Read new_tumbuka_bible Rute 3 Bible Online

Rute 3 - new_tumbuka_bible bible

Rute 3

¹Zuŵa limoza, Naomi wakayowoya kwa Rute mukamwana wakhe wakati, “Mwana wane, asi ine ndine nkhwenera kukusangira mufumu mweneuyo wangakupa pakukhara na kukakupwererera?

²Bowazi mweneuyo ŵateŵeti-kazi ŵakhe wavuluranga nyauti pafupi nawo, ndi mubali withu. Pulika sono, usiku uno wati wapete nyauti pa luwugha.

³Sono iwe geza na kuphakara mafuta, ndipo uvware malaya ghako ghaweme chomene, urute ku luwugha lwakupwanthira nyauti. Kweni ureke kujirongora kwa iyo, wasuke wamare kurya na kumwa.

⁴Para iyo wakuruta kuya kagona ukaghapanikizge makora malo agho wamkugonapo. Pamanyuma ukarute na kubenura chidiko chakhe ku malundi na kugona pasi. Ndipo iyo wamkukuphalira icho ukwenera kuchita.”

⁵Ndipo Rute wakati, “Vyose ivyo mwayowoya nditi ndichitenge.”

⁶Ntheura Rute wakakhilira ku luwugha lwakupwanthira nyauti ndipo wakachita umo nyinavyara wakamuphalirira.

⁷Ndipo para Bowazi wakati wamara kurya na kumwa, wakaŵa wakukondwa chomene. Ntheura wakaruta kuya kagona pa umaliro wa mulu wa mphuzi za nyauti. Sono Rute wakiza makoramakora, wakabenula chidiko ku malundi gha Bowazi, na kugona pasi.

⁸Na usiku pakati, Bowazi wakachiruka, wakang'anamuka ndipo wakawona mwanakazi wagona ku malundi ghakhe.

⁹Bowazi wakafumba wakati, “Kasi ndiwe njani?” “Ndine Rute, muteŵeti-kazi winu. Mundidikiskeko nda muteŵeti-kazi winu, chidiko chinu pakuti imwe ndimwe mubali withu mwenemwene uyo wakwenera kundipwererera.”

¹⁰Bowazi wakati, “FUMU yikutumbike, mwana wane. Kugomezgeka kwako uko warongora ku umaliro, kukuruska kugomezgeka kwa pakudanga uko ukarongora kwa nyokovyara chifukwa ulije kukhumba kuruta ku ŵanyamata ŵasambazi panji ŵakavu.

¹¹Sono ureke kwenjerwa mwana wane. Ine nditi ndikuchitirenge chose icho ukukhumba, pakuti ŵanyane wose mu msumba ŵakumanya kuti ndiwe mwanakazi wakugomezga.

¹²Nadi mbunenesko kuti ndine mubali wako mwenemwene uyo wakwenera kukupwererera, kweni walipo yunji mweneuyo ndi mubali wako wakuruska ine.

¹³Ukhare papano usiku uno, ndipo na mulenje, titi tiwone usange iyo wati wazomere kuchita mlimo wa mwenembumba, panji chara. Kweni usange wakureka kukhumba kuchita mlimo wa mwenembumba, nadi nkhurapira mwa FUMU, ine nditi ndikuchitirenge icho nchakwenera mwenembumba. Iwe ugone mpaka na mulenje.”

¹⁴Ntheura Rute wakagona ku malundi gha Bowazi mpaka na mulenje, kweni wakawuka na mulenjelenje kuti ŵanthu ŵareke kumanya. Ndipo Bowazi wakati, “Paŵavye munthu wakumanya kuti mwanakazi wakiza ku luwugha.”

¹⁵Ndipo wakatiso, “Zanga nacho chidiko icho wavwara ndipo uchikorerere.” Wakati wachikorerera, wakapima miyeso yinkhonde na umoza ya nyauti, na kumuthwikiska. Ndipo Rute wakawerera ku msumba.

¹⁶Wakati wafika, nyinavyara wakamufumba wakati, “Kasi wenda uli mwana wane?” Rute wakamuphalira vyose ivyo Bowazi wakamuchitira.

¹⁷Wakatiso, “Wakandipaso miyeso iyi yinkhonde na umoza ya nyauti pakuti wakati, ‘Ungarutanga kwa nyokovyara kwambula kanthu chara.’ ”

¹⁸Naomi wakazgora wakati, “Zika, mwana wane, usuke uwone umo vinthu vyenderenge, pakuti munthu uyu kuti wakharenge pasi kupumula chara kwambula kuti wamarizga makani agha muhanya uno.”