Read new_tumbuka_bible Uvumbuzi 2 Bible Online

Uvumbuzi 2 - new_tumbuka_bible bible

Uvumbuzi 2

¹“Ku mungelo wa mpingo wa Efeso ulembe: “Agha ndi mazgu gha uyo wakorera nyenyezi zinkhonde na ziŵiri ku woko lakhe la maryero, ndipo wakwenda mukati mu vyakuŵikapo nyali vya golide vinkhonde na viŵiri.

²Nkhumanya milimo yako, kutokatoka kwako, na kufwirirapo kwako kwakuzizipizga. Nkhumanya kuti ulije kumanya kuŵazizipizgira ŵanthu ŵaheni, na kuti awo ŵakujichema kuti mbakutumika, kweni kuti ndiwo chara, waŵayezga ndipo waŵasanga kuti mbatesi.

³Nkhumanya kuti wafwirirapo kwakuzizipizga ndipo walimbalimba mu visuzgo chifukwa cha zina lane, ndipo ukuvuka chara.

⁴Kweni icho nkhukususka ndi ichi, kuti ukunditemwa ine nga ndi umo ukanditemweranga pakudanga chara.

⁵Kumbuka sono kuti ukaŵa pachanya chomene kweni ulikuwa! Ntheura ng'anamuka mu mtima ndipo uchite vinthu ivyo ukachitanga pakudanga. Usange ukung'anamuka chara, nditi ndizenge kwa iwe na kufumyako chakuŵikapo nyali pa malo ghakhe.

⁶Kweni chinthu chimoza icho ukuchita makora ndi ichi: ukutinkha milimo ya ŵaNikolayi[2] iyo nane nkhuyitinkha.”

⁷“Uyo wali na makutu, rekani wapulike icho Mzimu wakuyowoya ku mipingo! “Kwa uyo wakutonda, ndimupenge mwaŵi wakurya vipambi vya khuni lakupereka umoyo ilo liri mu Paradiso la Chiuta.”

⁸“Ku mungelo wa mpingo wa Simerena ulembe: “Agha ndi mazgu gha uyo Ngwakudanga na Wakumalira, uyo wakafwa ndipo wakawereraso ku umoyo.

⁹Nkhumanya visuzgo vyako na ukavu wako, kweni uli musambazi. Nkhumanya vinthu viheni ivyo ŵakukuyowoyera ŵanthu awo ŵakujichema kuti mbaYuda, ndipo kuti mbaYuda chara, kweni mba mpingo wa Satana.

¹⁰Ureke kopa visuzgo ivyo vili pafupi kukuwira. Tegherezga! Satana wali pafupi kunjizga ŵanji ŵa imwe mu gadi, mwakuti muyezgeke, ndipo muti muŵenge mu visuzgo mazuŵa khumi. Ntheura khara wakugomezgeka mpaka na ku nyifwa ndipo ine nditi ndikupenge mphumphu ya umoyo.”

¹¹“Uyo wali na makutu, rekani wapulike icho Mzimu wakuyowoya ku mipingo! “Uyo wakutonda, wati wapwetekeke chara na nyifwa ya chiŵiri.”

¹²“Ku mungelo wa mpingo wa ku Peregamo ulembe: “Agha ndi mazgu gha uyo wali na lupanga lwakuthwa kosekose.

¹³Nkhumanya uko ukukhara, kwenekuko ndiko kuli chizumbe cha Satana. Iwe wakhara wakugomezgeka kwa ine. Kuti ukataya chipulikano chako mwa ine chara, nanga mpha nyengo ya Antipasi, kaboni wane wakugomezgeka uyo wakakomeka mukati mwinu uko Satana wakukhara.

¹⁴Kweni ndili na vinthu vichoko waka ivyo nkhukususka iwe vyakuti, ŵalimo ŵanthu ŵanji mukati mwinu awo ŵakurondezga chisambizgo cha Balaamu. Iyo wakamusambizga Balaki kuŵaŵikira chikhuŵazgo ŵaIsraele kuti ŵarye vyakurya ivyo vikaperekeka ku vikozgo, ndiposo na kuchita uheni.

¹⁵Ntheura na iwe wuwo uli na ŵanthu ŵanji awo ŵakusungilira visambizgo vya ŵaNikolayi.

¹⁶Sono ng'anamuka! Usange undachite ntheura, nditi ndizenge kwa iwe sonosono na kurwa nawe nkhondo na lupanga ulo lukufuma mu mlomo wane.”

¹⁷“Uyo wali na makutu, rekani wapulike icho Mzimu wakuyowoya ku mipingo! “Uyo wakutonda vyeneivi, nditi ndimupenge mana yakubisika. Ndimupenge libwe lituŵa na zina liphya lakulembeka pa libwe. Zina ili palije na yumoza wakulimanya, kweni uyo pera wakupokera libwe ili.”

¹⁸“Ku mungelo wa ku mpingo wa ku Tiyatira ulembe: “Agha ndi mazgu gha Mwana wa Chiuta, uyo maso ghakhe ghali nga nkhugalima kwa moto, ndipo malundi ghakhe ghakuŵala nga ndi mkuŵa wakutuwulika!

¹⁹Nkhumanya nchito zako, kutemwa kwako, chipulikano chako, na uteŵeti wako, ndiposo na kuzizipizga kwako. Nkhumanya kuti sono ukugwira nchito kuruska pakudanga para.

²⁰Kweni nkhukususka ichi, ukuzomerezga mwanakazi yura Yezebele, uyo wakujiphara kuti ndi nchimi yanakazi. Iyo uyu wakusambizga na kuŵapuruska ŵateŵeti ŵane kuti ŵachitenge uheni na kurya vyakurya vyakuperekeka ku vikozgo.

²¹Nkhamupa nyengo mwanakazi yura kuti wawereko ku zakwananga zakhe, kweni wakukana kuwerako ku uzaghali wakhe.

²²Ntheura nditi ndimuponye mu urwari, ndipo iyo pamoza na awo ŵakuchita nayo uleŵe nditi ndiŵaponye mu visuzgo vikuru usange ŵandawereko ku ivyo ŵakuchita.

²³Nditi ndiŵakome ŵana ŵakhe, ndipo mipingo yose ya Chiuta yamkumanya kuti ine ndine nkhusanda maghanoghano na mitima ya ŵanthu. Munthu yose nkhumupa njombe kwakuyana na milimo yakhe.”

²⁴“Kweni sono nkhuyowoya na imwe mwakharako mu Tiyatira, imwe mose mulije kurondezga chisambizgo chiheni ichi, ndiposo mulije kusambira vinthu ivyo ŵanji ŵakuti ‘Vyamuchibisibisi vikuru vya Satana.’ Kuti nditi ndiŵikepo kanthu kanyakheso kazitu pa iwe chara.

²⁵Kweni mukoreske icho muli nacho ndisuke ndize.

²⁶Yose uyo wakutonda na kurutilira kuchita icho nkhukhumba kuya kafika na ku umaliro, nditi ndimupenge mazaza pachanya pa mafuko.

²⁷Iyo wawusenge mafuko agha na ndodo ya chisulo, na kughaphwanya tuchokotuchoko nga ndi viŵiya vya dongo, nga ndi umo nkhapokera mazaza kwa Ŵadada.

²⁸Ndipo nditi ndiŵapenge nthanda[3] iyo ndi nyenyezi ya mulenje.”

²⁹“Uyo wali na makutu, rekani wapulike icho Mzimu wakuyowoya ku mipingo.”