Read new_tumbuka_bible Uvumbuzi 6 Bible Online

Uvumbuzi 6 - new_tumbuka_bible bible

Uvumbuzi 6

¹Sono nkhawona Mwana-mberere yura wakugagawura chimoza cha vidindo vinkhonde na viŵiri vira, ndipo nkhapulika chimoza cha vyamoyo vira chikuchemerezga na mazgu ghakuru ghakulingana waka na chikhayokhayo, chikati, “Zanga.”

²Nkhalaŵiska, ndipo nkhawona hachi lituŵa. Munthu uyo wakakwerapo wakaŵa na uta ndipo ŵakamupa mphumphu. Wakafuma nga ndi ngwazi yeneiyo yikupenja uyo yingamutonda.

³Para Mwana-mberere wakagagawura chidindo cha chiŵiri, nkhapulika chamoyo cha chiŵiri chikuti, “Zanga!”

⁴Ndipo hachi linyakhe liswesi likafuma. Munthu uyo wakakwerapo wakapika mazaza kuti wawuskepo mutende pa charu cha pasi, kuti ŵanthu ŵakomanenge. Ndipo wakapika lupanga lukuru.

⁵Para Mwana-mberere wakagagawura chidindo cha chitatu, nkhapulika chamoyo cha chitatu chikuti, “Zanga.” Nkhalaŵiska ndipo nkhawona hachi lifipa. Munthu uyo wakakwerapo wakakorera chakupimira mu woko lakhe.

⁶Kufuma mukati mu vyamoyo vira, nkhapulika icho chikaŵa nga ndi mazgu agho ghakati, “Mweso wa lita limoza la tirigu uŵe malipiro gha zuŵa limoza, ndiposo na mweso wa malita ghatatu gha nyauti uŵe malipiro gha zuŵa limoza. Kweni ungananganga chara mafuta na vinyo!”

⁷Para Mwana-mberere wakagagawura chidindo cha chinayi, nkhapulika chamoyo cha chinayi chikuti, “Zanga!”

⁸Nkhalaŵiska ndipo nkhawona hachi lituwulufu. Munthu uyo wakakwerapo wakachemeka nyifwa, ndipo Gehena likamurondezganga pamanyuma. Viŵiri ivi vikapokera mazaza gha chigaŵa chimoza mu vigaŵa vinayi vya charu kuti vikomenge ŵanthu na nkhondo, njara, nthenda yakofya na vikoko vya mu thengere.

⁹Para Mwana-mberere wakagagawura chidindo cha chinkhonde, nkhalaŵiska ndipo kusi kwa jochero la sembe nkhawona mizimu ya ŵanthu awo ŵakakomeka chifukwa cha kupharazga mazgu gha Chiuta, na ukaboni uwo ŵakarongoranga.

¹⁰Mizimu yira yikachemerezga na mazgu ghakuru kuti, “Imwe Fumu ya pachanya nkhanira yituŵa na yakuneneska, kasi mwamkuŵazizipizgira mpaka pauli kuti muŵeruzge na kuŵalanga ŵanthu awo ŵakatikoma ise?”

¹¹Ntheura yose wa iwo wakavwarikika munjilira utuŵa, ndipo wakaŵaphalira kuti ŵapumulepo kanyengo kachoko waka, usuke ukwane unandi wa ŵateŵeti ŵanyawo na ŵabali ŵawo, awo nawo ŵakapimikira kukomeka nga ndi umo iwo ŵakakomekera.

¹²Para Mwana-mberere wakagagawura chidindo cha chinkhonde na chimoza ndipo kukaŵa chindindindi chikuru, dazi likazgoka lifipa nga ndi salu yifipa, ndipo mwezi nawo ukachesama nga ndi ndopa.

¹³Ndipo nyenyezi zikambotokera pa charu, nga ndi umo khuni la chikuyu likumbotoskera vipambi para chimphepo chikulisunkhunya khuni.

¹⁴Ndipo mtambo ukamwalalikira nga ndi buku ilo likuzingika. Mapiri ghose na virwa vyose vikawuskikapo pa malo ghawo.

¹⁵Penepapo ŵakaronga ŵa mu charu, ŵakuwusa na ŵarongozgi ŵa nkhondo, ŵanthu ŵapachanya, ŵankhongono, ŵazga wose, na ŵanangwa wose, ŵakabisama mu zimphanji na mu majarawe gha mu mapiri.

¹⁶Ŵakachemerezga ku mapiri na ku majarawe ŵakati, “Wirani pa ise, mutibise kwa mweneuyo wakukhara pa chizumbe na ku ukari wa Mwana-mberere.

¹⁷Pakuti zuŵa likuru la ukari wawo, lafika. Kasi ndi njani uyo wangamanya kuchintha panthazi pakhe?”