Read new_tumbuka_bible Uvumbuzi 19 Bible Online

Uvumbuzi 19 - new_tumbuka_bible bible

Uvumbuzi 19

¹Pamanyuma pa ichi nkhapulika icho chikaŵa nga ndi mphomo yikuru ya mazgu gha mzinda ukuru kuchanya, yakuti, “Aleluya! Chiponosko, uchindami, na nkhongono nvya Chiuta withu,

²pakuti weruzgi wakhe ngwa unenesko na wakurunjika. Iyo weruzga muhule mukuru yura uyo wakanangiska charu cha pasi na uzaghali wakhe. Chiuta wawezgera nduzga pa iyo ndopa za ŵateŵeti ŵakhe.”

³Ŵanthu ŵara ŵakayowoyaso kachiŵiri ŵakati, “Aleluya! Josi la msumba ura likukwera kuchanya mpaka muyirayira.”

⁴Ŵarara ŵara 24 pamoza na vyamoyo vinayi vira, ŵakawa pasi, na kumusopa Chiuta uyo wakukhara pa chizumbe cha Ufumu, ŵakati, “Ameni! Aleluya!”

⁵Ndipo kufuma ku chizumbe kukapulikikwa mazgu ghakuti, “Chindikani Chiuta withu, imwe mose ŵateŵeti ŵakhe, imwe mukopa Chiuta, ŵachoko na ŵarara, imwe mukopa iyo.”

⁶Penepapo nkhapulika icho chikaŵa nga ndi mazgu gha mzinda ukuru wa ŵanthu nga ndikupoma kwa maji ghanandi, ndiposo nga chikhayokhayo chikuru cha leza, ghakati “Aleluya! Pakuti Fumu Chiuta withu Mwenenkhongono zose ndiyo wakuwusa.

⁷Tiyeni tisekerere, tikonde na kumuchindika iyo. Pakuti ukwati wa Mwana-mberere yura wafika, ndipo Mlowokazi wakhe ngwa kunozgeka.

⁸Iyo wakazomerezgeka kuvwara malaya gha bafuta muweme, ghakutowa na ghakugabuka.” Bafuta muweme ndi milimo yiweme ya ŵanthu ŵa Chiuta.

⁹Penepapo mungelo wakati kwa ine, “Lemba! Mbakutumbikika awo ŵakuchemeka ku chiphikiro cha nthengwa ya Mwana-mberere!” Ndipo wakayowoyaso wakati, “Agha ndi mazgu ghakuneneska gha Chiuta.”

¹⁰Penepapo nkhawa pasi pa malundi ghakhe kuti ndimulambire. Kweni iyo wakandiphalira kuti, “Reka kuchita ntheura. Ine nane ndine muteŵeti munyako pamoza na ŵanyako awo mbakaboni ŵa Yesu. Ulambirenge Chiuta.” Pakuti kumuchitira ukaboni Yesu ndiwo mzimu wa uchimi.

¹¹Ntheura nkhawona kuchanya kwajurika, ndipo hachi lituŵa. Uyo wakakharapo wakuchemeka, “Wakugomezgeka” ndiposo, “Wakuneneska.” Pakweruzga na pakurwa nkhondo, wakuchita na urunji.

¹²Maso ghakhe ghakaŵa nga nkhulilima kwa moto, ndipo pa mutu pakhe pakaŵa mphumphu zinandi za ufumu. Wali na zina lakulembeka ilo palije munthu wakulimanya kweni mwenecho pera.

¹³Munjilira uwo wakavwara ukabizgika mu ndopa. Munthu yura zina lakhe ndi, “Mazgu gha Chiuta.”

¹⁴Ndipo viwuru vya nkhondo vya kuchanya ivyo vikavwara malaya gha bafuta, ghakulipwitika, ghatuŵa na ghakutowa vikamurondezga pa mahachi ghatuŵa.

¹⁵Mu mlomo wa munthu yura mukufuma lupanga lwakuthwa lwakuti walangire mafuko gha ŵanthu. Wamkuwusa na ndodo ya chisulo ndipo wati wakandenge chakukamiramo vinyo cha ukari wa Chiuta Mwenenkhongono zose.

¹⁶Pa munjilira wakhe na pa chigha wakhe wali na zina lakulembeka, “Karonga wa ŵakaronga na Fumu ya mafumu.”

¹⁷Penepapo nkhawona mungelo uyo wakimilira pa dazi. Iyo wakachemerezga na mazgu ghakuru ku viyuni vyose ivyo vikuwuruka mukatikati mu mlengalenga kuti, “Zaninge mwize kawungane pamoza pa chiphikiro chikuru cha Chiuta!

¹⁸Mwakuti murye nyama ya ŵakaronga, nyama ya ŵarongozgi ŵa nkhondo, nyama ya mahachi na ya awo wakwerapo, na nyama ya ŵanthu wose, ŵanangwa na ŵazga, ŵakuru na ŵachoko wuwo.”

¹⁹Penepapo nkhawona chikoko, na ŵakaronga ŵa pa charu cha pasi, pamoza na mawumba ghawo gha ŵa nkhondo, ŵakawungana kurwa nkhondo na uyo wakukwera pa hachi, pamoza na mawumba gha ŵankhondo ŵakhe.

²⁰Chikoko chira chikakoreka pamoza na nchimi yitesi yira iyo yikachitanga vimanyikwiro panthazi pakhe. Ndipo na vyeneivi, yikapusika ŵanthu ŵanandi awo ŵakaŵa na chimanyikwiro cha chikoko chira na awo ŵakalambiranga chikozgo cha chikoko chira. Ŵakaponyeka ŵamoyo mu nyanja ya moto iyo yikugolera na sulufure.

²¹Ŵa nkhondo awo ŵakakharapo ŵakakomeka na lupanga la mweneuyo wakukhara pa hachi. Lupanga ulu lukafuma mu mlomo wakhe ndipo viyuni vyose vikarya na kukhuta minofu ya ŵanthu ŵara.