Read new_tumbuka_bible 1 Samuele 10 Bible Online

1 Samuele 10 - new_tumbuka_bible bible

1 Samuele 10

¹Penepapo Samuele wakatora supa ya mafuta na kupungulira pa mutu wa Sauli ndipo wakamufyofyontha na kuti kwa iyo, “Asi FUMU yakuphakazga iwe kuti uŵe karonga wa ŵanthu ŵakhe ŵaIsraele awo nchiharo cha FUMU.[6] Ndipo uti uŵawusenge ŵanthu ŵa FUMU na kuŵathaska ku ŵarwani ŵawo awo ŵali kuŵazingirizga. Ichi ndicho chiŵenge chimanyikwiro kwa iwe kuti FUMU yakuphakazga iwe kuŵa karonga wa ŵanthu ŵakhe ŵaIsraele.

²Para iwe na ine tarekana muhanya uno, uti ukumanenge na ŵanthu ŵaŵiri pafupi na dindi la Rakelo ku Zeliza mu charu cha Benjamini. Iwo ŵamkukuphalira kuti mbunda izo mukupenja zili kusangika. Sono ŵawiskemwe ŵareke kwenjerwa za mbunda, kweni ŵakwenjerwa za imwe. Iwo ŵakujifumba kuti, ‘Kasi sono ndichitechi kuti ndisange mwana wane?’ ”

³Ntheura wamkurutilira kufuma penepara kuya kunthazi mpaka wamkufika pa khuni likuru la musoro ku Taboro. Penepapo wamkumana na ŵanthu ŵatatu ŵakuruta kuya kapereka sembe kwa Chiuta ku Betele. Yumoza wayegha twana twa mbuzi tutatu, munyakhe wayegha vingwa vitatu, munyakhe wayegha vinyo muthumba la chikumba.

⁴Iwo ŵamkukutauzga na kukupako vingwa viŵiri. Sono iwe ukavipokerere.

⁵Pamanyuma pa ichi wamkufika ku Phiri la Chiuta ku Gibeya uko kuli linga la ŵaFilisiti. Kwenekura, apo ukunjira waka mu msumba, wamkukumana na wupu wa nchimi zikwikha kufuma ku malo gha pachanya ghakusoperako, zikulizga viding'indi, ŵakalimba, fyoliro na ŵabango uku zikuchima.

⁶Mzimu wa FUMU wamkwiza pa iwe mwa nkhongono ndipo iwe nawe wamkwamba kuchima pamoza nawo. Ntheura wamkuzgoka na kuŵa munthu munyakhe.

⁷Para vimanyikwiro ivi vyamba kuwoneka mwa iwe, ukachite chilichose pa nyengo yeneyira, pakuti Chiuta wamkuŵa nawe.

⁸Sono dangirako urutenge ku Giligala. Ine ndizenge kwenekuko kwa iwe kuti ndizakapereke sembe zakocha mburuma na sembe za wenenawene. Kweni ukalindizge mazuŵa ghankhonde na ghaŵiri ndisuke ndifike na kukurongora icho ukwenera kuchita.

⁹Para Sauli wakarekana waka na Samuele, Chiuta wakasintha mtima wa Sauli ndipo vimanyikwiro vyose ivyo Samuele wakayowoya vikamba kuwoneka zuŵa lenelira.

¹⁰Sauli na muteŵeti yura ŵakati ŵafika ku Gibeya, wupu wa nchimi ukakumana nayo ndipo Mzimu wa Chiuta ukiza pa iyo na nkhongono ndipo wakamba kuchima pamoza nawo.

¹¹Ŵanthu wose awo ŵakamumanyanga kale Sauli, ŵakati ŵawona kuti wakuchima pamoza na nchimi, ŵakafumbana yumoza na munyakhe ŵakati, “Kasi nchivichi icho chamwizira mwana wa Kishi? Kasi Sauli nayo ndi nchimi?”

¹²Mwenekaya yumoza wakati, “Kasi wiske ndi njani?” Pa chifukwa ichi pakafuma chinthanguni chakuti, “Kasi Sauli nayo ndi yumoza wa nchimi?”

¹³Sauli wakati wamara kuchima, wakaruta ku malo gha pachanya ghakusoperako.

¹⁴Penepapo sibweni wa Sauli wakati wamuwona wakamufumba iyo na muteŵeti wakhe wakati, “Kasi wanguruta nkhu?” Iyo wakazgora kuti, “Tanguruta kuya kapenja mbunda. Kweni tikati tawona kuti zikusangika chara, tikaruta kwa Samuele.”

¹⁵Musibweni wa Sauli wakati, “Nkhukuŵeya, undiphalire icho Samuele wakayowoya kwa iwe.”

¹⁶Sauli wakazgora sibweni wakhe wakati, “Wangutiphalira kuti mbunda zili kusangika.” Kweni wakamuphalirapo chilichose chara pa makani gha ufumu uwo Samuele wakayowoya.

¹⁷Samuele wakachema ŵaIsraele kuti ŵawungane pamoza panthazi pa FUMU ku Mizipa.

¹⁸Ndipo wakati kwa iwo, “FUMU, Chiuta wa Israele wakuti, ‘Nkhamufumiskani imwe ŵaIsraele mu charu cha Eguputo na kumuthaskani ku ŵaEguputo na ku maufumu ghose gha awo ŵakamunyekezganinge.’

¹⁹Kweni sono mwamukana Chiuta winu uyo wakumuthaskani ku visuzgo na maunonono ghinu ghose. Ndipo mukuyowoya kuti, ‘Chara utimikire karonga kuti watiwusenge’. Ntheura sono wunganani panthazi pa FUMU mu mafuko na mbumba zinu.”

²⁰Para Samuele wakachemera kufupi mafuko ghose gha Israele, fuko la Benjamini ndilo likasankhika pakuchita mphenduzgo.

²¹Samuele wakasendezga fuko la Benjamini mbumba na mbumba ndipo mbumba ya Matiri ndiyo yikasankhika pakuchita mphenduzgo. Pa umaliro wakasendezga ŵa mu mbumba ya Matiri yumozayumoza, ndipo pachita mphenduzgo, Sauli mwana wa Kishi ndiyo wakasankhika. Kweni para ŵakalaŵiskalaŵiska kuti ŵanthu ŵamuwone, iyo kuti wakasangika chara.

²²Ntheura wakafumba kwa FUMU kuti, “Kasi munthu uyu wiza kuno?” FUMU yikazgora kuti, “Inya wiza, kweni wabisama mu ŵakatundu.”

²³Ntheura ŵakachimbira kuya kamutora kwenekura, ndipo ŵakati wize nayo ŵakamwimika mukati mu ŵanthu. Wakawoneka kuti singo yakhe njitali kuruska ŵanthu wose.

²⁴Ndipo Samuele wakati ku ŵanthu, kasi mukuwona munthu uyu mweneuyo FUMU yasankha. Palije na yumoza wakuyana na iyo mukati mu ŵanthu wose. Penepapo ŵanthu wose ŵakachemerezga ŵakati, “Muŵe na umoyo utali karonga!”

²⁵Penepapo Samuele wakaŵarongosorera ŵanthu vyakumwenerera na milomo ya karonga yura. Ndipo ŵakavilemba mu buku na kuviŵika panthazi pa FUMU. Pa umaliro Samuele wakaŵawezga kuti ŵarute waliyose ku kaya kwakhe.

²⁶Sauli nayo wakaruta ku kaya kwakhe ku Gibeya ndipo pamoza nayo wakaruta na ŵasilikari, awo Chiuta wakaŵakhwaska mitima yawo.

²⁷Kweni ŵanthu ŵanji ŵawakawaka ŵakati, “Kasi munthu uyu wangatithaska uli?” Ntheura ŵakamuyuyura ndipo kuti ŵakamupako vyawanangwa chara. Ndipouli Sauli kuti wakayowoyapo kanthu chara.