Read new_tumbuka_bible Uvumbuzi 15 Bible Online

Uvumbuzi 15 - new_tumbuka_bible bible

Uvumbuzi 15

¹Ndipo nkhawona chimanyikwiro chinyakhe kuchanya chikuru na chakuzizwiska. Pakaŵa ŵangelo ŵankhonde na ŵaŵiri awo ŵakaŵa na vilengo vinkhonde na viŵiri, vyeneivyo nvya umaliro, pakuti vikaŵa virongorero vya ukari wa Chiuta.

²Nkhawona chinthu icho chikaŵa nga ndi nyanja ya galasi yakusazgikana na moto. Nkhawonaso ŵanthu awo ŵakatonda chikoko na chikozgo chakhe ndiposo na nambara ya zina lakhe. Ŵakimilira mu mphepete mwa nyanja ya galasi, uku ŵakorera ŵabango awo Chiuta wakaŵapa.

³Ŵanthu ŵara wakimbanga sumu ya Mozesi, muteŵeti wa Chiuta, na sumu ya Mwana-mberere, ŵakati, “Mwe Fumu Chiuta Mwenenkhongono zose, nawo mbukuru na kuzizwiska kwa milimo yinu! Karonga wa mafuko, nako nkhurunjika na kuneneska kwa nthowa zinu!

⁴Mwe Fumu, ndi njani uyo wareke kumopani na kuchindika zina linu? Pakuti imwe pera ndimwe Ŵatuŵa. Mafuko ghose ghati ghizenge na kumusopani pakuti milimo yinu yakunyoroka yarongoreka.”

⁵Pamanyuma pa ichi nkhalaŵiska kuchanya ndipo nkhawona Nyumba ya Chiuta ya mukati mwa Chihema cha Ukaboni kuchanya kuti yajurika.

⁶Ndipo mu Nyumba ya Chiuta mukafuma ŵangelo ŵankhonde na ŵaŵiri awo ŵakaŵa na vilengo vinkhonde na viŵiri. Ŵakavwara salu za bafuta zakutowa na zakugabuka ndipo ŵakajiphinya na ŵalamba ŵa golide pa vifuŵa vyawo.

⁷Chimoza cha vyamoyo vinayi vira chikapereka ku ŵangelo ŵankhonde na ŵaŵiri ŵara ŵabakule ŵa golide ŵankhonde na ŵaŵiri ŵakuzura na ukari wa Chiuta uyo wali na umoyo muyirayira swii.

⁸Ndipo Nyumba ya Chiuta yikazura na josi kufuma ku uchindami wa Chiuta na ku nkhongono zakhe. Ndipo pakaŵavye munthu wakamanya kunjira mu Nyumba ya Chiuta mpaka vilengo vinkhonde na viŵiri vya ŵangelo ŵankhonde na ŵaŵiri vikamara.