Read new_tumbuka_bible Rute 2 Bible Online

Rute 2 - new_tumbuka_bible bible

Rute 2

¹Naomi wakaŵa na mubali wakhe Bowazi wa mu mbumba ya Elimeleki mufumu wakhe. Bowazi wakaŵa wakumanyikwa ndiposo musambazi.

²Sono Rute muMowabu wakati kwa Naomi, “Mundizomerezge kuti ndirute ku minda mwakuti nkhavulurenge nyauti kunyuma kwa uyo wamkundichitira lusungu.” Ndipo Naomi wakati kwa iyo, “Ruta, mwana wane.”

³Ntheura Rute wakawuka na kuruta ndipo wakamba kuvulura mu munda mumanyuma mwa awo ŵakavunanga. Pa umaliro wakasanga kuti wakuvulura mu munda wa Bowazi, mweneuyo wakaŵa wa mu mbumba ya Elimeleki.

⁴Bowazi wakiza kufumira ku Betelehemu, ndipo wakaŵatauzga awo ŵakavunanga wakati, “Monire! FUMU yiŵenge namwe.” Iwo ŵakazgora ŵakati, “FUMU yimutumbikani!”

⁵Ntheura Bowazi wakafumba muteŵeti wakhe murara pa awo ŵakavunanaga kuti, “Kasi mwanakazi uyu wa chiwukirano ngwa njani?”

⁶Ndipo muteŵeti wakhe murara yura wakazgora wakati, “Mwanakazi uyu ndi uyo wali kwiza na Naomi kufumira ku charu cha Mowabu.”

⁷Iyo wangundiromba kuti, “Nkhuŵeya, mundizomerezge kuti ndivulurenge nyauti mukati mu zimphundwe kumanyuma kwa awo ŵakuvuna.” Ntheura wamba kuvulura kufuma na mulenje mpaka sono. Wandapumulepo mu chigongwe nanga ndi kanyengo kachoko waka.

⁸Penepapo Bowazi wakati kwa Rute, “Sono, pulika mwana wane, ungarutanga kuya kavulura ku munda unyakhe chara, ndipo ungarekanga kuvulura pa munda uwu, kweni ukharenge pafupi na ŵateŵeti-kazi ŵane aŵa.

⁹Iwe wizenge pa munda uwu na kurondezga ŵateŵeti-kazi ŵane apo ŵakuwunjika ivyo ŵanyamata ŵadumula. Ndaŵalangula ŵanyamata kuti ŵareke kukusuzga. Ndipo para womirwa, urute ku viŵiya na kumwapo maji agho ŵanegha ŵanyamata.”

¹⁰Rute wakajikama na kusindama chisko chakhe pasi ndipo wakati, “Kasi nchifukwa uli ndasanga lusungu pa maso pinu kuti mundipwererere ine, nda mulendo?”

¹¹Kweni Bowazi wakamuzgora wakati, “Ndili kuphalirika makora vyose ivyo uli kuŵachitira ŵanyokovyara, wakati wafwa mufumu wako. Ndili kuphalirikaso na umo ukasidira ŵawuso na ŵanyoko na charu icho ukababikiramo na kwiza ku ŵanthu awo undaŵamanyepo na kale chara.

¹²FUMU yikulipire pa mlimo uwo wachita. FUMU, Chiuta wa Israele, kwa mweneuyo wizako kwiza kapanjwako kusi ku mapapindo ghakhe, wakupe njombe yikuru!”

¹³Ntheura Rute wakati, “Sekuru wane mwandichitira lusungu, mwandisanguruska na kuyowoya makora ku nda muteŵeti-kazi winu, nangauli kuti ndili yumoza wa ŵateŵeti-kazi ŵinu chara.”

¹⁴Ndipo pa nyengo ya kuryera, Bowazi wakati kwa Rute, “Zanga kuno, kuti urye chakurya ndipo ukovyenge thozi lako mu vinyo.” Ntheura iyo wakakhara pamoza na ŵakuvuna ndipo Bowazi wakamupa nyauti wakukazinga. Wakarya na kukhuta ndipo wakavirekapo vinyakhe.

¹⁵Ndipo Rute wakati wawuka kuya kavulura, Bowazi wakaŵalangula ŵanyamata ŵakhe wakati, “Mumuzomerezgenge mwanakazi uyu kuti wavulurenge nanga ndi mukati mwa zimphundwe. Mungamurekeskanga chara.

¹⁶Nyengo zinyakhe mumusolerengemoso nyauti kufuma mu zimphundwe mwakuti wavulurenge. Mungamuchenyanga chara.”

¹⁷Ntheura Rute wakavulura mu munda ura mpaka na mise. Wakapwantha nyauti uyo wakavulura ndipo wakakwana pafupi debe limoza.

¹⁸Wakathwika nyauti yura na kuruta ku msumba. Nyinavyara wakaviwona ivyo wakavulura. Rute wakatoraso vyakurya ivyo vikakharapo wakati warya na kukhuta na kumupa nyinavyara.

¹⁹Sono nyinavyara wakamufumba Rute wakati, “Kasi muhanya uno wavuluranga nkhu? Kasi wateŵetanga kwa njani? Watumbikike munthu uyo wangukupwererera.” Penepapo Rute wakamwandulira nyinavyara munthu uyo wakateŵetangako ndipo wakati, “Zina la munthu uyo ndateŵetangako muhanya uno ndi Bowazi.”

²⁰Ndipo Naomi wakati ku mukamwana wakhe, “FUMU yimutumbike munthu uyu wandarekepo kurongora lusungu lwakhe ku ŵamoyo na ku ŵakufwa.” Wakarutilira kuyowoya kuti, “Munthu uyu ndi mubali withu, yumoza wa ŵenembumba.”

²¹Rute muMowabu wakati, “Bowazi wangundiphaliraso kuti, ‘Uvulurenge kufupi na ŵateŵeti ŵane mpaka ŵamare kuvuna vyose.’ ”

²²Naomi wakati kwa Rute, mukamwana wakhe, “Nkhuweme, mwana wane, kuti uvulurenge kufupi na ŵateŵeti-kazi ŵakhe, chifukwa ku munda wa munthu munyakhe ungasuzgikanga.”

²³Ntheura Rute wakarutilira kuvulura pafupi na ŵateŵeti-kazi ŵa Bowazi mpaka ŵakamara kuvuna nyauti na tirigu. Rute wakakharanga na nyinavyara.