Read new_tumbuka_bible Uvumbuzi 16 Bible Online

Uvumbuzi 16 - new_tumbuka_bible bible

Uvumbuzi 16

¹Pamanyuma pakhe nkhapulika mazgu ghakuchemerezga kufuma mu Nyumba ya Chiuta ghakuŵaphalira ŵangelo ŵankhonde na ŵaŵiri ŵara kuti, “Rutani, ndipo mukapungulire pa charu cha pasi ŵabakule ŵankhonde na ŵaŵiri ŵara awo ŵali na ukari wa Chiuta.”

²Penepapo mungelo wakudanga wakaruta ndipo wakapungulira vya mu bakule wakhe pa charu. Ndipo vilonda vyazoza vyakununkha na vya kupweteka chomene vikaŵakora ŵanthu awo ŵakaŵa na chidindo cha chikoko na awo ŵakasopa chikozgo chakhe.

³Ndipo mungelo wa chiŵiri wakapungulira pa nyanja ivyo vikaŵa mu bakule wakhe. Penepapo nyanja yikazgoka ndopa pera nga ndi za munthu wakufwa, ndipo vyamoyo vyose ivyo vikaŵa mu nyanja vikafwa.

⁴Mungelo wa chitatu wakapungulira ivyo vikaŵa mu bakule wakhe pa mironga na mbwiwi za maji. Penepapo maji ghose ghakazgoka ndopa.

⁵Nkhapulika mungelo uyo wali na mazaza pa maji wakuti, “Mwe imwe Ŵatuŵa, mwa ŵarunji ndimwe mu weruzgi winu, imwe muliko ndipo mukaŵako.

⁶Pakuti iwo ŵakathiska ndopa za ŵatuŵa na nchimi, ndicho chifukwa mwaŵapa ndopa kuti ŵamwe. Ivi ndivyo vikuŵenerera.”

⁷Ndipo nkhapulika mazgu kufuma ku jochero la sembe ghakuti, “Inya Fumu Chiuta Mwenenkhongono zose, weruzgi winu ngwa kuneneska, ndipo ngwa urunji.”

⁸Ndipo mungelo wa chinayi wakapungulira pa dazi ivyo vikaŵa mu dira wakhe. Penepapo dazi likapika mazaza ghakochera ŵanthu na moto.

⁹Ŵanthu ŵakaphya na chithukivu chikuru, ndipo ŵakatuka zina la Chiuta uyo wali na mazaza pa vilengo ivi. Kweni iwo ŵakang'anamuka mu mtima chara kuti ŵachindike Chiuta.

¹⁰Mungelo wa chinkhonde wakapungulira pa chizumbe cha ufumu wa chikoko chira ivyo vikaŵa mu bakule wakhe. Ndipo ufumu wakhe ukaŵa mu chisi. Ŵanthu ŵakajiruma malulimi ghawo mu urwirwi.

¹¹Iwo ŵakatuka Chiuta wa kuchanya chifukwa cha vyakuŵinya pamoza na vilonda vyawo, ndipo ŵakang'anamuka mu mtima chara ku viheni ivyo ŵakachitanga.

¹²Mungelo wa chinkhonde na chimoza wakapungulira pa mronga ukuru wa Yufurate ivyo vikaŵa mu bakule wakhe. Penepapo maji ghakhe ghakakamuka mwakuti paŵe nthowa yakwizira ŵakaronga ŵakufuma ku mafumiro gha dazi.

¹³Ndipo nkhawona mizimu yitatu ya ukazuzi iyo yikawoneka nga ndi ŵachule. Yikafuma mu mlomo wa chinjoka chira, mu mlomo mwa chikoko chira, ndiposo mu mlomo wa nchimi yitesi yira.

¹⁴Pakuti ndi mizimu ya viŵanda iyo yikuchita vimanyikwiro. Yikwendendeka ku ŵakaronga ŵa charu chose cha pasi kuŵachema kuti ŵize ku nkhondo yikuru pa zuŵa lira la Chiuta Mwenenkhongono zose.

¹⁵“Tegherezgani! Nkhwiza nga ndi munkhungu. Ngwakutumbikika uyo wakukhara maso na kusunga vyakuvwara vyakhe, mzire wende nkhule ndipo wakhozgeke soni ku ŵanthu.”

¹⁶Ntheura mizimu yikawunganya ŵakaronga pamoza pa malo agho mu chiHebere ghakuchemeka kuti “Arimagedoni.”

¹⁷Mungelo wa chinkhonde na chiŵiri wakapungulira vya mu bakule wakhe mu mphepo. Ndipo mazgu ghakuru ghakapulikikwa kufuma ku chizumbe mu Nyumba ya Chiuta ya kuchanya, kuti “Kwafiskika.”

¹⁸Ntheura kukiza kumwetuka kwa ŵaleza na mazgu gha vikhayokhayo na chindindindi chakofya chomene. Umo ŵanthu ŵakalengekera, kuti chikaŵako chindindindi cha nkhongono nga ndi ichi chara pa charu cha pasi.

¹⁹Msumba ukuru ura ukagaŵikana patatu ndipo misumba ya mafuko yikawa. Chiuta wakakumbuka Babuloni msumba ukuru ura ndipo wakawumweska vinyo lakucheruka kwa ukari wakhe, lakufuma mu nkhombo yakhe.

²⁰Ndipo virwa vyose vikazgeŵerekera waka, mapiri ghose nagho kuti ghakawonekaso chara.

²¹Ndipo matalala ghakuru gha uzitu nga makilogiramu 50 ghakawa pa ŵanthu kufuma kuchanya. Ndipo ŵanthu ŵakatuka Chiuta chifukwa cha chilengo cha matalala pakuti chikaŵa chakofya chomene.