Read new_tumbuka_bible Rute 4 Bible Online

Rute 4 - new_tumbuka_bible bible

Rute 4

¹Bowazi wakaruta ku chipata cha msumba na kukhara pasi kwenekura. Penepapo mubali mwenemwene wa Elimeleki uyo wakenera kupwererera, mweneuyo Bowazi wakayowoyapo wakajumphanga. Ntheura Bowazi wakati, “Wa munyane, patuka, khara pasi.” Ndipo iyo wakapatuka na kukhara pasi.

²Bowazi wakachema ŵarara wa mu msumba khumi ndipo wakati, “Zaninge mukhare pasi pano.” Iwo ŵakiza na kukhara pasi.

³Penepapo iyo wakayowoya kwa mubali wakhe yura wakati, “Naomi uyo wiza kufuma ku charu cha Mowabu, wakuguliska munda uwo ukaŵa wa mubali withu Elimeleki.

⁴Ntheura ine nkhuti ndikumanyiske ichi kuti iwe uwuwombole munda uwu pa maso pa ŵanthu aŵa awo ŵakhara pano ndiposo na pa maso pa ŵarara ŵithu aŵa kuti ŵapulike. Usange ukukhumba kuwuwombola, uwuwombole, kweni usange urekenge kuwombola undiphalire kuti ndimanye, chifukwa palije munyakhe uyo wangawuwombola. Kweni ndiwe pera ndipo usange iwe urekenge, mbwenu ndiŵenge ine.” Ndipo munthu yura wakati, “Nditi ndiwuwombolenge munda uwu.”

⁵Ntheura Bowazi wakati, “Pa zuŵa ilo uti ugulire charu kwa Naomi, ugulengeso na Rute muMowabu, muwoli wa chiponde, kuti uwuske zina la wakufwa pa chiharo chakhe.”

⁶Mubali wakhe yura wakati, “Ine kuti ndingajiwombolera ndekha chara mzire ndinange chiharo chane na chane. Ndiwe utore mazaza ghane ghakuwombolera pakuti ine ndatondeka kuwombola.”

⁷Mu nyengo za kale kukaŵa kaluso mu Israele pakukhozgera mlimo wakuwombola kanthu panji wakusinthana kanthu. Munthu wakavuranga skapato yakhe na kuyipereka ku munyakhe. Aka kakaŵa kaluso kurongora ukaboni mu Israele.

⁸Ntheura para mubali mwenemwene wa Bowazi wakayowoya kuti, “Mugule ndimwe munda,” wakavura skapato yakhe na kupereka.

⁹Penepapo Bowazi wakati ku ŵarongozgi na ŵanthu wose, “Ndimwe ŵakaboni muhanya uno kuti ndagula kwa Naomi vyose ivyo vikaŵa vya Elimeleki, na vyose ivyo vikaŵa vya Kiliyoni na vya Maloni.

¹⁰Ndiposo na Rute nayo, muMowabu, chokoro cha Maloni, ndamutora kuti waŵe muwoli wane, kuwuska zina la wakufwa pa chiharo chakhe, kuti lireke kuruwika mukati mu ŵabali ŵakhe na mu chikaya cha ku kwakhe. Ndimwe ŵakaboni muhanya uno.”

¹¹Penepapo ŵanthu wose awo ŵakaŵa pa chipata pamoza na ŵararaŵarara ŵakati, “Ndise ŵakaboni. FUMU yimuzgore mwanakazi uyo wakwiza mu nyumba yako kuti waŵe nga ndi Rakelo na Leya, ŵeneawo pamoza ŵakazenga nyumba ya Israele. Uŵe wakusakata mu fuko la Efurata na wakumanyikwa mu Betelehemu.

¹²Nyumba yako yiŵe nga ndi nyumba ya Perezi, mweneuyo Tamara wakamubabira Yuda, chifukwa cha ŵana awo FUMU yiti yikupe mwa mwanakazi muchoko uyu.”

¹³Sono Bowazi wakatora Rute kuŵa muwoli wakhe. Wakati wa mumanya, FUMU yikamutumbika, wakaŵa na nthumbo ndipo wakababa mwana mwanarume.

¹⁴Ŵanakazi ŵakati kwa Naomi, “Yirumbike FUMU, yeneiyo muhanya uno yilije kukureka wambula mubali. Zina lakhe lithuwukwe mu Israele.

¹⁵Mwana uyu wamkuŵa chisangurusko mu umoyo wako na wakukupwererera mu uchekuru wako. Chifukwa mukamwana wako uyo wakukutemwa, mweneuyo kwa iwe wakuruska ŵana ŵanarume ŵankhonde na ŵaŵiri, wababa mwana uyu.”

¹⁶Ntheura Naomi wakatora mwana na kumugoneka pa chipakato chakhe ndipo wakaŵa mlezi wakhe.

¹⁷Ŵanakazi awo ŵakaŵa ŵazengezgani ŵakhe, ŵakati, “Kwababika mwana mwanarume kwa Naomi.” Ntheura ŵakamuthya kuti Obedi. Uyu ndiyo wakaŵa wiske wa Yese mweneuyo wakababa Davide.

¹⁸Sono aŵa ndiwo mba mphapu ya Perezi: Perezi wakababa Hezironi,

¹⁹Hezironi wakababa Ramu, Ramu wakababa Aminadabu,

²⁰Aminadabu wakababa Nashoni, Nashoni wakababa Salimoni.

²¹Salimoni wakababa Bowazi, Bowazi wakababa Obedi,

²²Obedi wakababa Yese, ndipo Yese wakababa Davide.