Read new_tumbuka_bible Uvumbuzi 9 Bible Online

Uvumbuzi 9 - new_tumbuka_bible bible

Uvumbuzi 9

¹Mungelo wa chinkhonde wakalizga mbata yakhe, ndipo nkhawona nyenyezi iyo yikawa kufuma kuchanya kwiza pasi. Nyenyezi iyi yikapika chijuriro cha chizongwe chambula chigoti.

²Nyenyezi yikajula chizongwe chira ndipo mukafuma josi ilo likaŵa nga ndi ilo likufuma mu ng'anjo yikuru ndipo dazi na mphepo vikafipiskika na josi la kufuma mu chizongwe.

³Zombe wakafuma mu josi lira, wakiza pa charu cha pasi ndipo wakapika luwozga ulo lukayana waka na lwa ŵakalizga ŵa mu charu.

⁴Ndipo zombe wakaphalirika kuti wareke kunanga utheka wa mu charu, panji chinthu chose icho nchiŵisi, nesi khuni lose ilo ndiŵisi. Kweni ŵanthu pera ŵeneawo ŵalije chimanyikwiro cha Chiuta pa visko vyawo.

⁵Zombe yura kuti wakazomerezgeka kuŵakoma chara, kweni kuŵasuzga pa myezi yinkhonde. Urwirwi wakhe ukaŵa nga ndi urwirwi wa kalizga para waruma munthu.

⁶Mu mazuŵa ghara, ŵanthu ŵamkupenja nyifwa, ndipo kuti ŵamkuyisanga chara. Ŵanthu ŵamkukhumba kufwa, kweni nyifwa yamkuŵachimbira.

⁷Mu kawonekero, zombe yura wakaŵa nga ndi mahachi agho ghanozgekera nkhondo. Pa mitu yawo pakaŵa chinthu icho chikawoneka nga ndi mphumphu ya golide ndipo visko vyawo vikakozgana na visko vya ŵanthu.

⁸Zombe yura wakaŵa na sisi nga ndi la ŵanakazi, ndiposo na mino ghakukozgana na gha nkharamu.

⁹Ndipo wakaŵa na vivikiriro panganga ivyo vikaŵa nga ndi ngunya za visulo. Kupoma kwa mapapindo ghawo kukaŵa nga ndi magareta agho ghakuguzika na mahachi ghanandi agho ghakuchimbilira ku nkhondo.

¹⁰Zombe yura wali na michira nga ndi ya ŵakalizga, ndiposo na maluwozga. Mu michira yawo ndimo mukaŵa nkhongono zakupwetekera ŵanthu pa myezi yinkhonde.

¹¹Zombe yura wali na karonga wawo, ndiyo mungelo uyo wakaŵa na mazaza pa chizongwe chambula chigoti. Zina lakhe mu chiHebere ndi Abadoni, mu chiGriki ndi Apoliyoni.[4]

¹²Soka lakudanga lira lajumpha, kweni kwakharaso masoka ghaŵiri agho ghati ghizenge ndipera.

¹³Mungelo wa chinkhonde na chimoza wakalizga mbata yakhe, ndipo nkhapulika mazgu ghakufumira ku masengwe ghanayi gha jochero la golide ilo likaŵa panthazi pa Chiuta.

¹⁴Lizgu likayowoya kwa mungelo wa chinkhonde na chimoza uyo wakaŵa na mbata kuti, “Sutula ŵangelo ŵanayi awo ŵali kukakika pa mronga ukuru wa Yufurate!”

¹⁵Ntheura ŵangelo ŵanayi ŵara, ŵeneawo ŵakaŵikikirathu kunozgekera ora, zuŵa, mwezi na chirimika kuti wakome ŵanthu chigaŵa chimoza cha vigaŵa vitatu, ŵakasutulika.

¹⁶Unandi wa awo ŵakakwera pa mahachi ŵakaŵa 200,000,000.

¹⁷Ntheura ndimo nkhawonera mahachi mu mboniwoni yane, awo ŵakakweranga mahachi, ŵakuvwara zingunya pa vifuŵa vyawo izo zikaŵa ziswesi nga ndi moto, za kubiriŵira, za nthura nga sulufure. Mitu ya mahachi yikakozgana na mitu ya nkharamu, ndipo mu milomo yawo mukafumanga moto, josi na sulufure.

¹⁸Vilengo vitatu ivi moto, josi, na sulufure ivyo vikafuma mu milomo ya mahachi ghara vikakoma ŵanthu chigaŵa chimoza mu vigaŵa vitatu.

¹⁹Pakuti nkhongono ya mahachi yili mu milomo, na mu michira yawo. Michira yawo yikaŵa nga ndi njoka iyo yikaŵa na mitu, ndipo yikapweteka ŵanthu na michira yeneyira.

²⁰Ŵanthu ŵanyakhe wose awo kuti ŵakakomeka pa vilengo ivi chara, kuti ŵakang'anamuka ku vinthu ivyo ŵakajipangira na mawoko ghawo chara. Kweni ŵakarutilira kusopa viŵanda, panji vikozgo vya golide, vya siliva vya mkuŵa, vya mawe na vya makuni. Vinthu ivyo kuti vikulaŵiska chara, nanga nkhupulika, nesi kwenda.

²¹Ŵanthu aŵa kuti ŵakang'anamukako chara ku uheni wakukoma ŵanyawo, wa kuwukwa, uzaghali na unkhungu.