Read new_tumbuka_bible Uvumbuzi 22 Bible Online

Uvumbuzi 22 - new_tumbuka_bible bible

Uvumbuzi 22

¹Penepapo mungelo yura wakandirongora mronga wa maji gha umoyo gheneagho ghakujeduka nga ndi galasi. Mronga uwu ukafumanga ku chizumbe cha Chiuta na cha Mwana-mberere,

²Ndipo ukakhira na kuporota pakati pa msewu wa mu msumba. Ndipo sirya lirilose la mronga ura pakamera khuni la umoyo, na mitundu 12 ya vipambi. Khuni ili likapambikanga vipambi vyakhe mwezi uliwose, ndipo mahamba gha khuni ngakuchizgira mafuko gha ŵanthu wose.

³Mu msumba ura kuti mwamkusangika kanthu kalikose chara ako nkhakutembeka na Chiuta. Kweni chizumbe cha Ufumu cha Chiuta na cha mwana-mberere chizamkukhara mwenemura ndipo ŵateŵeti ŵakhe ŵamkumulambira Chiuta.

⁴Ŵamkuwona chisko chakhe ndipo zina lakhe lamkulembeka pa visko vyawo.

⁵Usiku kuti wamkuŵakoso chara. Kuti ŵamkukhumba ungweru wa nyali panji wa dazi chara pakuti Fumu Chiuta ndiyo wizamkuŵa ungweru wawo. Ndipo ŵamkuwusa kwa muyirayira swii.

⁶Ntheura mungelo wakandiphalira kuti, “Mazgu agha ngakugomezgeka na ghakuneneska. Ndipo Fumu, Chiuta wa mizimu ya nchimi, wakatuma ŵangelo ŵakhe kuŵarongora ŵateŵeti ŵakhe ivyo vikwenera kuchitika sonosono.”

⁷“Tegherezgani! Nkhwiza sonosono. Mbakutumbikika ŵanthu awo ŵakusungilira mazgu gha uchimi uwu agho ghali mu buku ili.”

⁸Ine Yohane, ndine nkhapulika na kuviwona vinthu ivi. Para nkhapulika na kuviwona, nkhawa pasi kuti ndisope pa malundi gha mungelo uyo wakandirongoranga vinthu ivi.

⁹Kweni wakati kwa ine, “Ungachitanga icho chara. Ine nane ndine muteŵeti nga ndiwe, ndipo nkhuyana waka na ŵabali ŵako awo ndi nchimi na wose awo ŵakusunga mazgu agho ghali kulembeka mu buku ili. Chiuta ndiyo umulambirenge.”

¹⁰Wakandiphaliraso wakati, “Ureke kubisa mazgu gha uchimi wa buku ili, chifukwa nyengo yili pafupi.

¹¹Rekani uyo ŵakuchita uheni warutilire kuchita uheni, ndipo mukazuzi warutilire kuŵa mukazuzi, ndipo murunji, warutilire kuchita urunji, ndipo uyo ndi mutuŵa nayo warutilire kuŵa mutuŵa.”

¹²“Tegherezgani! Nkhwiza sonosono. Nkhwiza na njombe zane kuti ndipereke kwa waliyose kwakuyana na milimo yakhe.

¹³Ine ndine Alefa na Omega, Wakudanga na Wakumalira, Jando na Umaliro.”

¹⁴Mbakutumbikika awo ŵakuchapa minjilira yawo, mwakuti ŵaŵe na wanangwa wakuryera vipambi vya khuni la umoyo, ndiposo kuti ŵanjire mu msumba pakunjilira pa vipata vira.

¹⁵Kweni kuwaro kwa msumba kuli zincheŵe, ŵawukwi, ŵaleŵe, ŵakukoma, ŵakusopa vikozgo na wose awo mbatesi mu mazgu na mu machitiro.

¹⁶“Ine Yesu ndatuma mungelo wane kwa imwe na ukaboni uwu ku mipingo ya Chiuta. Ndine musisi na mphapu ya Davide. Ndine Nthanda, nyenyezi yakuŵala na mulenje.”

¹⁷Mzimu na Mlowokazi ŵakuti, “Zanga.” Ndipo rekani uyo wakupulika wayowoye kuti, “Zanga.” Ndipo rekani uyo womirwa wize, ndipo uyo wakukhumba, rekani wamwe maji gha umoyo kwa wanangwa.

¹⁸Nkhumuchenjezga waliyose uyo wakupulika mazgu gha uchimi agho ghali mu buku ili. Usange munthu yunji wakuŵikirako kanthu ku mazgu agha, Chiuta wati wamusazgirepo vilengo ivyo vyalembeka mu buku ili.

¹⁹Usange munthu wakuwuskako mazgu gha Buku la uchimi uwu, Chiuta wamkuwuskako kwa iyo chigaŵa chakhe ku khuni la umoyo, na ku msumba utuŵa, vyeneivyo vyarongosoreka mu buku ili.

²⁰Mweneuyo wakupereka ukaboni ku vinthu ivi wakuti, “Inya nadi, nkhwiza sonosono.” Ameni. Zaninge Fumu Yesu!

²¹Uchizi wa Fumu Yesu uŵenge na ŵatuŵa wose. Ameni.