Read new_tumbuka_bible Rute 1 Bible Online

Rute 1 - new_tumbuka_bible bible

Rute 1

¹Pa nyengo iyo ŵeruzgi ŵakawusiranga charu cha Israele, kukaŵa njara mu charu chira. Ndipo munthu yunji wa ku Betelehemu mu charu cha Yuda, wakaruta kuya kakhara mu charu cha Mowabu pamoza na muwoli wakhe ndiposo na ŵana ŵakhe ŵanarume ŵaŵiri.

²Zina la munthu yura wakaŵa Elimeleki ndipo muwoli wakhe wakaŵa Naomi. Mazina gha ŵana ŵakhe ŵakaŵa Maloni na Kiliyoni. Wose ŵakaŵa ŵa fuko la Efurayimu ku Betelehemu mu charu cha Yuda ndipo ŵakaruta ku charu cha Mowabu na kuya kakhara kwenekura.

³Elimeleki wakafwa ndipo muwoli wakhe Naomi wakakhara chokoro na ŵana ŵakhe ŵaŵiri.

⁴Ŵana ŵara ŵakatora ŵanakazi ŵa ku Mowabu. Yumoza wakatora Oripa ndipo munyakhe wakatora Rute. Iwo ŵakakhara kwenekura virimika khumi.

⁵Maloni na Kiliyoni nawoso ŵakafwa. Ntheura Naomi wakaŵa chokoro na wambula ŵana.

⁶Apo Naomi wakaŵa wachali mu Mowabu, wakapulika kuti mu charu cha Yuda FUMU yaŵatumbika ŵanthu ŵakhe pakuŵapa chakurya chinandi. Ntheura iyo pamoza na ŵakamwana ŵakhe ŵaŵiri ŵakamba kunozgekera ulendo wakuwerera ku charu cha kwakhe.

⁷Wakawuka pamoza na ŵakamwana ŵakhe kufuma apo ŵakakharanga kuwerera ku charu cha Yuda.

⁸Sono Naomi wakaŵaphalira ŵakamwana ŵakhe ŵaŵiri ŵara wakati, “Wererani, waliyose wa imwe ku nyumba ya ŵanyina. FUMU yiŵe namwe na lusungu nga ndi umo imwe namwe mukaŵira na lusungu na awo ŵali kufwa ndiposo na ine.

⁹FUMU yimovwirani kuti waliyose wa imwe watengwe ndipo wasange chikhazi mu nyumba ya mufumu wakhe.” Naomi wakaŵafyofyontha, ndipo iwo ŵakalira chomene.

¹⁰Penepapo iwo ŵakati kwa iyo, “Chara! Titi tiwerere namwe ku ŵanthu ŵa ku kwinu.”

¹¹Kweni Naomi wakati, “Mwa ŵana ŵane, wererani ku kaya kwinu. Kasi nchifukwa uli murutenge nane? Kasi ine ndingababaso ŵana ŵanarume kuti ŵaŵe ŵafumu ŵinu?

¹²Mwa ŵana ŵane, wererani ku kaya kwinu. Ine ndachekura chomene kuti ndingaŵaso na mufumu chara. Nanga ndingaŵa na chigomezgo, ndipo ndiŵe na mufumu usiku uno na kubaba ŵana,

¹³kasi muti mulindilire ŵasuke ŵakule? Kasi muzizipizgenge kuti mureke kutengwa? Chara, mwa ŵana ŵane. Nane mtima ukundipweteka chomene, chifukwa cha imwe, pakuti FUMU yandinyekezga chomene na visuzgo.”

¹⁴Ŵakati ŵapulika ichi ŵakaliraso chomene. Penepapo Oripa wakamufyofyontha nyinavyara pakumulayira, kweni Rute wakaskepererana nayo.

¹⁵Kweni Naomi wakati, “Wona, munyako wawerera ku kwakhe na ku ŵachiuta ŵakhe. Nawe rutanga, umurondezge munyako.”

¹⁶Kweni Rute wakati, “Mungandikoserezganga chara kuti ndimurekani, panji kuti ndireke kumurondezgani. Pakuti uko mukuruta, nane ndiko nditi ndirutenge ndipo uko mwamkukhara, ndiko nane ndamkukhara, ŵanthu ŵa ku kwinu, ŵamkuŵa ŵanthu ŵane, ndipo Chiuta winu wamkuŵa Chiuta wane.

¹⁷Uko mwamkufwira imwe ndiko nane ndamukufwira, ndipo ndamukusungika kwenekuko. FUMU yindilange ndipo chomene kwakuruska usange kanthu kalikose kangapatula ine kwa imwe, kweni nyifwa pera ndiyo.”

¹⁸Sono Naomi wakati wawona kuti Rute wanweka kuruta nayo, wakareka kumukoserezgaso.

¹⁹Ntheura wose ŵaŵiri wuwo ŵakaruta mpaka ŵakafika ku muzi wa Betelehemu. Ŵakati ŵafika, muzi wose ukayaghayika chifukwa cha iwo. Ndipo ŵanakazi ŵakati, “Kasi uyu ndi Naomi nadi?”

²⁰Naomi wakati kwa iwo, “Mungandichemanga kuti Naomi chara, kweni mutenge Mara, chifukwa Chiuta Mwenenkhongono zose wandiŵika mu vyakuŵinya vikuru.

²¹Para nkharutanga nkhaŵa navyo vyose kweni FUMU yandiwezga kwambula kanthu. Nchifukwa uli mukundichema kuti Naomi? FUMU yandiŵika mu visuzgo. Chiuta Mwenenkhongono zose wandipa soka?”

²²Ntheura ndimo Naomi wakawerera kufuma ku charu cha Mowabu pamoza na Rute wa ku Mowabu, mukamwana wakhe. Ŵakafika ku Betelehemu pa nyengo yakwambira kuvuna nyauti.