Read new_tumbuka_bible Uvumbuzi 21 Bible Online

Uvumbuzi 21 - new_tumbuka_bible bible

Uvumbuzi 21

¹Ntheura nkhawona kuchanya kuphya na charu chiphya. Pakuti kuchanya kwakudanga kura na charu cha pasi chakudanga chira vili kumara. Nyanja nayo kuti yikaŵakoso chara.

²Nkhawona msumba utuŵa, Yerusalemu muphya wakwikha kufuma kuchanya kwa Chiuta, wakunozgeka nga ndi mwali uyo wajitozga kuya kakumana na mufumu wakhe.

³Ndipo nkhapulika mazgu ghakuru kufuma ku chizumbe ghakuti, “Malo ghakukharamo Chiuta na ŵanthu. Iyo wizamkukhara nawo pamoza, ndipo iwo ŵizamkuŵa ŵanthu ŵakhe. Chiuta iyomwene wati waŵenge nawo pamoza nga Chiuta wawo.

⁴Wati wafyure masozi ghose mu maso ghawo, ndipo nyifwa kuti yamkuŵakoso chara. Nanga nchitengero, panji kulira, nesi vyakuŵinya kuti vyamkuŵakoso chara, chifukwa vyakudanga vyose vili kumara.”

⁵Ndipo uyo wakakhara pa chizumbe wakati, “Sono vinthu vyose nkhuvizgora viphya.” Wakatiso, “Lemba mazgu agha, pakuti ngakugomezgeka na gha unenesko.”

⁶Ndipo wakarutilira kundiphalira kuti, “Vyafiskika! Ndine Alefa na Omega, Jando na Umaliro. Uyo wali na nyota, nditi ndimupenge kwa wanangwa maji kufuma pa mbwiwi ya maji gha umoyo.

⁷Yose uyo watonda, ndiyo wati waharenge vyeneivi, ndipo ine nditi ndiŵenge Chiuta wakhe, iyo wati waŵenge mwana wane.

⁸Kweni ŵanthu awo ŵali na wofi, ŵambula chipulikano, ŵakuchita vya ukazuzi, ŵakukoma, ŵazaghali, ŵawukwi, ŵakusopa vikozgo na ŵatesi wose ŵamkuponyeka mu nyanja iyo yikugolera na moto na sulufure. Iyi ndiyo nyifwa ya chiŵiri.”

⁹Yumoza wa ŵangelo ŵankhonde na ŵaŵiri ŵara, awo ŵakaŵa na ŵabakule ŵankhonde na ŵaŵiri ŵakuzura na vilengo vya umaliro vinkhonde na viŵiri, wakiza ndipo wakayowoya nane wakati, “Zanga kuno ndizakakurongore mlowokazi mweneuyo ndi muwoli wa Mwana-mberere.”

¹⁰Ndipo mungelo wakandiyegha mu Mzimu kuruta nane ku phiri likuru na litali. Wakandirongora Yerusalemu msumba utuŵa ukwikha pasi kufuma kuchanya kwa Chiuta.

¹¹Ukaŵala na uchindami wa Chiuta. Kuŵala kwakhe kukaŵa nga ndi kuŵala kwa libwe lakuzirwa chomene, nga ndi libwe lituŵa lakulangala nga sangalawe.

¹²Msumba ura ukaŵa na linga likuru na litali ilo likaŵa na vipata 12 na ŵangelo 12 pa vipata. Pa vipata vira pakalembeka mazina gha mafuko 12 gha ŵaIsraele.

¹³Kukaŵa vipata vitatu ku mafumiro gha dazi, ku mpoto vipata vitatu, ku mwera vipata vitatu ndipo ku manjiliro gha dazi, vipata vitatu.

¹⁴Ndipo chiliŵa cha msumba chikaŵa na malufura 12, ndipo pakalembeka mazina 12 gha ŵakutumika 12 ŵa Mwana-mberere.

¹⁵Ndipo mungelo uyo wakayowoyanga nane, wakakorera ndodo ya golide, kuti wapime msumba ura, vipata vya msumba ndiposo na viliŵa vyakhe.

¹⁶Msumba ukazengeka mwakuyana waka mu utali na mu ufupi. Mungelo yura wakapima msumba ura na ndodo yakhe ndipo ukaŵa makilomita 2,200 mu utali wakhe. Mu usani wakhe na mu kukwera kwakhe, vikuyana waka.

¹⁷Ndiposo wakapima chiliŵa chakhe, chikaŵa mamita 65 mu kukwera kwakhe. Mungelo yura wakapima kwakuyana na kapimiro ako munthu wakapimiranga.

¹⁸Linga la msumba likaŵa la mawe ghatuŵa, ndipo msumba ukaŵa wa golide mwenemwene nadi, wakulangala nga ndi galasi.

¹⁹Lufura lwa viliŵa vya msumba lukaroŵeka na mawe ghakuzirwa ghamitundumitundu. Libwe lakwamba likaŵa lituŵa, la chiŵiri likaŵa la bululu nga mtambo, la chitatu likaŵa lituwulufu, la chinayi likaŵa lakubiriŵira,

²⁰la chinkhonde likaŵa lichesamu, la chinkhonde na chimoza likaŵa liswesi, la chinkhonde na chiŵiri likaŵa la nthura, la chinkhonde na chitatu likaŵa lakubiriŵira kwa ufipa, la chinkhonde na chinayi likaŵa lakuwoneka nga chiziro, la khumi likaŵa lakubiriŵirabiriŵira, la 11 likaŵa la bululu pera, ndipo la 12 likaŵa la libwe liswesi lakuti che.

²¹Vipata 12 vikaŵa vya ngale 12, chilichose chikapangika na ngale yimoza. Ndipo msewu wa msumba ukanozgeka na golide mwenecho, wakulangala nga ndi galasi.

²²Ndipo mu msumba nkhawonamo Nyumba ya Chiuta chara pakuti nyumba yakhe ndi Fumu Chiuta Mwenenkhongono zose na Mwana-mberere.

²³Msumba kuti ukukhumba dazi panji mwezi kuŵaliramo chara, chifukwa uchindami wa Chiuta ndiwo ungweru wakhe, ndipo nyali yakhe ndi Mwana-mberere.

²⁴Mafuko gha ŵanthu ghati ghendenge mu ungweru wakhe ndipo ŵakaronga ŵa charu chose cha pasi ŵamkwiza mwenemumo na uchindami wawo.

²⁵Vipata vyakhe kuti viti vijarikenge chara zuŵa lose chifukwa kwamkuŵavye usiku.

²⁶Ŵakaronga ŵati ŵizenge mwenemumo na uchindami na kuzirwa kwa mafuko.

²⁷Kuti kwamkunjira kanthu kalikose kakukazuzgika mu msumba ura chara nesi munthu uyo wakuchita vya ukazuzi panji ndi mutesi, kweni awo ŵali kulembeka mu buku la ŵamoyo la Mwana-mberere.