Read new_tumbuka_bible Uvumbuzi 17 Bible Online

Uvumbuzi 17 - new_tumbuka_bible bible

Uvumbuzi 17

¹Ntheura yumoza wa ŵangelo ŵankhonde na ŵaŵiri awo ŵakaŵa na ŵabakule ŵankhonde na ŵaŵiri, wakiza kwa ine ndipo wakati, “Zanga, ndipo ndizamkukurongora umo muhule mukuru yura weruzgikirenge, uyo wakukhara pa maji ghanandi.

²Ŵakaronga ŵa charu ŵakachitanga nayo uhule, ndipo awo ŵakukhara mu charu cha pasi ŵakaloŵezgeka na vinyo la uhule wakhe.”

³Ndipo mungelo yura wakandiyegha mu Mzimu kuya nane ku mapopa. Ku malo ghara nkhawona mwanakazi wakhara pa chikoko chiswesi icho chikazura na mazina gha vitusi. Chikoko chira chikaŵa na mitu yinkhonde na yiŵiri, ndiposo na masengwe khumi.

⁴Mwanakazi yura wakavwara vyakuvwara vyakururupira na viswesi ndipo wakajitozga na golide, na mikanda ya mtengo wapatali. Mu woko lakhe wakakorera nkhombo ya golide yakuzura na maukazuzi ghose na mauheni gha uhule wakhe.

⁵Pa chisko chakhe pakalembeka zina la muchindindi lakuti, “Babuloni mukuru, nyinawo wa mahule na wa maukazuzi gha charu cha pasi.”

⁶Ndipo nkhawona mwanakazi yura kuti waloŵera ndopa za ŵatuŵa na za awo ŵakapereka umoyo wawo ku nyifwa chifukwa cha Yesu. Nkhati ndamuwona mwanakazi yura, nkhazizwa chomene.

⁷Mungelo yura wakandifumba wakati, Ukuzizwirachi? Nditi ndikuphalire ching'anamulo cha chamuchindindi cha mwanakazi uyu na cha chikoko icho wakharapo cha mitu yinkhonde na yiŵiri na masengwe khumi.

⁸Chikoko icho ukawona, chikaŵa chamoyo pa nyengo yinyakhe, kweni sono kuti chichali chamoyo chara. Ndipo chili pafupi kufuma mu chizongwe chambula chigoti ndipo chikuya kukakomeka. Ŵanthu wose ŵakukhara pa charu awo kufuma ku mutendeko mazina ghawo ghandalembeke mu Buku la ŵamoyo, wose ŵamkuzizwa pakuwona chikoko ichi. Ŵamkuzizwa pakuwona kuti kale chikaŵa chamoyo kweni sono kuti nchamoyoso chara, kweni chizamkuŵaposo kunthazi.

⁹“Apa pakukhumbikwa vinjeru na mahara. Mitu yinkhonde na yiŵiri yira ndiyo mapiri agho mwanakazi yura wali kukharapo.

¹⁰Ndiwoso ŵakaronga ŵankhonde na ŵaŵiri. Mwa iwo, ŵankhonde ŵali kuwa. Yumoza wakuwusa sono ndipo munyakhe wachali wandafike. Kweni para wafika, wizamkukhara kanyengo kachoko waka.

¹¹Chikoko chira icho nyengo yinyakhe chikaŵa chamoyo, ndipo kuti nchamoyoso chara, ndicho karonga wachinkhonde na chitatu. Ndipouli nchimoza cha ŵa karonga ŵankhonde na ŵaŵiri ŵara. Kweni nacho chikuruta kupharaniko.

¹²“Masengwe khumi agho ukawona ndi ŵakaronga khumi awo ŵandapokere mazaza gha ufumu. Kweni ŵizamkupokera mazaza pa ora limoza pera nga mbakaronga pamoza na chikoko chira.

¹³Ŵakaronga khumi aŵa, urato wawo ngumoza, ndiwo wakupereka nkhongono na mazaza ghawo ku chikoko chira.

¹⁴Iwo ŵizamkuchita nkhondo na Mwana-mberere, kweni Mwana-mberere wizamkuŵatonda, pakuti ndiyo Fumu ya mafumu ghose na Karonga wa ŵakaronga wose. Ndipo ŵanthu ŵakhe ŵakuchemeka, ŵakusoreka, na ŵakugomezgeka ŵizamkutonda pamoza nayo.”

¹⁵Mungelo yura wakandiphalira wakati, “Maji ghara ukawona agho mwanakazi muhule yura wakukharanga, ndigho mitundu ya ŵanthu, mizinda ya ŵanthu, mafuko gha ŵanthu, ndiposo na viyowoyero vyose.

¹⁶Ndipo masengwe khumi agho ukawona ghara pamoza na chikoko chira, vizamkumutinkha mwanakazi muhule yura. Vizamkumupoka vyakhe vyose na kumureka nkhule. Vizamkurya nyama yakhe, pamanyuma kumocha pa moto kuti waphye petu.

¹⁷Pakuti Chiuta wachiŵika mu mitima yawo kuti ŵachite khumbo lakhe, pakuchita na mtima umoza na kupereka mazaza ghawo ku chikoko, ghasuke ghafiskike mazgu gha Chiuta.”

¹⁸“Mwanakazi uyo ukawona yura, ndiwo msumba ukuru weneuwo ukuwusa ŵakaronga wose pa charu cha pasi.”