Read new_tumbuka_bible Uvumbuzi 12 Bible Online

Uvumbuzi 12 - new_tumbuka_bible bible

Uvumbuzi 12

¹Ndipo chimanyikwiro chikuru chikawoneka kuchanya. Mwanakazi wakavwara dazi, malundi ghakhe ghakakanda pa mwezi ndipo pa mutu wakhe pakaŵa mphumphu ya nyenyezi 12.

²Mwanakazi yura wakaŵa na nthumbo, ndipo pa nyengo ya kubabira kwakhe wakalira na kuchemerezga chifukwa cha vyakuŵinya vya pakubaba.

³Chimanyikwiro chinyakhe chikawoneka kuchanya. Kukaŵa chinjoka chikuru chiswesi icho chikaŵa na mitu yinkhonde na yiŵiri, ndiposo na masengwe khumi. Ndipo pa mitu yakhe chikaŵa na mphumphu zinkhonde na ziŵiri izo zikaŵa pa mitu yakhe yose.

⁴Ndipo muchira wakhe ukakukura nyenyezi za kuchanya chigaŵa chimoza mu vigaŵa vitatu, ndipo ukaziponya pasi pa charu. Chinjoka chira chikimilira panthazi pa mwanakazi uyo wakaŵa pafupi kubaba mwakuti chirye mwana para wababika waka.

⁵Wakababa mwana mwanarume mweneuyo wizamkuwusa mafuko gha ŵanthu na ndodo ya chisulo. Kweni mwana wakhe wakakwapulikira kwa Chiuta uko na ku chizumbe chakhe.

⁶Mwanakazi wakachimbilira ku mapopa, kweneuko kukaŵa malo agho Chiuta wakamunozgera, mwakuti ndiko walerekere mazuŵa 1,260.

⁷Ndipo kukaŵa nkhondo kuchanya, Mikayele na ŵangelo ŵakhe ŵakarwanga na chinjoka. Chinjoka chira na ŵangelo ŵakhe chikarwanga nawo.

⁸Kweni chinjoka chira na ŵangelo ŵakhe ŵakatondeka ndipo ŵakaŵavye malo ghali ghose kuchanya.

⁹Ntheura chinjoka chikuru chira chikaponyeka pa charu cha pasi. Ichi ndicho chinjoka cha chiyamwaka icho chikuchemeka na zina lakuti, “Muryarya” panji “Satana.” Iyo ndiyo wakupuruska ŵanthu mu charu chose cha pasi, ndipo wakaponyeka pa charu pamoza na ŵangelo ŵakhe.

¹⁰Penepapo nkhapulika mazgu ghakuru kufuma kuchanya, agho ghakati, “Sono ndipo chafika chiponosko, nkhongono, Ufumu wa Chiuta withu, na mazaza gha Mesiya wakhe. Pakuti mtunduli wa ŵabali ŵithu uyo wakuŵatundura pa maso pa Chiuta muhanya na usiku waponyeka pasi.

¹¹Ŵanyithu ŵali kumutonda na ndopa za Mwana-mberere na mazgu gha ukaboni wawo, chifukwa ŵakawura kutemwa ma umoyo ghawo nanga ŵakaŵa mu urwani wa nyifwa.

¹²Ntheura iwe mtambo sekerera pamoza na wose awo ŵakukhara mwenemuno! Soka ku charu cha pasi na nyanja, pakuti Satana wakhilira kwa imwe na ukari ukuru pakumanya kuti nyengo yakhe njifupi.”

¹³Chinjoka chira chikati chawona kuti ŵachiponya pa charu cha pasi, chikamba kumuzikizga mwanakazi uyo wakababa mwana mwanarume yura.

¹⁴Kweni mwanakazi wakapika mapapindo ghaŵiri gha nombo yikuru mwakuti wawuruke na kuchimbirako ku chinjoka na kuya ku mapopa. Kwenekura wakwenera kulereka kwa virimika vitatu na hafu, kuti chinjoka chira chireke kumuwona.

¹⁵Chinjoka chikafunya maji kufuma mu mlomo wakhe agho ghakaŵa nga ndi mronga, mwakuti ghamukukure mwanakazi yura.

¹⁶Kweni charu chikamovwira mwanakazi yura pakujula mlomo wakhe na kumira maji gha mronga ura agho chinjoka chikafunya mu mlomo wakhe.

¹⁷Penepapo chinjoka chira chikamukaripira mwanakazi. Ntheura chikaruta kuya karwa na awo ŵakakharapo ŵa mu mphapu ya mwanakazi, awo ŵakasungilira marango gha Chiuta na kukoreska chipanikizgo chawo mwa Yesu.

¹⁸Chinjoka chira chikaya kimilira mu mphepete mwa nyanja.