Read new_tumbuka_bible 1 Samuele 20 Bible Online

1 Samuele 20 - new_tumbuka_bible bible

1 Samuele 20

¹Penepapo Davide wakachimbira kufuma ku Nayiyoti mu Rama na kuruta kwa Yonatani ndipo wakamufumba wakati, “Kasi ndachita chivichi? Kasi kwananga kwane ndi vichi? Kasi ŵawuso ndili kuŵanangira vichi kuti ŵandipenje ntheura kuti ŵandikome.”

²Yonatani wakazgora wakati, “Na pachoko pose! Kuti uti ukomekenge chara. Ŵadada kuti wakuchita chilichose chikuru panji chichoko chara kwambula kuti ŵadange wandiphalire ine. Kasi ŵangandibisirachi chinthu ichi? Kuti kuli ntheura chara.”

³Davide wakarapa panthazi pa Yonatani wakati, “Nadi ŵawuso ŵakumanya makora chomene kuti iwe ukukondwa nane ndipo ŵakughanaghana kuti Yonatani wareke na kuchimanya mzire waŵe na chitima. Kweni nkhurapira mwa FUMU ndiposo na panthazi pa iwe, ine kuti ndili kutali na nyifwa chara.”

⁴Yonatani wakati kwa Davide, “Chose icho ukukhumba kuti ndikuchitire, ine nditi ndikuchitirenge.”

⁵Davide wakati kwa Yonatani, “Na machero kuli chiphikiro cha kuthwasa kwa mwezi ndipo nkhwenera kurya pamoza na karonga. Undizomerezge ndirute kuti nkhabisame mu thengere mpaka pa zuŵa la chitatu na mise.”

⁶Usange ŵawuso ŵawona kuti ine palije, ukaŵaphalire kuti, “Davide wakandiŵeyerera chomene kuti ndimuzomerezge kuti warute ku msumba wa kwakhe, ku Betelehemu pakuti wali na sembe iyo yikuchitika chirimika na chirimika pa mbumba ya kwawo yose.

⁷Usange ŵizamkuti, ‘Nchiweme.’ Penepapo ine nda muteŵeti wako chizamkundiŵira makora. Kweni usange ŵizamkukaripa, wizamkumanya kuti ŵapanikizga kundichitira chiheni.

⁸Ntheura undichitire lusungu nda muteŵeti wako, pakuti ukachita phangano na ine panthazi pa FUMU. Kweni usange ndili kwananga, undikome ndiwe. Kasi ungandipereka uli ku ŵawuso?”

⁹Yonatani wakati, “Ndimo kuliri chara! Usange ndimanyenge kuti ŵadada ŵapanikizga nadi kukuchitira kanthu kaheni, asi mphanyi nkhakuphalira?”

¹⁰Davide wakamufumba Yonatani wakati, “Kasi ndi njani uyo wamkundiphalira usange ŵawuso ŵakukuzgora iwe na ukari?”

¹¹Yonatani wakazgora Davide wakati, “Tiye tirute ku thengere.” Ntheura wose ŵaŵiri ŵakaruta ku thengere.

¹²Yonatani wakati kwa Davide, “Nkhurapa panthazi pa FUMU, Chiuta wa Israele, para ndayowoya na ŵadada na machero panji na machero ghara pa nyengo yeneiyi, ndipo usange ndasanga kuti ŵakukhumba kuchitira chinthu chiweme kwa Davide nditi nditume nthumi kwiza kandiphalira.

¹³Kweni usange ŵadada ŵakukhumba kukuchitira iwe chinthu chiheni, FUMU yindilange chomene usange nkhukuphalira chara, na kukutuma kutali mwakuti uthaskike. FUMU yiŵe nawe nga ndi umo yanguŵira na ŵadada.

¹⁴Kweni usange ndichali wamoyo urongore kugomezgeka kwako kwa ine nga ndi umo FUMU yaŵira ya kugomezgeka kwa ine, mwakuti ndireke kukomeka.

¹⁵Ungarekanga chara kurongora kugomezgeka ku mbumba yane kwa muyirayira, nanga FUMU yiŵamare ŵarwani ŵa Davide wose pa charu cha pasi.

¹⁶Ntheura Yonatani wakachita phangano na mbumba ya Davide pakuyowoya kuti, ‘FUMU ndiyo yiwezgere nduzga pa ŵarwani ŵa Davide.’ ”

¹⁷Yonatani wakamurapiskaso Davide chirapo chakurongora kutemwa kwakhe pa iyo, pakuti Yonatani wakamutemwa Davide nga ndi umo wakajitemwera iyomwene.

¹⁸Yonatani wakatiso kwa Davide, “Na machero kuŵenge chiphikiro cha kuthwasa kwa mwezi uphya ndipo ŵanthu ŵati ŵamanye kuti iwe palije chifukwa pa chitengo chako paŵavyenge munthu.

¹⁹Ndipo zuŵa la chitatu ŵanthu ŵamanyenge kuti iwe palije. Ntheura uzakarute ku malo uko ukabisamako pakudanga apo makani agha ghakambiranga. Ukakhare kwenekura pafupi na mulu wa mawe.

²⁰Ine ndamkuponya mivwi yitatu ku libwe lira nga ndi para nkhudunjika pa kanthu kanji.

²¹Ntheura ine ndamkutuma msepuka kuti warute kuya katora mivwi yira ndipo usange ndamuchemerezga kuti, ‘Laŵiska! Mivwi yili ku dera ili la iwe uyitore wize nayo.’ Penepapo iwe ukizenge pakuti nkhurapira mwa FUMU, iwe uli mu mutende, urwani kulije.

²²Kweni usange ndamkucherezga kuti, ‘Laŵiska! Mivwi yili kunthazi kwako.’ Penepapo iwe ukarutenge pakuti FUMU ndiyo yati urutenge.

²³Pa makani gha mapangano agho iwe na ine tachita kwa yumoza na munyakhe, FUMU ndiyo yiŵe kaboni pakati pa ise kwa muyirayira.”

²⁴Ntheura Davide wakabisama ku thengere ndipo pa kuthwasa kwa mwezi, Karonga Sauli wakiza ku chiphikiro kuti warye chakurya.

²⁵Karonga wakakhara pa chitengo chakhe cha ufumu pafupi na chimati nga mpha nyengo zose. Yonatani wakakhara kuthyana na karonga apo Abinara wakakhara pafupi na karonga, kweni pa chitengo cha Davide pakaŵavye munthu.

²⁶Sauli wakayowoyapo kanthu chara zuŵa lira pakuti wakaghanaghana kuti, “Chinthu chinyakhe chamuwira Davide panji kuti ngwambula kuphotoka, nadi kuti ngwa kuphotoka chara.”

²⁷Kweni pa zuŵa la chiŵiri la chiphikiro, pa malo apo Davide wakakharanga pakaŵavyeso munthu. Sono Sauli wakafumba Yonatani, mwana wakhe wakati, “Kasi nchifukwa uli mwana wa Yese wandize ku chiphikiro kufuma mayiro mpaka muhanya uno?”

²⁸Yonatani wakazgora wakati Davide wakandiŵeya chomene kuti ndimuzomerezge warute ku Betelehemu.

²⁹Iyo wakati, “Undizomerezge kuti ndirute ku kwithu pakuti mbumba ya kwithu yili na sembe mu msumba, ndipo mukuru wane wandichichizga ine kuti nane nkhwenera kuŵapo. Ntheura sono usange ungandilengera lusungu, undizomerezge kuti ndirute kuya kawona ŵana ŵanyane. Ndicho chifukwa watondeka kuŵapo pa chakurya cha karonga.”

³⁰Penepapo Sauli wakakwiyira Yonatani mwana wakhe ndipo wakati kwa iyo, “Iwe wa chana cha mwanakazi wa nkhwesa, wa chigaruka, kasi ukuti ine nkhumanya chara kuti iwe ukupulikana na mwana wa Yese mweneuyo wati wakhozge soni iwe na kuvura ŵanyoko ŵako.

³¹Chifukwa usange mwana wa Yese wakukhara wa moyo pa charu cha pasi, iwe panji ufumu wako kuti ukhozgekenge chara. Ntheura sono tuma ŵanthu kuti ŵakamutore na kwiza nayo, pakuti nadi wakwenera kukomeka.”

³²Yonatani wakafumba Sauli ŵawiske ŵakhe kuti, “Kasi wakomerengechi? Wachita chivichi?”

³³Penepapo Sauli wakaponya mukondo kuti wamulase Yonatani mwana wakhe. Ntheura Yonatani wakamanya kuti wiske wakakhumbanga nadi kumukoma Davide.

³⁴Yonatani wakawuka apo wakhara kuti warye chakurya uku wakwiya chomene. Ndipo pa zuŵa la chiŵiri la chiphikiro cha kuthwasa kwa mwezi kuti wakarya chara, chifukwa chitima chikamukora chomene pa Davide na umo ŵawiske ŵakamulengeskeranga.

³⁵Na machero ghakhe na mulenje Yonatani na musepuka wakhe ŵakaruta ku thengere uko wakapangana na Davide.

³⁶Yonatani wakati kwa msepuka wakhe, “Chimbira kuti ukatore mivwi yeneiyo ndiponyenge.” Apo msepuka yura wakachimbiranga, Yonatani wakaponya mivwi kunthazi kwa iyo.

³⁷Para msepuka wakafika pa malo apo mivwi ukaya kawa, Yonatani wakachemerezga ku msepuka yura wakati, “Asi muvwi wawa kunthazi kwa iwe?”

³⁸Yonatani wakachemerezgaso kwa msepuka wakati, “Yendeskanga, wende luŵiroluŵiro, ungachedwanga.” Msepuka yura wakatora muvwi ura wakiza nawo kwa sekuru wakhe.

³⁹Msepuka yura wakamanya chilichose chara, kweni Yonatani na Davide pera ndiwo ŵakamanya.

⁴⁰Ntheura Yonatani wakapereka mahomwa ghakhe kwa msepuka wakhe yura na kuti kwa iyo, “Rutanga, uyeghere ku msumba mahomwa agha.”

⁴¹Wakati waruta msepuka yura, Davide wakawuka kufumira ku mwera kwa mulu wa mawe ghara, ndipo wajikama na kusindamira chisko chakhe pasi katatu. Wose ŵaŵiri ŵakafyofyonthana na kulira pamoza, kweni Davide wakalira kuruska Yonatani.

⁴²Ntheura Yonatani wakati kwa Davide, “Rutanga mu mutende pakuti iwe na ine tili kuchita phangano kuti titemwanenge yumoza na munyakhe mu zina la FUMU pakurapa kuti, ‘FUMU yiŵe kaboni pakati pa ine na iwe, ndipo pakati pa mphapu yane na mphapu yako kwa muyirayira.’ ” Penepapo Davide wakanyamuka na kuruta ndipo Yonatani wakawerera ku msumba.