Read new_tumbuka_bible 1 Samuele 21 Bible Online

1 Samuele 21 - new_tumbuka_bible bible

1 Samuele 21

¹Davide wakaruta kwa musofi Ahimeleki ku Nobu. Para Ahimeleki wakizanga kuti wakumane nayo Davide, wakatenthemanga ndipo wakufumba wakati, “Nchifukwa uli muli mwekha kwambula munthu munyakhe kuti wamuperekezgani?”

²Davide wakazgora musofi Ahimeleki wakati, “Karonga wandituma ndipo wandilangula kuti ndireke kuphalira waliyose makani agho wandituma. Pa vya ŵasilikari ŵane, ndaŵaphalira kuti tikumane pa malo ghanji.

³Ndipo sono kasi muli na chakurya pano? Mundipeko vingwa vinkhonde panji chakurya chilichose icho muli nacho.”

⁴Musofi wakamuzgora Davide wakati, “Pano ndilije chingwa waka chilichose, kweni pali chingwa chakupatulika pera. Usange ŵasilikari ŵinu ŵaziŵizga ŵanakazi, ŵangarya.”

⁵Davide wakamuzgora musofi wakati, “Inya, ise taziŵizga ŵanakazi nga ndi umo kukuŵira mazuŵa ghose para nkhuruta ku nkhondo. Ŵanyamata ŵane nawo mbakupatulika nanga pangaŵa pa maulendo gha waka. Asi muhanya uno pa ulendo uwu ŵakwenera kuziŵizga kwakuruska?”

⁶Ntheura musofi yura wakapereka chingwa chakupatulika chira kwa Davide, chifukwa pakaŵavye chingwa cha waka kweni Chingwa cha Uŵapo wa Chiuta, cheneicho chikawuskikapo panthazi pa FUMU mwakuti waŵikepo chingwa chinyakhe chakuthukira.

⁷Sono pa zuŵa lenelira yumoza wa ŵateŵeti wa Sauli wakaŵa penepara mweneuyo wakajalirika chifukwa chakuŵa wambula kutozgeka kwa FUMU. Zina lakhe wakaŵa Doyegi wa fuko la Edomu, murara wa ŵaliska ŵa Sauli.

⁸Davide wakamufumba Ahimeleki, wakati, “Kasi muli na mukondo panji lupanga? Chifukwa ine ndilije kwiza na lupanga panji mahomwa pakuti mlimo wa karonga wanguŵa wa pa luŵiro.”

⁹Musofi yura wakazgora wakati, “Pano ndili na lupanga lwa Goliyati mweneuyo mukamukomera mu dambo la Ela. Lupanga ulu ndwa kuvungilizgika mu salu kunyuma kwa laya la bafuta la efodi. Usange mukulikhumba mungatora pakuti palije lunyakhe kweni lweneulu pera.” Davide wakati, “Pakuti palije lunyakhe la kukozgana na lweneulu, mbwenu ndipani lweneulu.”

¹⁰Davide wakawuka na kuchimbira zuŵa lenelira chifukwa cha kopa Sauli. Iyo wakaruta kwa Akishi karonga wa msumba wa Gati.

¹¹Nduna za Akishi zikati kwa iyo, “Kasi uyu ndi Davide chara, karonga wa charu cha Israele? Asi ndi mweneuyu uyo ŵanakazi ŵakakoŵerananga pakwimba uku wakuvina kuti, ‘Sauli wakoma ŵasilikari vikwi kweni Davide wakoma ŵasilikari vikwi khumi.’ ”

¹²Davide wakaghasunga mu mtima mazgu agha, ndipo wakamba kumopa chomene Akishi karonga wa msumba wa Gati.

¹³Ntheura wakasintha makhaliro ghakhe panthazi pawo. Iyo wakajizgoranga nga ndi wakufuntha. Wakagwarambulanga pa vijaro vya pa chipata ndipo madozo ghali sulululu pa mwembe wakhe.

¹⁴Akishi wakati ku nduna zakhe, “Wonani munthu uyu, ngwa kufuntha. Kasi mwizirachi nayo kwa ine?

¹⁵Kasi ine nkhusoŵa ŵanthu ŵakufuntha kuti mwiza nayo munthu kuti wizakachite vifusi vyakhe panthazi pa ine? Kasi munthu wa ntheura wanganjira mu nyumba yane?”