Ŵanthu awo ŵakakomeka na chindindindi chira ŵakaŵa vikwi vinkhonde na viŵiri. Awo ŵakakharapo ŵakatenthema ndipo ŵakamuchindika Chiuta wa kuchanya.

¹⁴Soka la chiŵiri lajumpha, kweni sono kwakhara soka la chitatu ilo likwiza sonosono.

¹⁵Mungelo wachinkhonde na chiŵiri wakati walizga mbata yakhe, mu mtambo mukafuma mazgu ghakuru ghakuti, “Mazaza gha kuwusa charu ghali mwa Fumu yithu na Mesiya wakhe. Ndipo ndiyo wati wawusenge kwa muyirayira swii.”

¹⁶Ŵarara ŵara 24, awo wakakhara pa vizumbe vyawo panthazi pa Chiuta, ŵakawa pasi kavunama, ŵakamusopa Chiuta,

¹⁷ŵakati, “Imwe Fumu Chiuta, Mwenenkhongono zose, Imwe muliko, ndipo mukaŵako! Tikupereka viwongo kwa imwe, chifukwa mwajitorera nkhongono zinu zikuru ndipo mwayamba kuwusa.

¹⁸Ŵamitundu ŵakakaripa, kweni ukari winu ukiza. Sono ndiyo nyengo yakweruzgira ŵakufwa. Sono ndiyo nyengo ya kuperekera njombe ku ŵateŵeti ŵinu, zinchimi, na ku ŵanthu ŵinu ŵakupatulika ndiposo na wose awo ŵakuchindika zina linu, ŵakuzirwa na ŵambula kuzirwa. Sono ndiyo nyengo ya kuparanyira awo ŵakuparanya charu.”

¹⁹Penepapo Nyumba ya Chiuta kuchanya yikajurika. Bokosi la Phangano likawoneka mu Nyumba ya Chiuta, ndipo kumwetuka kwa ŵaleza kukaŵako, na mphomo, kulira kwa vikhayokhayo, chindindindi, ndipo na matalala ghakuru gha vura.