Read new_tumbuka_bible Uvumbuzi 7 Bible Online

Uvumbuzi 7 - new_tumbuka_bible bible

Uvumbuzi 7

¹Pamanyuma pa ivi nkhawona ŵangelo ŵanayi ŵimilira pa ngodya zinayi za charu. Iwo ŵakakanizganga mphepo zinayi kuti zireke kuputa pa charu, panji pa nyanja, panji pa khuni lirilose.

²Ntheura nkhawonaso mungelo munyakhe wakukwera kufuma ku mafumiro gha dazi wali na chidindo cha Chiuta wamoyo. Na mazgu ghakuru wakachemerezga ku ŵangelo ŵanayi ŵara, awo Chiuta wakaŵapa mazaza kuti ŵanange charu na nyanja.

³Wakati, “Rekani kunanga charu, panji nyanja, nesi makuni, tisuke tiŵike chidindo pa visko vya ŵateŵeti ŵa Chiuta withu.”

⁴Ntheura nkhapulika unandi wa ŵanthu awo ŵakaŵikika chidindo cha Chiuta, ŵakaŵa 144,000. Ŵanthu aŵa ŵakafuma ku mafuko ghose gha Israele.

⁵Ŵa fuko la Yuda awo ŵakaŵa na chidindo pa visko vyawo ŵakaŵa 12,000. Kufuma mu fuko la Rubeni ŵakaŵa 12,000. Kufuma mu fuko la Gadi ŵakaŵa 12,000.

⁶Kufuma mu fuko la Ashere ŵakaŵa 12,000. Kufuma mu fuko la Nafutali ŵakaŵa 12,000. Kufuma mu fuko la Manase ŵakaŵa 12,000.

⁷Kufuma mu fuko la Simiyoni ŵakaŵa 12,000. Kufuma mu fuko la Levi ŵakaŵa 12,000. Kufuma mu fuko la Isakara, ŵakaŵa 12,000.

⁸Kufuma mu fuko la Zebuloni, ŵakaŵa 12,000. Kufuma mu fuko la Yosefe, ŵakaŵa 12,000. Kufuma mu fuko la Benjamini, ŵakaŵa 12,000.

⁹Pamanyuma pa ichi nkhalaŵiska ndipo mzinda ukuru wa ŵanthu uwo munthu kuti wangawupenda chara kufuma ku mafuko ghose, mitundu yose na ŵanthu wose, na viyowoyero vyose. Ŵakimilira panthazi pa chizumbe na pa maso pa Mwana-mberere ŵakavwara minjilira yituŵa uku ŵakorera mu mawoko ghawo mahamba gha mikambarara.

¹⁰Ŵakachemerezga na mazgu ghakuru ŵakati, “Chiponosko chikufuma kwa Chiuta withu, uyo wakukhara pa chizumbe, na kwa Mwana-mberere!”

¹¹Ŵangelo wose ŵakimilira kuzingirizga chizumbe chira, na ŵarara, na vyamoyo vinayi vira, ndipo ŵakawa kavunama panthazi pa chizumbe ndipo wakamulambira Chiuta,

¹²ŵakati, “Ameni! Marumbo, uchindami, mahara, kuwonga, nchindi, mazaza na nkhongono, viŵe kwa Chiuta withu kwa muyirayira swii! Ameni!”

¹³Ndipo yumoza wa ŵarara ŵara wakandifumba wakati, “Kasi mba njani aŵa ŵavwara minjilira yituŵa, ndipo ŵafuma nkhu?”

¹⁴Nkhamuzgora nkhati, “Sekuru, mukumanya ndimwe.” Ndipo wakandiphalira wakati, “Ŵeneaŵa ndiwo ŵafuma musuzgo yikuru yira, ndipo sono ŵali kusukutula minjilira yawo mu ndopa za Mwana-mberere.

¹⁵Ndicho chifukwa ŵali panthazi pa chizumbe cha Chiuta, ŵakumuteŵetera muhanya na usiku mu nyumba yakhe. Ndipo uyo wakukhara pa chizumbe wizamkuŵafukatira.

¹⁶Kuti ŵizamkufwaso na njara chara, nanga nkhomirwa na nyota. Kocha kwa dazi kuti kwizamkuŵakhwaska chara nesi chithukivu chakhe.

¹⁷Pakuti Mwana-mberere uyo wali pakati pa chizumbe, ndiyo wizamkuŵa muliska wawo, ndipo wizamkuŵarongozgera ku mbwiwi za maji gha umoyo. Chiuta wizamkuŵafyura masozi ghose mu maso ghawo.”