Read new_tumbuka_bible Uvumbuzi 20 Bible Online

Uvumbuzi 20 - new_tumbuka_bible bible

Uvumbuzi 20

¹Pamanyuma pa ichi nkhawona mungelo wakwikha kufuma kuchanya. Mu mawoko ghakhe wakaŵa na chijuriro cha chizongwe chambula chigoti na unyoro ukuru.

²Mungelo wakakora chinjoka cha chiyamwaka chira icho chikuchemeka “Muryarya” panji “Satana” na kuchikaka virimika 1,000.

³Wakachiponya mu chizongwe chira na kuchijalira, na kukhozga pachanya pakhe mwakuti chireke kupusikaso mafuko gha ŵanthu, visuke vimare virimika 1,000. Ndipo pa umaliro wa virimika vira chinjoka chira chikwenera kusutulika kwa kanyengo kachoko waka.

⁴Sono nkhawona vizumbe ndipo awo ŵakakharako ŵakaŵa awo ŵakapika mazaza ghakweruzgira. Ndipo nkhawonaso mizimu ya awo ŵakadumurika mitu chifukwa chakupereka ukaboni wa Yesu na chifukwa cha mazgu gha Chiuta. Iwo kuti ŵakachilambira chikoko panji chikozgo chakhe chara, ndipo kuti ŵakaŵavye kupokera chimanyikwiro pa visko panji pa mawoko ghawo. Iwo ŵakawuka ku ŵakufwa ndipo ŵakawusa pamoza na Khristu virimika 1,000.

⁵Ŵanyakhe wose ŵakufwa kuti ŵakawuka chara mpaka virimika 1,000 vikamara. Uku ndiko kuwuka kwakudanga.

⁶Ngwakutumbikika ndipo ndi mutuŵa uyo wali mu chiwuka chakudanga ichi. Pa ŵa ntheura nyifwa ya chiŵiri kuti yili na mazaza pa iwo chara. Kweni ŵamkuŵa ŵasofi ŵa Chiuta na ŵa Khristu, ndipo ŵamkuwusa pamoza nayo virimika 1,000 chimoza.

⁷Para virimika 1,000 vira vyamara, Satana wizamkusutulika kufuma mu gadi lakhe.

⁸Ndipo wizamkuruta kuya kapusika mafuko agho ghali mu ngodya zinayi za charu cha pasi, Gogi na Magogi na kuŵawunganya pamoza kuti ŵarwe nkhondo. Unandi wawo ŵali nga ndi muchenga wa mu nyanja.

⁹Ŵakaparanyikira kosekose mu charu cha pasi na kuzingirizga msasa wa ŵanthu ŵa Chiuta na msumba wakhe wakutemweka. Kweni moto ukikha kufuma kuchanya, na kuŵamara petu.

¹⁰Penepapo Satana mweneuyo wakaŵapusika, wakaponyeka mu nyanja ya moto na sulufureumo mukaŵa chikoko na nchimi yitesi, ndipo ŵati ŵatambuzgike mwenemura muhanya na usiku kwa muyirayira swii.

¹¹Pamanyuma pa ichi nkhawona chizumbe chikuru chituŵa, na uyo wakakharapo. Charu cha pasi na mtambo vikachimbira kufuma pa maso pakhe, ndipo kuti vikawonekaso chara.

¹²Ndipo nkhawona ŵanthu ŵakufwa ŵakuzirwa na ŵambula kuzirwa ŵakwimilira panthazi pa chizumbe chira. Mabuku ghakajurika. Sono buku linyakhe likajurika ilo ndi Buku la ŵamoyo. Ŵakufwa ŵakeruzgika kwakuyana na milimo yawo iyo yikalembeka.

¹³Ntheura nyanja yikapereka wose awo ŵakafwira mwenemumo. Nyifwa na Gehena vikapereka ŵakufwa ŵawo, ndipo waliyose wakeruzgika kwakuyana na nchito zakhe.

¹⁴Ntheura nyifwa na Gehena vikaponyeka mu nyanja ya moto. Nyanja ya moto iyi ndiyo nyifwa ya chiŵiri.

¹⁵Ndipo usange zina la munthu waliyose likasangika kuti lindalembeke mu Buku la ŵamoyo, iyo wakaponyeka mu nyanja ya moto.