Read new_tumbuka_bible Uvumbuzi 3 Bible Online

Uvumbuzi 3 - new_tumbuka_bible bible

Uvumbuzi 3

¹“Ku mungelo wa mpingo wa Saradisi ulembe: “Agha ndi mazgu gha uyo wali na mizimu yinkhonde na yiŵiri ya Chiuta, na nyenyezi zinkhonde na ziŵiri. Nkhumanya milimo yako. Uli na lumbiri lwakuti ndiwe wamoyo, kweni ndiwe wakufwa!

²Uŵe maso! Icho chakharako ndipo chili pafupi kufwa uchikhozge. Pakuti ndasanga kuti nchito zako kuti nzakufikapo chara panthazi pa Chiuta wane.

³Sono kumbuka mazgu agho ukasambira na kughapulika. Ughasunge ndipo ung'anamuke ku zakwananga zako. Usange utondekenge kuŵa maso, nditi ndizenge nga ndi munkhungu ndipo nyengo yakwizira kwa iwe uyimanyenge chara.

⁴Kweni uchali na ŵanthu ŵanji ŵachoko waka umo mu mpingo wa Chiuta mu Saradisi, ŵeneawo ŵalije kukazuzga vyakuvwara vyawo. Iwo ndiwo ŵizamkwenda pamoza na iwe uku ŵavwara vituŵa, chifukwa iwo mbakwenerera.

⁵Yose uyo wakutonda wizamkuvwarikika ntheura malaya ghatuŵa. Zina lakhe nditi ndisisitenge chara mu Buku la ŵamoyo ndipo ndizamkumuzomera pakweru panthazi pa Ŵadada na ŵangelo ŵakhe.

⁶“Uyo wali na makutu, rekani wapulike icho Mzimu wakuyowoya ku mipingo.

⁷“Ku mungelo wa mpingo wa ku Filadelifiya ulembe: “Agha ndi mazgu gha uyo ndi mutuŵa, uyo ngwa kuneneska ndipo wakukorera chijuriro cha Karonga Davide. Para wajula, palije munthu uyo wangajara, ndiposo para wajara, palije na yumoza uyo wangajula.

⁸Nkhumanya milimo yako. Wona ndakujulira muryango uwo palije munthu uyo wangajara ndipo nkhumanya kuti nkhongono zako nzichoko. Kweni wasunga mazgu ghane ndipo undakane zina lane.

⁹Wona awo mba mpingo wa Satana, ŵatesi ŵara, awo ŵakujipharazga kuti mbaYuda apo kuti ndiwo chara, ndiŵachemere panthazi pako kuti ŵalambe pa malundi ghako. Penepapo ŵamkumanya kuti ndiwe wakutemweka wane.

¹⁰Pakuti wasunga mazgu ghane na kuzizipizga kose, naneso ndamkukusungilira mu nyengo ya chiyezgo iyo yikwiza pano pasi kuŵayezga ŵanthu wose.

¹¹Nkhwiza sonosono. Koreska icho uli nacho, mwakuti paŵavye munthu wapoke mphumphu yako.

¹²Yose uyo wakutonda, nditi ndimuzgore kuŵa mzati wa Nyumba ya Chiuta wane. Kuti wafumengemo chara, ndipo pa iyo ndizamulemba zina la Chiuta wane na zina la msumba wa Chiuta wane. Msumba uwu ndi Yerusalemu muphya uwo ukwikha kufuma kuchanya kwa Chiuta wane. Pa iyo ndizamulembaso zina lane liphya.

¹³“Uyo wali na makutu, rekani wapulike icho Mzimu wakuyowoya ku mipingo.

¹⁴“Ku mungelo wa mpingo wa Laodekeya ulembe: “Agha ndi mazgu gha Ameni, uyo ndi kaboni wakugomezgeka na wa unenesko, wakwamba wa vilengiwa vya Chiuta vyose.

¹⁵Nkhumanya milimo yako, kuti uli wakuzizima chara nesi wakuthukira. Mphanyi waŵa wakuzizima panji wakuthukira ndipo.

¹⁶Sono pakuti uli wakufunda waka, kuti ukuzizima nesi kuthukira chara, nditi ndikufunye mu mlomo wane.

¹⁷Sono pakuti ukuti, ‘Ndili musambazi, ndipo ndili na vyose, kuti nkhukavuka kanthu chara,’ kweni ulije kumanya kuti ndiwe msokwano, wakulenga lusungu, mukavu, wachiburumutira na wa nkhule.

¹⁸Ntheura urongozgi uwo nkhukupa ngwa kuti, ugule kwa ine golide ilo liri kwengetuka lekha fikepo mwakuti uŵe musambazi. Ugule kwa ine munjilira utuŵa ndipo ujivwarike mwakuti ubise nkhule yako iyo yikukukhozga soni. Ndiposo ugule kwa ine munkhwara wa maso kuti uphake mu maso ghako mwakuti ulaŵiske.

¹⁹Wose awo nkhuŵatemwa, nkhuŵachenya na kuŵalanga. Ntheura uŵe na phamphu ndipo ung'anamukeko ku zakwananga zako.

²⁰Ine nkhwimilira pa muryango na kukhung'uska. Usange munthu wakupulika mazgu ghane na kujula muryango, nditi ndinjirenge mwa iyo ndipo ndiryenge nayo ndipo nayo waryenge na ine.

²¹Yose uyo wakutonda, nditi ndimuzomerezgenge kuti wakhare na ine pa chizumbe chane, nga ndi umo ine nane, nkhatondera, na kukhara pamoza na Ŵadada pa chizumbe chawo.

²²“Uyo wali na makutu, rekani wapulike icho Mzimu wakuyowoyera mipingo.”