Read new_tumbuka_bible Uvumbuzi 5 Bible Online

Uvumbuzi 5 - new_tumbuka_bible bible

Uvumbuzi 5

¹Ndipo nkhawona buku mu woko la maryero la uyo wakakhara pa chizumbe. Buku ili likalembeka mukati na kuwaro ndipo likadindika na vidindo vinkhonde na viŵiri.

²Ndipo nkhawona mungelo wankhongono uyo wakachemerezga na mazgu ghakuru wakati, “Ndi njani uyo ngwakwenerera kujula buku ili na kugagaula vidindo vyakhe?”

³Kweni kukaŵavye nanga njumoza kuchanya panji pa charu cha pasi nesi kusi kwa charu mweneuyo wakamanya kujula buku lira panji kuwona mukati mwakhe.

⁴Nkhalira chomene chifukwa kukaŵavye munthu uyo wakamanya kujula buku lira panji kuwona mukati mwakhe.

⁵Ntheura yumoza wa ŵarara wakandiphalira wakati, “Reka kulira! Wona nkharamu ya fuko la Yuda, Muzukuru wa Karonga Davide ndiyo watonda. Ndipo ndiyo wangajula buku ili na kugagaula vidindo vyakhe vinkhonde na viŵiri.”

⁶Ndipo pakatikati pa chizumbe na vyamoyo vinayi na pakatikati pa ŵarara nkhawona Mwana-mberere wakwima nga ndi para wakomeka. Wakaŵa na masengwe ghankhonde na ghaŵiri na maso ghankhonde na ghaŵiri, ivyo ndi mizimu yinkhonde na yiŵiri ya Chiuta iyo yikatumika mu charu chose cha pasi.

⁷Mwana-mberere wakiza ndipo wakatora buku lira kufuma mu woko la maryero la uyo wakakhara pa chizumbe.

⁸Para wakati watora buku lira, vyamoyo vinayi vira pamoza na ŵarara 24 vikawa panthazi pa Mwana-mberere na kumulambira. Yumozayumoza wa ŵarara ŵara wakaŵa na viding'indi ndiposo na bakule wa golide wakuzura na vyakununkhira ivyo ndi malurombo gha ŵanthu ŵa Chiuta.

⁹Ndipo ŵakimba sumu yiphya kuti, “Mwakwenerera ndimwe kutora buku, na kugagaula vidindo vyakhe. Pakuti mukakomeka, ndipo na ndopa zinu, mukawombolera ŵanthu ŵanandi kwa Chiuta, kufuma ku mitundu yose, na viyowoyero vyose, na ŵanthu wose ndipo na mafuko ghose.

¹⁰Mulikuŵazgora kuŵa mu ufumunkhuru na ŵasofi ŵakuteŵetera Chiuta withu, ndipo iwo ŵawusenge pa charu cha pasi.”

¹¹Ndipo nkhalaŵiska na kupulika mazgu gha ŵangelo ŵanandi, awo ŵakaŵa 10,000 kwandaniskapo 10,000 na 1,000 vya awo ŵakimilira kuzingirizga chizumbe chira, na vyamoyo vinayi vira na ŵarara ŵara,

¹²na mazgu ghakuru ŵakati: “Mwana-mberere uyo wakakomeka ndiyo ngwakwenerera kupokera mazaza, usambazi, mahara, nkhongono, nchindi, uchindami na marumbo!”

¹³Ndipo nkhapulika mazgu gha vilengiwa vyose vya kuchanya na vya pano pasi na vya kusi kwa charu, na vya mu nyanja, na vyose mwenemumo. Vyose pamoza vikimbanga kuti, “Kwa uyo wakukhara pa chizumbe, na kwa Mwana-mberere, kuŵenge marumbo, uchindami, nchindi na nkhongono muyirayira swii.”

¹⁴Ndipo vyamoyo vinayi vira vikati, “Ameni.” Penepapo ŵarara ŵara ŵakawa kavunama kumulambira na kumusopa.