Read new_tumbuka_bible Uvumbuzi 4 Bible Online

Uvumbuzi 4 - new_tumbuka_bible bible

Uvumbuzi 4

¹Pamanyuma pa ichi, nkhaŵa na mboniwoni yinyakhe ndipo nkhawona muryango wakujurika kuchanya. Ndipo mazgu ghakwamba agho nkhapulika nga nkhulira kwa mbata ghakati, “Kwerera kuno kuchanya, ndipo nditi ndikurongorenge ivyo vikwenera kuchitika pamanyuma pa ivi.”

²Nyengo yeneyira Mzimu wakandizira, ndipo nkhawona chizumbe kuchanya, ndipo pa chizumbe chira munthu yumoza wakakharapo.

³Uyo wakakhara pa chizumbe chira wakawoneka wakuŵala nga ndi mawe ghatuŵa na ghaswesi ghakung'azima. Ndipo pakaŵa chiŵingavura icho chikazingirizga chizumbe chira icho kawonekero kakhe kakaŵa kakung'azima nga ndi libwe lakubiriŵira.

⁴Kuzingirizga chizumbe chira pakaŵa vizumbe 24. Pa vizumbe ivi pakakhara ŵarara 24, awo ŵakavwara malaya ghatuŵa. Ndipo pa mitu yawo ŵakavwara mphumphu za golide.

⁵Ŵaleza ŵakamwetukanga kufuma ku chizumbe chira na kulira kwa vikhayokhayo, pamoza na kududumira kukuru mu maŵingu. Panthazi pa chizumbe chira pakaŵa nyali zinkhonde na ziŵiri izo zikagoleranga. Iyi ndiyo mizimu yinkhonde na yiŵiri ya Chiuta.

⁶Ndipo panthazi pa chizumbe pakaŵa chinthu icho chikawoneka nga ndi nyanja ya galasi ndipo chikakozgana na libwe la sangalawe. Kuzingirizga chizumbe uku na uku, kukaŵa vyamoyo vinayi, vyeneivyo vikaŵa na maso ghanandinandi kunthazi na kumanyuma.

⁷Ndipo chamoyo chakudanga chikaŵa nga ndi nkharamu, cha chiŵiri chikaŵa nga ndi nkhambako. Cha chitatu chikaŵa nga ndi chisko cha munthu, ndipo cha chinayi chikaŵa nga ndi nombo iyo yikuwuruka.

⁸Ndipo chose cha vyamoyo vinayi vira chikaŵa na mapapindo ghankhonde na limoza, ndipo chikaŵa na maso ghanandi kuwaro na mukati zingirizge. Muhanya na usiku vyamoyo vira vikimbanga kwambula kureka, kuti, “Mutuŵa, Mutuŵa, Mutuŵa, ndi Fumu Chiuta Mwenenkhongono zose, mweneuyo wakaŵako, waliko ndiposo wakwiza!”

⁹Ndipo pose apo vyamoyo vikupereka marumbo, nchindi na kuwonga kwa uyo wakukhara pa chizumbe chira uyo ngwamoyo muyirayira swii,

¹⁰penepapo ŵarara ŵara 24, ŵakuwa pasi panthazi zakhe mweneuyo wakukhara pa chizumbe na kumusopa uyo ngwamoyo muyirayira swii. Ŵakuponya mphumphu zawo panthazi pa chizumbe na kuyowoya kuti,

¹¹“Imwe Fumu na Chiuta withu, ndimwe mukwenera kupokera marumbo, nchindi na nkhongono. Pakuti ndimwe mukalenga vinthu vyose, ndimwe mukakhumba kuti vinthu vyose viŵeko, ndipo nadi vikalengeka.”