Read new_tumbuka_bible Uvumbuzi 8 Bible Online

Uvumbuzi 8 - new_tumbuka_bible bible

Uvumbuzi 8

¹Para Mwana-mberere wakagagawura chidindo cha chinkhonde na chiŵiri, kuchanya kukati waka yii kwakuyana na hafu wa ora limoza.

²Ndipo nkhawona ŵangelo ŵankhonde na ŵaŵiri awo ŵakwimilira panthazi pa Chiuta. Ndipo wakapika mbata zinkhonde na ziŵiri.

³Ndipo mungelo munyakhe wakiza na kwimilira pa jochero la sembe, wakaŵa na kabakule ka golide kakocheramo vyakununkhira. Ŵakamupa vyakununkhira vinandi kuti wavipereke kuŵa sembe pamoza na malurombo gha ŵanthu wose ŵa Chiuta awo ŵakimilira pa jochero la golide panthazi pa chizumbe.

⁴Ndipo josi la vyakununkhira likakwera pamoza na malurombo gha ŵanthu ŵa Chiuta kufuma mu woko la mungelo uyo wakimilira panthazi pa Chiuta.

⁵Ndipo mungelo wakatora kabakule ka vyakununkhira kara wakazuzgamo moto uwo wakatora pa jochero, ndipo wakakaponya pasi pa charu. Ntheura kukaŵa vikhayokhayo, chiwawa, kumwetula kwa ŵaleza na vindindindi.

⁶Sono ŵangelo ŵankhonde na ŵaŵiri awo ŵakaŵa na zimbata zinkhonde na ziŵiri ŵakanozgekera kuzirizga.

⁷Mungelo wakudanga wakalizga mbata yakhe, ndipo kukaŵa matalala na moto vyakusazgikana na ndopa. Ivi vikaponyeka pa charu cha pasi ndipo charu cha pasi chigaŵa chimoza mu vigaŵa vitatu chikaphya. Ndipo chigaŵa chimoza cha vitatu cha makuni chikaphya, ndipo utheka wose uŵisi wa biriŵiri ukaphya.

⁸Mungelo wa chiŵiri wakalizga mbata yakhe, ndipo chinthu icho chikawoneka nga ndi phiri likuru lakugolera moto likaponyeka mu nyanja, ndipo chigaŵa chimoza mu vigaŵa vitatu cha nyanja, chikazgoka ndopa.

⁹Ndipo vyamoyo chigaŵa chimoza mu vigaŵa vitatu ivyo vikaŵa mu nyanja vikafwa, ndiposo ngaraŵa, chigaŵa chimoza mu vigaŵa vitatu zikanangika.

¹⁰Mungelo wa chitatu wakalizga mbata yakhe, ndipo nyenyezi yikuru iyo yikagoleranga nga ndi chenje cha moto yikambotokera pasi kufuma kuchanya na kuwa pa mironga na pa mbwiwi za maji chigaŵa chimoza mu vigaŵa vitatu.

¹¹Zina la nyenyezi yira ndi “Mulangali.” Ndipo maji gha chigaŵa chimoza mu vigaŵa vitatu ghakazgoka kuŵa ghakuŵaŵa, ndipo ŵanthu ŵanandi ŵakafwa para ŵakati ŵamwa maji ghara chifukwa maji ghakaŵaŵanga.

¹²Mungelo wa chinayi wakalizga mbata yakhe, ndipo chigaŵa chimoza mu vigaŵa vitatu cha dazi, cha mwezi na cha nyenyezi vikatimbika. Ndipo chigaŵa chimoza mu vigaŵa vitatu vya ungweru wawo chikafipiskika. Pakaŵavyeso ungweru pa nyengo ya kukwana chigaŵa chimoza mwa vigaŵa vitatu vya zuŵa limoza na usiku nawo ntheura pera.

¹³Ntheura nkhalaŵisiska ndipo nkhapulika nombo apo yikawurukanga mu mlengalenga mukatikati na kuchemerezga na mazgu ghakuru kuti, “Soka! Soka! Soka ku ŵanthu awo ŵakukhara pa charu, chifukwa chakulira kwa zimbata zitatu izo zakharapo zeneizo ŵangelo ŵati ŵalizgenge.”