Read new_tumbuka_bible Uvumbuzi 18 Bible Online

Uvumbuzi 18 - new_tumbuka_bible bible

Uvumbuzi 18

¹Pamanyuma pa ichi, nkhawona mungelo munyakhe wakwikha kufuma kuchanya na mazaza ghakuru ndipo charu cha pasi chikaŵala na uchindami wakhe.

²Wakachemerezga na mazgu ghakuru wakati, “Wawa! Wawa Babuloni msumba ukuru! Wazgoka malo ghakukharapo viŵanda, mphanji yakukharamo mizimu yose ya ukazuzi, mphanji ya mizimu yiheni mphanji ya viyuni viheni na vyakutinkhika.

³Pakuti mafuko ghose ghamwa vinyo vya maulamphalampha gha ukazuzi wakhe. Ŵakaronga ŵa pa charu cha pasi ŵakachita nayo uzaghali. Ŵanthu ŵa malonda ŵa pa charu chose cha pasi, ŵasambazga na nkhongono za luzokozoko lwakhe.”

⁴Pamanyuma pakhe nkhapulikaso mazgu ghanyakhe kufuma kuchanya, ghakuti, “Imwe ŵanthu ŵane, fumanimo mu msumba umo, mzire namwe munjiremo mu kwananga kwakhe, ndipo mupokere vilengo vyakhe.

⁵Pakuti zakwananga zakhe zawunjikika mpaka zafika na kuchanya, ndipo Chiuta wakumbuka nchito zakhe ziheni.

⁶Mumuchitire nga ndi umo iyo wakachitira kwa imwe, mumuwezgere kaŵiri pa ivyo wali kuchita ku ŵanthu ŵanyakhe. Mu nkhombo iyo wakamweskeramo ŵanji, mumuŵikiremo chakumwa icho nkhongono yakhe yiŵe kaŵiri kujumpha yira wakanozgera ŵanyakhe.

⁷Nga ndi umo iyo wakathumbwiranga na kujisanguruska na usambazi wakhe, namwe mumusuzge na kumuliriska. Pakuti mu mtima mwakhe wakuti, ‘Ine pano, ndine Fumukazi. Ine ndine chokoro chara, ndipo ndizamkutengerapo chara.’

⁸Ndicho chifukwa vilengo vyose, vyamkumwizira pa zuŵa limoza. Vilengo ivi ndi nthenda yakofya, chitengero na njara, ndipo wizamkocheka na moto. Pakuti njankhongono Fumu Chiuta iyo yikumweruzga.”

⁹Ndipo ŵakaronga ŵa charu cha pasi awo ŵakachita uzaghali na mwanakazi yura na kusangana nayo vya mu luzokozoko, ŵizamkumulira na kutengera chifukwa iyo para ŵakulaŵiska josi la kuphya kwakhe.

¹⁰Iwo ŵamkwimilira kutali chifukwa cha kofyeka na kutambuzgika kwakhe. Ndipo ŵamkuyowoya kuti, “Soka mwe! Soka mwe! Iwe msumba ukuru! Iwe Babuloni, msumba wankhongono! Mu ora limoza pera, kweruzgika kwako kwafika!”

¹¹Ŵanthu ŵa malonda ŵa pa charu chose cha pasi, ŵamkumulirira na kumutengerera, pakuti palije munthu wakugulaso malonda ghawo.

¹²Palije wakugula malonda gha golide, siliva, vitowelo na ngale; malonda gha salu za bafuta muweme, za kururupira, za siliki na ziswesi; malonda gha mitundu yose ya makuni ghakununkhira, vinthu vyose vyakupangika kufuma ku minyanga ya zovu, vinthu vyose vyakupangika kufuma ku makuni ghakuzirwa, mkuŵa, chisulo na libwe lakutowa;

¹³malonda gha vyakununkhira vya kinamoni,[5] vyakununkhiskira, vyakununkhira, mure na lubani; malonda gha vyakurya vya mitundumitundu nga vinyo, mafuta, ufu wakunyiririka na tirigu; malonda gha ng'ombe, mberere, mahachi na magareta ghawo; malonda gha ŵazga na gha ŵanthu ŵanyakhe.

¹⁴Ŵamalonda ŵara ŵamkumuphalira kuti, “Vipambi vyakuphya ivyo mtima wako ukulamphalampha navyo, vyakumalira. Usambazi wako wose na uchindami wako vyawukako kwa iwe. Kuti uti uvisangengeso chara.”

¹⁵Ŵanthu ŵakuguliska vinthu ivi awo ŵakasambazgirapo pa iyo, ŵizamkwimilira patali chifukwa chakofyeka na visuzgo vyakhe. Ŵizamkulira na kutengera chomene,

¹⁶ŵamkuti, “Soka mwe! Soka mwe, iwe msumba ukuru! Ukavwaranga salu zituŵa, salu zakururupira na ziswesi. Ukajitozganga na golide, ndiposo na vitowelo na ngale.

¹⁷Mu ora limoza pera, usambazi wose uwu wasakazika.” Wose ŵakwendeska na ŵakwenda mu ngaraŵa, wose ŵakwenda pa nyanja na awo ŵakuchita malonda ghawo pa nyanja ŵakimilira kutali.

¹⁸Pakuwona josi likutoroka mu msumba ura ukaphyanga, ŵakachemerezga ŵakati, “Ndi msumba ngu uwo ukalinganapo na msumba ukuru uwu?”

¹⁹Ŵakajithira fuvu pa mitu yawo, ndipo ŵakalira na kutengera chomene, ŵakati, “Soka mwe! Soka mwe! Iwe msumba ukuru! Msumba weneuwu ŵanthu wose awo ŵali na ngaraŵa pa nyanja, ŵakasambazga na usambazi wakhe! Kweni pa ora limoza pera wazgoka mapopa!”

²⁰Sekererani imwe mukukhara kuchanya chifukwa chakuparanyika kwakhe! Sekererani imwe ŵanthu ŵa Chiuta, imwe ŵakutumika na imwe nchimi. Pakuti Chiuta weruzga msumba uwu chifukwa cha ivyo ukachita kwa imwe!

²¹Ndipo mungelo yumoza wankhongono wakatora libwe, likuru lakuŵa nga ndi lwara, wakaliponya mu nyanja na kuyowoya kuti, “Umo ndimo Babuloni msumba ukuru wizamkuponyekera pasi mwa nkhongono ndipo wizamkuwonekaso chara.

²²Penepapo kulira kwa ŵabango, vilimbi vyakwimba fyoliro na zimbata, kuti vyamkupulikikwa chara mwa iwe. Ŵasiri wose ŵa milimo yakupambanapambana, kuti ŵizamkusangikamoso chara mwa iwe. Kulira kwa lwara kuti kwamkupulikikwamoso mwa iwe chara.

²³Mwa iwe mwizamkuwonekaso kuŵala kwa nyali chara. Mwa iwe mwizamkupulikwikaso mazgu gha mwene-nthengwa na mlowokazi chara. Ŵa malonda ŵako ŵakaŵa ŵanthu ŵakumanyikwa chomene mu charu cha pasi! Ndipo mafuko ghose ghakapusikika na ŵawukwi ŵako.”

²⁴Mu msumba wenewura mukasangika ndopa za nchimi, za ŵanthu ŵa Chiuta, ndiposo na za ŵanthu wose awo ŵakakomeka pa charu cha pasi.