Read new_tumbuka_bible Uvumbuzi 14 Bible Online

Uvumbuzi 14 - new_tumbuka_bible bible

Uvumbuzi 14

¹Ntheura nkhalaŵiska, ndipo nkhawona Mwana-mberere wimilira pa Phiri la Ziyoni. Pamoza nayo wakimilira na ŵanthu 144,000, awo ŵakalembeka zina lakhe na la Ŵawiske pa visko vyawo.

²Ntheura nkhapulika mazgu kufuma kuchanya nga ndi chiwawa cha maji ghanandi ndipo nga nchiwawa cha chikhayokhayo chikuru. Ndipo lizgu ilo nkhalipulika likaŵa nga ndi kwimba kwa awo ŵakulizga ŵabango ŵawo,

³na kwimba sumu yiphya panthazi pa chizumbe na panthazi pa vyamoyo vinayi vira na ŵarara ŵara. Kukaŵavye munthu wakamanya kusambira sumu yira, kweni ŵanthu ŵara 144,000 pera awo ŵali kuwomboleka kufuma ku charu cha pasi.

⁴Aŵa ndiwo ŵanthu awo ŵalije kujikazuzga na ŵanakazi, ndi ŵanthu ŵakulangwa. Ndiwo ŵakurondezga Mwana-mberere kose uko wakuya. Aŵa ŵali kuwomboleka mukati mu ŵanthu, kuŵa vipambi vyakudanga kwa Chiuta na Mwana-mberere.

⁵Ndipo utesi kuti ukusangikaso mu milomo yawo chara, pakuti iwo mbanthu ŵambula kalema.

⁶Pamanyuma pa ichi nkhawona mungelo munyakhe wakuwuruka muchanya mukatikati mu mlengalenga. Iyo wakaŵa na Uthenga Uweme wa muyirayira kuya kapharazga ku ŵanthu awo ŵamkukhara mu charu cha pasi, ku mafuko ghose, na mitundu yose, na viyowoyero vyose na ŵanthu wose.

⁷Mungelo yura wakachemerezga na mazgu ghakuru wakati, “Mopani Chiuta na kumuchindika, pakuti yafika nyengo yakuti weruzge ŵanthu wa mu charu chose. Mumusope iyo uyo wakalenga mtambo na charu cha pasi, nyanja ndiposo na mbwiwi za maji.”

⁸Mbwenu mungelo munyakhe, wa chiŵiri, wakarondezga na kuyowoya kuti, “Wawa! Wawa msumba ukuru wa Babuloni, weneuwo ukamweskanga ŵanthu ŵa mafuko ghose vinyo la ukari la virakorako vyose vya uzaghali.”

⁹Ndipo mungelo munyakhe wa chitatu, wakaŵarondezga na kuchemerezga na mazgu ghakuru wakati, “Usange walipo uyo wakusopa chikoko na chikozgo chakhe, ndipo wakupokera chimanyikwiro pa chisko chakhe panji pa woko lakhe,

¹⁰nayoso wamkumwa vinyo la ukari wa Chiuta. Vinyo ili wamkupungulikira mu nkhombo ya ukari wakhe, kwambula kusazgako kalikose kakuzizimiska. Munthu uyo wamkusuzgika na moto na sulufure wakugolera panthazi pa ŵangelo ŵatuŵa, na panthazi pa Mwana-mberere.

¹¹Ndipo josi lakutambuzgika kwawo likukwera kuchanya kwa muyirayira swii. Awo ŵakuchilambira chikoko chira na chikozgo chakhe na awo ŵakupokera chimanyikwiro cha zina lakhe, kuti ŵamkupumula chara muhanya na usiku.”

¹²Ichi chikukhumbikwa apa nchakuti ŵanthu ŵa Chiuta ŵaŵe ŵakuzizipizga ŵeneawo ŵakusunga marango gha Chiuta, na kuŵa na chipulikano mwa Yesu.

¹³Ndipo nkhapulika mazgu kufuma kuchanya, ghakati, “Lemba ichi: Mbakutumbikika ŵakufwa awo ŵakufwira mu Fumu kufuma sono mkaka kunthazi.” Mzimu wakuti, “Mbakutumbikika nadi, mwakuti ŵapumule ku kutokatoka kwawo, pakuti milimo yawo yikuŵarondezga.”

¹⁴Pamanyuma pa ichi nkhalaŵiska ndipo nkhawona bingu lituŵa. Yumoza uyo wakawoneka nga ndi Mwana wa Munthu wakakhara pa bingu lira. Wakavwara mphumphu ya golide pa mutu wakhe ndipo wakakorera chigeru chakuthwa mu woko lakhe.

¹⁵Ndipo mungelo munyakhe wakafuma mu Nyumba ya Chiuta wakachemerezga kwa iyo uyo wakakhara pa bingu kuti, “Tora chigeru chako na kwamba kuvuna, pakuti nyengo ya kuvuna yafika, ndipo vuna ya charu yakwana.”

¹⁶Uyo wakakhara pa bingu wakazungunya chigeru chakhe pa charu ndipo wakavuna vyose vya pa charu.

¹⁷Pamanyuma mungelo munyakhe wakafuma mu Nyumba ya Chiuta ya kuchanya, nayo ŵakaŵa na chigeru chakuthwa.

¹⁸Ndipo mungelo munyakhe uyo wakaŵa na mazaza pa moto, wakiza kufuma mu jochero wakachemerezga chomene kwa mungelo uyo wakaŵa na chigeru chakuthwa wakati, “Tora chigeru chako chakuthwa icho unjire mu munda wa mpheska za charu cha pasi, ndipo udumure na kuwunjika, pakuti mpheska zakhe zaphya.”

¹⁹Ndipo mungelo wakazungunya chigeru chakhe pa charu na kuwunjika mpheska za charu, ndipo wakaziponya mu chakukamiramo vinyo chikuru, cha ukari wa Chiuta.

²⁰Mpheska zira wakazikandanga mu chakukamiramo vinyo kuwaro kwa msumba. Ndipo mu chakukamiramo vinyo chira mukafuma ndopa, zeneizo zikenda mtunda wa makilomita 300, ndipo ndimba ya ndopa zira yikaŵa mita yimoza na hafu.