Read new_tumbuka_bible 1 Samuele 1 Bible Online

1 Samuele 1 - new_tumbuka_bible bible

1 Samuele 1

¹Kukaŵa munthu yunji zina lakhe Elikana wa fuko la Efurayimu uyo wakakharanga mu msumba wa Rama mu charu cha mapiri cha Efurayimu. Iyo wakaŵa mwana wa Yerohamu, muzukuru wa Elihu, mu mbumba ya Tohu mwana wa Zufu.

²Elikana wakatora ŵanakazi ŵaŵiri, yumoza wakaŵa Hana ndipo munyakhe wakaŵa Penina. Penina wakaŵa na ŵana, kweni Hana wakaŵavye.

³Chirimika chilichose, Elikana wakarutanga ku Shilo kufuma ku msumba wakwakhe wa Rama kuya karomba na kupereka sembe kwa FUMU Mwenenkhongono zose. Kwenekura ku Shilo kukaŵa ŵana ŵaŵiri ŵa Eli, Hofini na Finehasi awo ŵakaŵa ŵasofi ŵa FUMU.

⁴Pa zuŵa la kuperekera sembe Elikana wakazgoŵera kupereka kwa muwoli wakhe Penina thuŵi la nyama ndiposo na ku ŵana ŵakhe ŵanarume na ŵanakazi.

⁵Kweni kwa Elikana wakamupanga thuŵi[1] ziŵiri chifukwa wakamutemwa chomene Hana, ndipo FUMU yikajara mphapu yakhe.

⁶Ndipo chifukwa chakuti FUMU yikajara mphapu ya Hana, Penina wakamuyuzganga na kumuyuyura Hana kaŵirikaŵiri kuti wamwavye.

⁷Kutombozgeka uku kukarutilira chirimika na chirimika. Nyengo yose apo Hana wakarutanga ku nyumba ya FUMU kuya karomba, Penina wakamwavyanga ndipera mpaka Hana wakaliranga na kureka kurya wuwo.

⁸Ndipo Elikana mufumu wakhe wakamufumbanga kuti, “Hana, kasi ukulirachi? Warekerachi kurya? Nchifukwa uli ukuwoneka kuŵa wa chitima? Asi ine nkhuruska ŵana ŵanarume khumi kwa iwe?”

⁹Ŵakati ŵamara kurya na kumwa mu nyumba ya FUMU mu Shilo, Hana wakimilira. Sono musofi Eli wakakhara pa chitengo pafupi na mzati wa pa muryango wa nyumba ya FUMU.

¹⁰Hana wakakweŵeka chomene mu mtima ndipo wakarombanga kwa FUMU uku wakulira na mtima wakuŵaŵa.

¹¹Ndipo wakarapa wakati, “Mwe FUMU Mwenenkhongono zose, usange mungalaŵiska pa suzgo ya muteŵeti-kazi winu na kundikumbuka kwambula kundiruwa pakundipa mwana mwanarume, ndizamkumupereka kwa imwe FUMU mu umoyo wakhe wose. Ndipo sisi la ku mutu wakhe kuti wati wametenge chara.”

¹²Hana wakarutilira kuromba kwa FUMU kwa nyengo yitali, ndipo Eli wakalaŵisiskanga milomo yakhe.

¹³Hana wakarombanga cha mu mtima, kweni milomo yakhe pera ndiyo yikasunkhunyikanga ndipo mazgu kuti ghakapulikikwanga chara. Pa chifukwa ichi, Eli wakaghanaghananga kuti waloŵera.

¹⁴Eli wakamufumba wakati, “Kasi uti uŵe wakuloŵera mpaka pauli? Rutanga, vinyo ilo wamwa likadange lamara.”

¹⁵Hana wakazgora wakati, “Chara sekuru wane, ine kuti ndamwa vinyo chara panji moŵa. Ine ndili na chitima chikuru chomene, ndipo ndafumiskanga vya mu mtima wane panthazi pa FUMU.

¹⁶Mureke kundighanaghanira kuŵa muteŵeti-kazi muheni, pakuti nyengo yose iyi ndarombanga kwa FUMU na mtima wakukweŵeka chomene na wakuŵinya.”

¹⁷Penepapo Eli wakazgora wakati, “Rutanga mu mutende. Chiuta wa Israele wakupe icho wamuromba.”

¹⁸Ndipo Hana wakati, “Rekani nda muteŵeti-kazi winu ndisange uchizi pa maso pinu.” Penepapo wakaruta kuya karya, ndipo wakaŵaso na chitima chara.

¹⁹Na machero ghakhe, Elikana na mbumba yakhe ŵakawuka na mulenje chomene na kusopa FUMU. Ŵakati ŵamara, ŵakawerera ku nyumba yawo ku msumba wa Rama. Elikana wakamumanya muwoli wakhe Hana ndipo FUMU yikazgora lurombo lwa Hana.

²⁰Sono pakati pajumphapo nyengo, Hana wakaŵa na nthumbo ndipo wakababa mwana mwanarume na kumuthya kuti Samuele[2] pakuti wakati, “Nkhamuromba kwa FUMU.”

²¹Elikana na mbumba yakhe wakarutaso ku Shilo kuti wakapereke sembe ya chirimika na chirimika kwa FUMU na kufiska chirapo chakhe.

²²Kweni Hana kuti wakarutako chara. Iyo wakamuphalira mufumu wakhe kuti, “Para mwana warumurika ndipo ndamkuruta nayo kuti nkhamupereke kwa FUMU mwakuti wakharenge kwenekura umoyo wakhe wose.”

²³Elikana, mufumu wakhe wakamuzgora, wakati, “Chita chose icho nchiweme kwa iwe. Ukhare ku nyumba mpaka wizakamurumure mwana. FUMU pera ndiyo yikhozge mazgu ghakhe.” Ntheura Hana wakakhara ku nyumba wakonkheska mwana mpaka wakamurumura.

²⁴Wakati wamurumura mwana, wakaruta nayo ku nyumba ya FUMU ku Shilo nangauli wakaŵa muchoko. Wakayegha nkhambako ya virimika vitatu, ufu wakukwana debe limoza na thumba la chikumba la vinyo.

²⁵Ŵakati ŵakoma nkhambako yira, ŵakiza nayo mwana kwa Eli.

²⁶Sono Hana wakati “Sekuru wane, umo muliri ŵamoyo, ine ndine mwanakazi mweneuyo nkhimilira pano pafupi na imwe apo nkharombanga kwa FUMU.

²⁷Nkharombanga mwana uyu ndipo FUMU yili kundipa mwana uyo nkharombanga kwa iyo.

²⁸Ntheura sono nkhumupereka kwa FUMU. Mu umoyo wakhe wose, wati waŵenge muteŵeti wa FUMU.” Ntheura wose penepara wakasopa FUMU.