Read new_tumbuka_bible Uvumbuzi 13 Bible Online

Uvumbuzi 13 - new_tumbuka_bible bible

Uvumbuzi 13

¹Ndipo nkhawona chikoko chikuzuwuka mu nyanja, icho chikaŵa na masengwe khumi na mitu yinkhonde na yiŵiri. Pa masengwe ghakhe pakaŵa mphumphu khumi ndipo pa mitu yakhe pakalembeka mazina gha kutuka Chiuta.

²Sono chikoko icho nkhawona chikaŵa nga ndi nyalubwe, vikandiro vyakhe vikaŵa nga ndi vya nkharamira, mlomo wakhe ukaŵa nga ngwa nkharamu. Chinjoka chira chikapereka nkhongono zakhe, chizumbe chakhe pamoza na mazaza ghakhe ghakuru ku chikoko chira.

³Mutu umoza wa chikoko ukawoneka nga uli na chilonda chakufwa nacho, kweni chilonda chakufwa nacho chikapora. Ndipo charu chose chikarondezga chikoko chira na kuzizwa,

⁴ndipo ŵakachilambira chinjoka chira chifukwa chikapereka mazaza ku chikoko. Ndipo ŵakachilambiraso chikoko chira na kuti, “Ndi njani uyo wakukozgana na chikoko ichi? Ndipo ndi njani uyo wangarwa nacho?”

⁵Chikoko chira chikapika mlomo kuti chiyowoye mwakujikuzga na kutuka Chiuta. Chikazomerezgeka kuŵa na mazaza ghakuchitira mlimo wakhe pa myezi 42.

⁶Sono chikamba kuyowoya mazgu ghakumutuka Chiuta, zina lakhe, na malo agho wakukhara Chiuta ndiposo na ŵanthu wose awo ŵakukhara kuchanya.

⁷Ndipo chikazomerezgekaso kurwa nkhondo na ŵanthu ŵa Chiuta na kuŵatonda. Chikapikaso mazaza kuwusa ŵanthu ŵa mafuko ghose, ŵanthu ŵa viyowoyero vyose, na ŵamitundu yose.

⁸Ŵanthu wose awo ŵakukhara mu charu cha pasi, ŵati ŵachilambirenge. Aŵa ndi wose awo kufuma ku mutendeko mazina ghawo ghandalembeke mu Buku la ŵamoyo la Mwana-mberere uyo wakakomeka.

⁹Yose uyo wali na makutu, rekani wapulike.

¹⁰Usange munthu wali kupimikira kuya ku uzga, ku uzga wati ŵarutenge. Usange munthu wakukoma na lupanga, na lupanga wati wakomeke. Apa ndipo pakukhumbikwa kuti ŵanthu ŵa Chiuta ŵaŵe ŵakuzizipizga na ŵa chipulikano.

¹¹Pamanyuma pakhe nkhawona chikoko chinyakhe chikutumphuka chikufumira kuwaro kwa charu. Ichi chikaŵa na masengwe ghaŵiri agho ghakaŵa nga ndi gha Mwana-mberere ndipo chikayowoyanga nga ndi chinjoka chira.

¹²Chikoko ichi chikaŵa nagho mazaza ghose gha chikoko chakudanga chira panthazi pakhe. Chikaŵachichizga ŵanthu wose awo ŵakukhara mu charu kuchilambira chikoko chakudanga chira, icho chilonda chakhe chakufwa nacho chikapora.

¹³Chikoko cha chiŵiri ichi chikuchita vimanyikwiro vikuru vyakuzizwiska nanga nkhukhizgira moto pa charu cha pasi kufuma kuchanya, uku ŵanthu wose ŵakuwona.

¹⁴Chikuŵapuruska ŵanthu wose awo ŵakukhara pa charu cha pasi na vimanyikwiro ivyo chikazomerezgeka kuchita pa maso pa chikoko chakudanga chira. Chikoko chira chikuŵaphalira ŵanthu aŵa ŵakukhara pa charu kuti ŵapange chikozgo cha kuchindikira chikoko icho chikapwetekeka na lupanga, ndipouli chikaŵa na umoyo.

¹⁵Chikoko cha chiŵiri chikapika mazaza ghakuthutira muvuchi wakhe mu chikozgo cha chikoko chakudanga chira, mwakuti chikozgo chimanye kuyowoya na kuŵakoma wose awo ŵakureka kuchilambira.

¹⁶Chikuŵachichizga ŵanthu wose ŵakuzirwa na ŵambula kuzirwa, ŵasambazi na ŵakavu, ŵanangwa na ŵazga kuti ŵaŵe na chimanyikwiro cha chikoko pa woko la maryero panji pa visko vyawo.

¹⁷Chikachita ichi kuti munthu yose wareke kuzomerezgeka kugula panji kuguliska kwambula kuti wali na chimanyikwiro icho ndi zina la chikoko panyakhe nambara ya zina lakhe.

¹⁸Apa pakukhumba mahara. Uyo wali na vinjeru wapende kapendekero ka chikoko, pakuti ndi nambara ya munthu. Ndipo pakulemba kapendero aka ndi 666.