Read new_tumbuka_bible 1 Samuele 17 Bible Online

1 Samuele 17 - new_tumbuka_bible bible

1 Samuele 17

¹ŴaFilisiti ŵakawunganya magulu ghawo gha nkhondo ku msumba wa Soko mu charu cha Yuda. Ŵakazenga misasa yawo ku Efesi Damimu pakati pa Soko na Azeka.

²Sauli na ŵasilikari ŵakhe nawo ŵakawunganya na kuzenga misasa yawo mu dambo la Ela ndipo ŵakandandiska ŵasilikari ŵawo makora kuti ŵarwe na ŵaFilisiti.

³ŴaFilisiti ŵakimilira mu phiri limoza ndipo ŵaIsraele nawo ŵakimilira mu phiri linyakhe, pakati pawo pakaŵa dambo.

⁴Chinkhara zina lakhe Goliyati chikiza kufumira ku misasa ya ŵaFilisiti icho chikakharanga ku msumba wa Gati. Chinkhara ichi chikaŵa mamita ghatatu mu utali.

⁵Chikaŵa na chipewa cha mkuŵa ku mutu wakhe ndipo chikavwara munjilira wa mkuŵa uwo uzitu wakhe chikaŵa makilogiramu 57.

⁶Mu minkhozo yakhe chikajikaka mkuŵa wakupepefuka ndipo chikaŵika mukondo wakhe pa chiŵegha chakhe.

⁷Luti lwa mukondo lukaŵa nga ndi muchiko wa chakurukira salu, ndipo mutu wa mukondo ukaŵa na uzitu wa makilogiramu pafupi ghankhonde na ghaŵiri. Wakuyegha nguru yakhe yakuvikirira, wakadangiranga panthazi pakhe.

⁸Goliyati wakimilira na kuchemerezga ku ŵasilikari ŵa charu cha Israele wakati, “Kasi nchifukwa uli mwiza na kundandika ŵasilikari ŵinu kuti murwe nkhondo? Asi ine ndine muFilisiti, ndipo imwe ndimwe ŵazga ŵa Sauli? Musorepo munthu yumoza ndipo mweneuyo ndiyo wize kwa ine kuti warwe nane.

⁹Usange iyo wangamanya kurwa nane nkhondo na kundikoma, ise tiŵenge ŵazga ŵinu. Kweni usange ndamuruska na kumukoma, imwe muti muŵenge ŵazga ŵithu na kutiteŵetera ise.

¹⁰MuFilisiti yura wakatiso, ‘Nkhuŵayuyura ŵasilikari wose ŵaIsraele muhanya uno. Mundipe waka munthu yumoza kuti ndirwe nayo nkhondo.’ ”

¹¹Sauli na ŵasilikari wose ŵaIsraele ŵakati ŵapulika mazgu gha muFilisiti yura, ŵakathika lusoko na kopa chomene.

¹²Davide wakaŵa mwana wa muEfurayimu zina lakhe Yese wa ku msumba wa Betelehemu mu chigaŵa cha Yuda. Yese ŵakaŵa na ŵana ŵanarume ŵankhonde na ŵatatu ndipo mu nyengo ya Sauli, wakaŵa murara na wakuchekura chomene.

¹³Ŵana ŵarara ŵatatu ŵa Yese ŵakarondezga Sauli ku nkhondo. Mazina gha ŵana ŵakhe ŵatatu awo ŵakaruta ku nkhondo ndi agha: Eliyabu mwana wa uŵere, Abinadabu mwana wa chiŵiri na Shama mwana wa chitatu.

¹⁴Davide wakaŵa muchoko wa wose ndipo ŵakuru ŵakhe ŵatatu ŵara, ŵakaruta na Sauli ku nkhondo,

¹⁵kweni Davide wakarutanga kaŵirikaŵiri ku Betelehemu kuya kaliska mberere na mbuzi za ŵawiske.

¹⁶Goliyati wakarutilira kuderera ŵasilikari ŵa charu cha Israele pakwiza kimikira pafupi pa mazuŵa 40 mulenje na mise.

¹⁷Zuŵa limoza Yese wakati kwa Davide mwana wakhe, “Ŵayeghera ŵakuru ŵako debe la tirigu wa kukazinga na vingwa khumi ivi, urute navyo luŵiro ku misasa yawo.

¹⁸Umuyeghereso maburunga gha chambiko khumi murara wa ŵasilikari wa ŵankhondo chikwi chimoza. Ukawone umo ŵakuru ŵako ŵakukhalira ndipo ukize na chimanyikwiro chakufumira kwa iwo.

¹⁹Ŵakuru ŵako ŵali na Sauli na ŵasilikari wose ŵa charu cha Israele mu dambo la Ela ŵakurwa nkhondo na ŵaFilisiti.”

²⁰Na machero ghakhe, Davide wakawuka na mulenje chomene, wakazireka mberere na mbuzi za wiske na muliska munyakhe. Wakatora vyakurya vira na kuruta nga ndi umo wiske Yese wakamuphalirira. Ndipo Davide ŵakafika ku misasa pa nyengo iyo ŵasilikari ŵakarutiranga kuya karwa nkhondo na kupoma kukuru kwa ŵasilikari.

²¹Ŵasilikari ŵa charu cha Israele na ŵaFilisiti ŵakandandikanga ŵasilikari ŵawo kuti ŵarwe nkhondo mwakurazgirana.

²²Penepapo Davide wakareka vyakurya ivyo wakayegha mu mawoko gha uyo wakasunganga vyakurya na kuchimbilira ku nkhondo ndipo wakati wafika, wakatauzga ŵakuru ŵakhe.

²³Apo wakaŵa ŵachali kuyowoya nawo, wakawona Goliyati, chinkhara cha ŵaFilisiti chira cha msumba wa Gati, chikwiza kufuma mu ŵasilikari ŵakhe chikuyowoya mazgu gheneghara gha pakudanga ghakuderera, ndipo Davide wakachipulika chikuyowoya.

²⁴Para ŵasilikari ŵa ŵaIsraele ŵakachiwona chinkhara chira, wose ŵakachimbira uku ŵakutenthema na wofi ukuru.

²⁵Ndipo ŵakayowoyeskananga kuti, “Mwachiwona chinkhara ichi umo chikwizira? Chikwiza waka kwiza kayuyura ŵaIsraele. Ndipo munthu yose uyo wati wachikome, Karonga Sauli wati wamupe vyuma vinandi. Wizamkumupa mwana wakhe mwanakazi kuti wamutore kuŵa muwoli wakhe na kuyizgora nyumba ya ŵawiske kuti yiŵe mu wanangwa mu charu cha Israele.”

²⁶Penepapo Davide wakafumba ŵasilikari awo ŵakaŵa pafupi nayo kuti, “Kasi kuti kumuchitikire vichi munthu mweneuyo wati wakome chinkhara cha ŵaFilisiti ichi na kuwuskako kuyuyurika kose uku pa ŵaIsraele? Kasi ndi njani muFilisiti wambula kukotoreka uyo wati wakuyuyura waka ŵasilikari ŵa Chiuta wa moyo.”

²⁷Ŵasilikari ŵakamuzgora vyeneivyo karonga wakayowoyanga kuti, “Vyeneivi ndivyo vizamkuchitikira munthu mweneuyo wati wakome Goliyati.”

²⁸Sono Eliyabu mukuru wa Davide murara wakapulika ivyo Davide wakayowoya na ŵasilikari ŵanyakhe. Penepapo wakakaripa chomene ndipo wakati, “Kasi nchifukwa uli wiza kuno? Kasi mberere na mbuzi zichoko waka zira wazireka na njani ku mapopa? Nkhumanya kujikuzga kwako na uheni wa mu mtima wako. Iwe wiza kuno kuti wizakawonerere waka nkhondo!”

²⁹Davide wakati, “Kasi ine ndachitachi? Kasi ndilije wanangwa wakuyowoyapo?”

³⁰Penepapo Davide wakazgokera ku musilikari munyakhe na kufumba fumbo lenelira la pakudanga. Ndipo ŵasilikari awo wakaŵafumba ŵakamuzgoranga zgoro limoza pera nga nda la pakudanga.

³¹Mazgu agho Davide wakayowoyanga ghakati ghapulikikwa, ŵakaya kamuphalira Sauli, mweneuyo wakatuma ŵanthu kuti wakamucheme Davide.

³²Davide wakati kwa Sauli, “Paŵavye musilikari na yumoza wathike lusoko chifukwa cha muFilisiti uyu. Muteŵeti winu wati warute kuya karwa nayo nkhondo.”

³³Sauli wakazgora Davide wakati, “Iwe kuti ungamanya kwima kuti urwe nkhondo na muFilisiti uyu chara, chifukwa ndiwe mwana muchoko ndipo muFilisiti uyu waŵa wakurwa nkhondo kwamba ku wanichi wakhe.”

³⁴Kweni Davide wakati kwa Sauli, “Muteŵeti winu waŵa wakuliska mberere na mbuzi za ŵawiske ndipo kukati kwiza nkharamu panji nkharamira na kukoma mwana-mberere kufuma ku mskambo,

³⁵nkhayirondezga ndipo nkhati ndayitimba nkhapokeska mwana-mberere yura kufuma mu mlomo wakhe. Para yikandizgokera kuti yikore ine, nkhayikora maweya ghakhe gha mu singo na kuyitimba mpaka kufwa.

³⁶Muteŵeti winu wali kukomapo vyose viŵiri nkharamu na nkharamira, ndipo muFilisiti uyu wambula kukotoreka wati wayane waka na chimoza cha vyeneivi pakuti wayuyura ŵasilikari ŵa Chiuta wa moyo.

³⁷FUMU yeneiyo yikandithaska ku chikufi cha nkharamu na cha nkharamira ndiyo yindithaskengeso ku muFilisiti uyu.” Sauli wakati kwa Davide, “Rutanga, FUMU yiŵe nawe!”

³⁸Penepapo Sauli wakamuvwarika Davide vyakuvwara vyakhe vya nkhondo. Ku mutu wakamuvwarika chipewa cha mkuŵa ndipo mu thupi wakamuvwarika munjilira wa chisulo chipepefu.

³⁹Ndipo Davide wakakaka lupanga lwakhe pa munjilira ura musilikari na kuyezga kwenda, kweni wakatondeka pakuti wakavizgoŵera na kale chara. Davide wakati kwa Sauli, “Kuti ndingenda makora na ivi chara chifukwa ndindavizgoŵere.” Ntheura wakavivura.

⁴⁰Ntheura Davide wakatora ndodo yakhe na kusorapo mawe ghaweme ghankhonde kufuma mu mronga na kughaŵika mu thumba lakhe ilo wakendanga nalo pakuliska. Apo fyata yikaŵa mu mawoko ghakhe, wakasenderera kufupi kuti na muFilisiti.

⁴¹MuFilisiti yura pamoza na wakuyegha nguru yakhe uyo wakendanga panthazi pakhe, wakasendereranga kwiza uko kukaŵa Davide.

⁴²Para Goliyati wakalaŵiska, na kuwona Davide wakamupepura chomene pakuti wakaŵa muchoko, muswesi, wa thupi liweme na wa chisko chakutowa.

⁴³Ndipo wakati kwa Davide, “Kasi ine ndine ncheŵe apo iwe ukwiza na muchiza kwa ine? Ntheura Goliyati yura wakamutemba Davide mu zina la ŵachiuta ŵakhe.”

⁴⁴Iyo wakati kwa Davide, “Zanga kuno ndipo ine nditi ndipereke nyama ya thupi lako ku viyuni vya mudera ndiposo na ku vinyama vya mu thengere.”

⁴⁵Davide wakati kwa muFilisiti, “Iwe ukwiza kuti urwe nkhondo na ine apo wayegha lupanga, mukondo na musompho. Kweni ine nkhwiza kwa iwe mu zina la FUMU Mwenenkhongono zose, Chiuta wa ŵasilikari ŵa Israele mweneuyo ukumuyuyura.

⁴⁶Muhanya uno FUMU yakupereka iwe mu woko lane ndipo nditi ndikukome na kudumula mutu wako. Muhanya uno vitanda vya ŵasilikari ŵa ŵaFilisiti nditi ndivipereke ku viyuni vya mudera na ku vinyama vya mu thengere. Charu chose cha pasi chiti chimanye kuti muli Chiuta mu Israele.

⁴⁷Ndipo waliyose uyo wali pano wati wamanyenge kuti FUMU yikuponoska ŵanthu na lupanga panji mukondo chara, pakuti nkhondo nja FUMU ndipo yiti yimuperekani mose imwe mu mawoko ghithu.”

⁴⁸Apo Goliyati wakasendereranga kufupi kuti wakumane na Davide, Davide wakachimbira luŵiro kurazga ku mzere wa ŵasilikari kuti wakumane na Goliyati.

⁴⁹Davide wakanjizga woko lakhe mu thumba na kutoramo libwe ndipo wakaliponya na fyata na kulasa muFilisiti yura pa chisko. Libwe lira likanjira mukati mu chisko chakhe ndipo penepapo muFilisiti yura wakawa pasi kavunama na kufwa penepapo.

⁵⁰Ntheura Davide wakathereska Goliyati pakumulasa na fyata na libwe. Kwambula lupanga ku woko lakhe, wakamutimba Goliyati mpaka wakamukoma.

⁵¹Penepapo Davide wakachimbira na kuya kimilira pachanya pa muFilisiti yura. Wakasorora lupanga lwa muFilisiti mu chibazi chakhe ndipo wakamudumulira nalo mutu. Para ŵaFilisiti ŵakawona kuti chinkhara chawo chafwa, wakachimbira.

⁵²Ntheura ŵasilikari wose ŵaIsraele na ŵaYuda ŵakaŵadikizga ŵasilikari ŵaFilisiti uku ŵakuchemerezga na mphomo yikuru mpaka wakaya kafika ku msumba wa Gati na ku vipata vya msumba wa Ekuroni. ŴaFilisiti wose awo ŵakapwetekeka ŵakenda kawanga mu nthowa yose mpaka kufika na ku msumba wa Shaarayimu na wa Gati ndiposo na wa Ekuroni.

⁵³Penepapo ŵasilikari ŵa ŵaIsraele ŵakawerera kufuma kukudikiska ŵaFilisiti na kwiza kaskogha vyose ivyo vikaŵa mu misasa ya ŵaFilisiti.

⁵⁴Davide wakatora mutu wa Goliyati na kwiza nawo ku Yerusalemu, kweni wakasunga mahomwa gha Goliyati mu hema lakhe.

⁵⁵Para Sauli wakawona Davide wakuruta kuya karwa nkhondo na muFilisiti yura, wakafumba Abinara murongozgi wa ŵasilikari kuti, “Kasi muwukirano uyu ndi mwana wa njani?” Abinara wakazgora wakati, “Nadi umo imwe muliri ŵamoyo mwe karonga, nkhumanya chara.”

⁵⁶Karonga Sauli wakati, “Fumbilira kuti umanye uyo ndi wiske wa muwukirano uyu.”

⁵⁷Ntheura apo Davide wakawerangako kukakoma Goliyati yura, Abinara wakamutora na kwiza nayo panthazi pa Sauli uku Davide wayegha mutu wa Goliyati mu woko lakhe.

⁵⁸Ndipo Sauli wakamufumba Davide kuti, “Kasi muwukirano iwe ndiwe mwana wa njani?” Davide wakazgora kuti, “Ine ndine mwana wa muteŵeti winu Yese wa ku Betelehemu.”