Read new_tumbuka_bible 1 Samuele 19 Bible Online

1 Samuele 19 - new_tumbuka_bible bible

1 Samuele 19

¹Sauli wakayowoya na mwana wakhe Yonatani pamoza na nduna zakhe zose kuti ŵamukome Davide. Kweni Yonatani wakamutemwa chomene Davide.

²Ntheura Yonatani wakamuchenjezga Davide wakati, “Ŵadada ŵakukhumba kukukoma. Ntheura uchenjere. Na machero na mulenje ukakhare pa malo ghakubisika.

³Ine nditi ndirutenge na kuya kimilira pafupi na ŵadada ku thengere uko iwe wamkubisama. Ine ndamkuyowoya kwa iwo vya iwe ndipo chilichose icho ndamkuchipulika ndizamkukuphalira.”

⁴Yonatani wakamurumba Davide panthazi pa Sauli, ŵawiske ŵakhe kuti, “Karonga, mureke kumuchitira chiheni Davide muteŵeti winu pakuti iyo kuti wachita chiheni kwa imwe chara, ndipo chilichose icho wachita chamovwira chomene.

⁵Iyo wakaŵika umoyo wakhe pa urwani pakuruta kuya kakoma muFilisiti yura, ndipo FUMU yikiza na kutonda kukuru mu ŵaIsraele wose. Imwe mukachiwona ndipo mukakondwa nacho. Kasi sono nchifukwa uli mukukhumba kuchita chiheni pa munthu wambula mrandu nga ndi Davide pakumukoma kwambula chifukwa?”

⁶Sauli wakapulika mazgu gha Yonatani, ndipo wakarapa wakati, “Nkhurapira mwa FUMU, Davide kuti wati wakomekenge chara.”

⁷Penepapo Yonatani wakamuchema Davide na kumuphalira vyose ivyo wakayowoyeskana na ŵawiske. Ndipo wakamutora na kuruta nayo kwa Sauli. Sono Davide wakarutilira kuteŵetera Sauli nga ndi umo wakateŵeteranga pakudanga.

⁸Nkhondo yinyakhe yikambikaso ndipo Davide wakaruta kuya karwa nawo nkhondo ŵaFilisiti. Davide wakakoma ŵaFilisiti ŵanandi, mwakuti awo ŵakakharako ŵakachimbira.

⁹Mzimu uheni kufumira kwa FUMU ukizaso kwa Sauli apo wakaŵa mu nyumba yakhe uku wakorera mukondo mu woko lakhe. Ndipo Davide nayo wakaŵa penepapo wakalizganga bango,

¹⁰Sauli wakaponya mukondo wakhe kuti wamulase Davide mpaka ku chimati, kweni Davide wakaŵerama ndipo mukondo ukagwaza chimati. Usiku ura Davide wakachimbira pakujithaska.

¹¹Usiku wenewura Sauli wakatuma ŵanthu ku nyumba ya Davide kuya kamukhazga mwakuti wamukome na mulenje. Kweni Mikala muwoli wakhe wakamuchenjezga wakati, “Usange ukureka kuchimbira usiku uno kuti uthaske umoyo woko, na machero uti ufwenge.”

¹²Ntheura Mikala wakamufumiskira pa dangazi Davide ndipo iyo wakachimbira kuthaska umoyo wakhe.

¹³Mikala wakatora chikozgo na kuchigoneka pa chitara cha Davide ndipo ku mutu wa chikozgo chira wakaŵika musamiro wa maweya gha mbuzi na kuchidikiska salu.

¹⁴Para Sauli wakatuma ŵanthu ku nyumba ya Davide kuti wakamukore, Mikala wakati kwa iwo, “Davide warwara.”

¹⁵Penepapo Sauli wakatumaso ŵanthu kuti ŵarute kuya kamuwona Davide na kuŵaphalira kuti, “Mukamuyeghere kumoza na chitara chakhe mukize nayo mwakuti ndizakamkome.”

¹⁶Kweni para nthumi zira zikanjira, zikasanga chikozgo chira na musamiro wa maweya gha mbuzi pa chitara.

¹⁷Sauli wakati kwa Mikala, “Kasi nchifukwa uli wandipusika ntheura kuti murwani wane wachimbire na kuthaskika.” Mikala wakazgora wakati, “Iyo wakati kwa ine, undireke ndirutenge mzire ndikukome.”

¹⁸Davide wakati wachimbira na kuthaskika, wakaruta kwa Samuele ku msumba wa Rama ndipo wakamuphalira vyose ivyo Sauli wakachita kwa iyo. Penepapo iyo na Samuele ŵakaruta kuya kakhara ku Nayiyoti.

¹⁹Sauli wakapulika kuti Davide wali ku Nayiyoti mu msumba wa Rama.

²⁰Ntheura Sauli wakatuma ŵanthu kuti ŵakamutore Davide. Kweni wakati wawona mpingo wa nchimi zikuchima na Samuele wimilira nga ndi murongozgi wawo, Mzimu wa Chiuta ukiza na pa ŵanthu ŵara ŵa Sauli ndipo nawo ŵakamba kuchima.

²¹Sauli wakapulika vya ichi ndipo wakatuma ŵanthu ŵanyakheso ndipo nawo wakamba kuchima. Ŵakatumaso ŵanthu ŵanyakhe kachitatu ndipo nawoso ŵakamba kuchima.

²²Pa umaliro Sauli iyomwene wakaruta ku msumba wa Rama ndipo wakaya kafika pa chisimi chikuru icho chili pa Seku na kufumba kuti, “Kasi Samuele na Davide wali nkhu? Ndipo munthu yunji wakamuzgora kuti, ‘Wali ku Nayiyoti mu msumba wa Ramba.’ ”

²³Ntheura wakaruta ku Nayiyoti mu msumba wa Rama. Apo wakarutanga Mzimu wa Chiuta ukiza pa iyo ndipo nayo wakamba kuchima uku wakwenda mpaka wakaya kafika ku Nayiyoti.

²⁴Nayoso wakavura vyakuvwara vyakhe na kuchima panthazi pa Samuele, na kugona nkhule muhanya wose ura na usiku wakhe. Ichi ndicho chifukwa ŵanthu ŵakayowoya kuti, “Kasi Sauli nayo njumoza wa nchimi?”