Read new_tumbuka_bible 1 Samuele 2 Bible Online

1 Samuele 2 - new_tumbuka_bible bible

1 Samuele 2

¹Hana wakarombaso wakati, “Mtima wane ukusekerera mwa FUMU, nkhongono zane zakwezgeka mwa FUMU. Sono nkhujikuzga na kuŵahoya ŵarwani ŵane, pakuti nkhukondwera mu chiponosko chinu.”

²“Palije na yumoza mutuŵa nga ndi FUMU, palije munyakhe pa dera pa imwe. Kulije jarawe linyakhe lakuyana na Chiuta withu.

³Mureke kuyowoya mwakujikuzga, kujirumba kureke kufuma mu milomo yinu. Pakuti FUMU ndi Chiuta uyo wakumanya, ndipo ndiyo wakupima milimo ya ŵanthu.

⁴Mauta gha vinkhara ghaphyoka, kweni ŵakutomboroka ŵakhozgeka.

⁵Awo kale ŵakaryanga na kukhuta, sono ŵakuruta kuya kalimiska chakurya. Awo kale ŵakaŵa na njara, ndiwo sono ŵakukhuta. Chumba chababa ŵana ŵankhonde na ŵaŵiri, kweni wa ŵana ŵanandi wakhara mulanda.

⁶FUMU yikukoma ndiposo yikupereka umoyo, yikuŵatorera ŵanthu ku malo gha ŵakufwa, ndipo yikuŵawuskaso.

⁷FUMU yikukavuska na kuŵasambazgiska ŵanthu. Yikuŵakhizgira pasi na kuŵawuskira muchanya.

⁸Yikaŵawuska ŵakavu kufuma mu fuvu, ndipo yikuŵatumphuska ŵasokwano kufuma pa chizara. Yikuŵakhazika pamoza na ŵakaronga na kuŵapa chizumbe cha nchindi. Pakuti malufura gha charu nga FUMU, ndipo pa gheneagha yakhazika charu.

⁹“Wati wavikirire mendero gha ŵanthu ŵakhe ŵakugomezgeka, kweni ŵaheni wati waŵataye ku mdima, pakuti munthu wakutonda na nkhongono pera chara.

¹⁰Ŵarwani ŵa FUMU ŵati ŵatekenyuke tuchokotuchoko, ndipo yiti yiŵadudumilire kufuma kuchanya. Yiti yiŵeruzge mpaka ku mphererekezgo za charu, yamkupereka nkhongono kwa karonga wakhe, na kukuzga nkhongono za wakuphakazgika wakhe.”

¹¹Penepapo Elikana wakawerera ku nyumba yakhe ku msumba wa Rama, kweni mwana Samuele wakakhara kwenekura ku Shilo kuteŵetera FUMU pasi pa musofi Eli.

¹²Ŵana ŵa Eli ŵakaŵa ŵaheni chomene, mwakuti ŵakapwererangako vya FUMU chara

¹³Iwo kuti ŵakapwererangako chara nanga mpha kaluso ka ŵasofi kufuma ku ŵanthu. Iwo ŵakachitanga ntheura: para munthu yunji wakapereka sembe, muteŵeti wa musofi wakizanga na ngoŵe ya mino yitatu mu woko lakhe apo nyama yikaŵa yichali kubwata mu mphika.

¹⁴Wakanjizganga ngoŵe zira mu nkhali panji mu chiŵiya, panji mu mumphika panji mu chivuwo, ndipo nyama yose iyo ngoŵe zira zikazuwuranga, yikaŵanga ya musofi. Mwa ntheura ndimo ŵakachitiranga ŵana ŵa Eli ku ŵaIsraele wose awo ŵakizanga ku Shilo.

¹⁵Ndiposo, pambere mafuta ghandawocheke, muteŵeti wa musofi wakizanga kwa uyo wakupereka sembe na kuti kwa iyo, “Undipe nyama kuti nkhamochere musofi pakuti wakukhumba yakuphika chara, kweni yiŵisi.”

¹⁶Usange wakupereka sembe yura wakuti, “Ureke danga ŵawoche mafuta, ndipo pamanyuma ungatora nyama umo iwe ukukhumbira.” Muteŵeti yura wakazgoranga kuti, “Chara! Undipe sono. Usange ukureka kundipa, nditi nditore mwa nkhongono.”

¹⁷Ntheura ndimo ukaŵira uheni wa ŵana ŵa Eli uwo ukaŵa ukuru chomene panthazi pa FUMU, pakuti ŵakayuyuranga sembe izo zikaperekekanga kwa FUMU.

¹⁸Apo Samuele wakaŵa msepuka, wakateŵeteranga FUMU uku wavwara malaya gha usofi gha bafuta ya efodi.

¹⁹Ndipo ŵanyina ŵakamusoneranga munjilira uchoko chirimika chilichose na kwiza nawo kwa iyo, para ŵakizanga pamoza na mufumu wakhe kwiza kapereka sembe ya chirimika na chirimika.

²⁰Penepapo Eli wakamutumbika Elikana na muwoli wakhe pakuyowoya kuti, “FUMU yikupe ŵana mu mwanakazi uyu kuti ŵatore malo gha uyo mukamupereka kwa FUMU.” Ntheura pamanyuma pakhe, ŵakawera kuruta ku kaya kwawo.

²¹FUMU yikamutumbika nadi Hana ndipo wakababa ŵana ŵanarume ŵatatu na ŵanakazi ŵaŵiri. Msepuka Samuele wakakuranga wakuteŵetera FUMU.

²²Pa nyengo iyi Eli wakaŵa muchekuru chomene. Iyo wakapulika ivyo ŵana ŵakhe ŵakachitanga ku ŵaIsraele wose na umo ŵakachitiranga uleŵe na ŵanakazi awo ŵakateŵetanga pamuryango wa Chihema Chakukumaniranamo.

²³Ntheura wakati kwa iwo, “Kasi ndi chifukwa uli mukuchita vinthu vya ntheura? Nkhupulika ku ŵanthu ŵanandi mauheni agho imwe mukuchita.

²⁴Chara mwa ŵana ŵane, ulu ndi lumbiri luweme chara ulo ine nkhupulika ŵanthu ŵa FUMU ŵakuyowoya.

²⁵Usange munthu wakwanangira munthu munyakhe, munthu yunji wati wamuŵeyeyere munthu wakwananga yura kwa Chiuta. Kweni usange munthu wakwanangira FUMU, kasi ndi njani wangamuŵeyerera?” Kweni ŵana ŵakhe kuti ŵakapulika kuchenya kwa wiskewo chara pakuti FUMU yikakhumbanga kuti ŵakomeke.

²⁶Msepuka Samuele wakakulirakulira mu musinkhu ndipo wakaŵa wakutemweka kwa FUMU na ku ŵanthu.

²⁷Nchimi ya Chiuta yikiza kwa Eli ndipo yikati kwa iyo, “FUMU yikuti, ‘Asi ine nkhajivumbula ku mbumba ya ŵawuso Aroni para ŵakaŵa ŵazga mu charu cha Eguputo pasi pa Faro.

²⁸Ine nkhamusora iyo mukati mu mafuko ghose gha Israele kuti waŵe musofi wane ndipo warutenge pa jochero lane kuti wanditeŵeterenge pakocha sembe, vyakununkhira na kuvwara laya la usofi la bafuta la efodi panthazi pane. Ndipo nkhapereka ku mbumba ya ŵawuso chigaŵa cha sembe zakocha zose izo ŵaIsraele ŵakupereka.

²⁹Kasi nchifukwa uli ukulaŵiska na mtima wa kudokera pa sembe na vyakupereka ivyo nkhalangula? Kasi ukuchindika chomene ŵana ŵako kuruska ine pakujitutuŵiska na vya mafuta ivyo ŵanthu ŵane ŵakupereka?’

³⁰Ntheura FUMU, Chiuta wa Israele wakuti, ‘Nkhapangana kuti mbumba yako na mbumba ya ŵawuso wanditeŵeterenge kwa muyirayira.’ Kweni sono FUMU yikuti, ‘Ichi kuti ndichitengeso chara, pakuti awo ŵakundichindika nane nditi ndiŵachindike, ndipo awo ŵakundiyuyura, nane nditi ndiŵayuyure.

³¹Nadi, mazuŵa ghakwiza apo ndamkuwuskapo nkhongono ya mbumba yako na mbumba ya ŵawuso, mwakuti kwamkuŵavye na yumoza muchekuru mu mbumba yako.

³²Ndipo mu visuzgo wizamkulaŵiska na mtima wa sanje pa usambazi wose uwo nditi ndiperekenge ku ŵaIsraele. Kweni kwamkuŵavye na yumoza muchekuru mu mbumba yako.

³³Kweni yumoza mu mbumba yako kuti ndamkumuwuskapo chara, ndamkumureka wa moyo kuti wanditeŵeterenge pa jochero. Iyo wakuliriskenge masozi na kuŵa na chitima mu mtima wako, ndipo wose ŵa mu mbumba yako wizamukomeka la lupanga mu nkhondo ŵachali ŵana ŵachoko.

³⁴Icho chichitikenge ku ŵana ŵako ŵaŵiri Hofini na Finehasi ndicho chiŵenge chimanyikwiro kwa iwe. Ŵana wose ŵaŵiri aŵa ŵati ŵafwenge zuŵa limoza.

³⁵Nditi ndijiwuskire musofi wakugomezgeka mweneuyo wati wachitenge kwakuyana na ivyo mtima wane ukukhumba na kughanaghana. Nditi ndikhozge mbumba kuŵa yakugomezgeka ndipo wati wateŵeterenge panthazi pa wakuphakazgika wane kwa muyirayira.

³⁶Ndipo waliyose uyo wakharengeko mu mbumba yako, wamkwiza kwa musofi uyu na kuromba kandarama panji kachakurya na kuŵeya kuti wamuzomerezge kuteŵetako mlimo wa usofi kuti waryengeko tuvimenyu twa chakurya.’ ”